ମାର୍ଶାଘାଇ, ୧୮।୯(ଡି.ଏନ୍.ଏ.): କେନ୍ଦ୍ରାପଡ଼ା ଜିଲା ମାର୍ଶାଘାଇ ବ୍ଲକ ପରକୂଳା ପଞ୍ଚାୟତ ଆଙ୍କୋ ଗ୍ରାମରେ ମଙ୍ଗଳବାର ବିଳମ୍ବିତ ରାତିରେ ଅଗ୍ନିକାଣ୍ଡ ଘଟି ୧୨ ଗୃହପାଳିତ ପ୍ରାଣୀ ଜୀବନ୍ତ ଦଗ୍ଧ ହୋଇଛନ୍ତି। ଗ୍ରାମର କ୍ଷେତ୍ରବାସୀ ରାଉତଙ୍କ ୨ ବଖରା ବାସଗୃହ ସମେତ ୨ ବଖରା ଗୁହାଳ ଜଳିଯାଇଛି। ଜୀବନ୍ତ ଦଗ୍ଧ ହୋଇଥିବା ଗୃହପାଳିତ ପ୍ରାଣୀ ମଧ୍ୟରେ ୨ ବଡ଼ ଦୁହାଁଳିଆ ଗାଈଙ୍କ ସହ ୨ ବାଛୁରୀ ଏବଂ ୮ଟି ଛେଳି ଥିବା ଜଣାପଡ଼ିଛି। ବାସଗୃହରେ ଥିବା ଧାନ, ଚାଉଳ ସମେତ ସମସ୍ତ ଆସବାବପତ୍ର ପୋଡି ପାଉଁଶ ହୋଇଯାଇଛି। ଖବର ପାଇ ମାର୍ଶାଘାଇରୁ ଅଗ୍ନିଶମ ଗାଡ଼ି ଆସି ପହଞ୍ଚିବା ବେଳକୁ ସବୁ ଜଳିଯାଇଥିଲା। ଗୁହାଳ ଘରେ ଦିଆଯାଇଥିବା ମଶା ଧୂପରୁ ଏହି ଅଗ୍ନିକାଣ୍ଡ ଘଟିଥିବା ଅନୁମାନ କରାଯାଉଛି। ମାର୍ଶାଘାଇ ତହସିଲ ଅନ୍ତର୍ଗତ ପେଣ୍ଠ ରାଜସ୍ବ ନିରୀକ୍ଷକ ହୃଷୀକେଶ ଜେନା ଏବଂ ମାର୍ଶାଘାଇ ପ୍ରାଣୀ ଚିକିତ୍ସକ ମୃତ୍ୟୁଞ୍ଜୟ ମହାନ୍ତି ଘଟଣାସ୍ଥଳରେ ପହଞ୍ଚି ତଦନ୍ତ କରିଛନ୍ତି।