ପରଜଙ୍ଗ, ୧୨।୬(ଡି.ଏନ.ଏ.) – ଢେଙ୍କାନାଳ ଜିଲା ପରଜଙ୍ଗ ବ୍ଲକ କନ୍ତୁରୁ ପଞ୍ଚାୟତ ଅଧୀନ ଚାନ୍ଦପୁର ଗ୍ରାମରେ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା (ଏମ୍ଜିଏନ୍ଆର୍ଇଜିଏସ୍)ରେ ଅନିୟମିତତା ହୋଇଥିବା ଅଭିଯୋଗ ହୋଇଛି। ବଡ଼ବନ୍ଧଠାରୁ ଭଣ୍ଡାରିପଶି ଯାଏ କରାଯାଉଥିବା ଫିଲ୍ଡ ଚ୍ୟାନେଲ କାମରେ ଜବ୍କାର୍ଡଧାରୀଙ୍କ କାର୍ଡରେ ଅନ୍ୟ ଶ୍ରମିକଙ୍କୁ ନିୟୋଜିତ କରାଯାଉଥିବା ଅଞ୍ଚଳବାସୀ ବ୍ଲକ ପ୍ରଶାସନର ଦୃଷ୍ଟିଆକର୍ଷଣ କରିଛନ୍ତି। କେବଳ ଏତିକି ନୁହେଁ, ନିୟୋଜିତ ଶ୍ରମିକଙ୍କ ତୁଳନାରେ ମଷ୍ଟର ରୋଲ୍ରେ ଅଧିକ ଦର୍ଶାଯାଇଛି। କାର୍ଯ୍ୟ ପରିଚାଳନାରେ ନିୟୋଜିତ ଗଁା ସାଥୀ ଅନିୟମିତତାକୁ ସ୍ବୀକାର କରିବା ପରେ ଦୁର୍ନୀତିର ଚେର ଗହୀରକୁ ଲମ୍ବିଥିବା ଚର୍ଚ୍ଚା ହେଉଛି। ଅନ୍ୟପଟେ ଅଭିଯୋଗ ପ୍ରମାଣିତ ହେଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଏବିଡିଓ କହିଛନ୍ତି।
ଗ୍ରାମ ସାଥୀ ନିମେଇ ଚରଣ ସାହୁଙ୍କ ନାମରେ ଏହି କାମର କାର୍ଯ୍ୟାଦେଶ ରହିଛି, ଯାହାର କୋଡ୍ ନଂ.୨୪୦୭୦୦୭୦୧୪/୧୦୪୩୦୧୮୨। ଏହାର ଅଟକଳ ମୂଲ୍ୟ ୫ ଲକ୍ଷ ଟଙ୍କା। ତେବେ ମଷ୍ଟରରୋଲ୍ରେ ୨୨ଜଣ ଶ୍ରମିକ କାର୍ଯ୍ୟ କରୁଥିବା ଦର୍ଶାଯାଇଥିବାବେଳେ ୧୪ଜଣ ଶ୍ରମିକ କାମ କରୁଛନ୍ତି। ସେହିପରି ଜବ୍କାର୍ଡଧାରୀଙ୍କ ବଦଳରେ ଅନ୍ୟ ଶ୍ରମିକଙ୍କୁ ନିୟୋଜିତ କରାଯାଇଛି। ଏ ନେଇ କେତେଜଣ ଗ୍ରାମବାସୀ ବ୍ଲକ ପ୍ରଶାସନର ଦୃଷ୍ଟି ଆକର୍ଷଣ କରିଥିଲେ। ଏ ନେଇ ଗ୍ରାମ ସାଥୀ ନିଜ ପ୍ରତିକ୍ରିୟାରେ କୁହନ୍ତି, ଏମ୍ଜିଏନ୍ଆର୍ଇଜିଏସ୍ରେ ପିସି କାରବାର ହେଉଛି। ତେଣୁ ନିମ୍ନମାନର କାମ ହେବା ସ୍ବାଭାବିକ ବୋଲି ସେ ଅବାନ୍ତର ଯୁକ୍ତି ବାଢ଼ିଥିଲେ। ଜିଆର୍ଏସ୍ ମମତା ସାହୁ କାର୍ଯ୍ୟରେ ଅନିୟମିତତା ହେଉଥିବା ଅଭିଯୋଗକୁ ସ୍ବୀକାର କରିଛନ୍ତି। ହେଲେ ଗଁା ସାଥୀଙ୍କ ପ୍ରରୋଚନାରେ ଏପରି କାମ ହେଉଥିବା ସେ କହିଛନ୍ତି। ଏଥିସହ ମଷ୍ଟର ରୋଲ୍ରେ ଦର୍ଶାଯାଇଥିବା ଅତିରିକ୍ତ ଶ୍ରମିକଙ୍କ ନାମ କାଟିଦିଆଯିବ ବୋଲି ଜିଆର୍ଏସ୍ କହିଥିଲେ। ଯନ୍ତ୍ରୀ ଇତିଶ୍ରୀ ଦେବୀ ନିଜ ପ୍ରତିକ୍ରିୟାରେ କହିଛନ୍ତି, ଅନିୟମିତତା ଅଭିଯୋଗ ଆସିବା ପରେ ଗଁା ସାଥୀଙ୍କୁ ତାଗିଦ୍ କରାଯାଇଛି। କାମର ମାନ ଠିକ୍ ନ ରହିଲେ ବିଲ୍ କରାଯିବ ନାହିଁ। ତେବେ ଗଁା ସାଥୀ ଆଣିଥିବା ପିସି କାରବାର ଅଭିଯୋଗ ଭିତ୍ତିହୀନ ବୋଲି ଯନ୍ତ୍ରୀ କହିଛନ୍ତି। ଏବିଡିଓ ଅଶୋକ ମିଶ୍ର କୁହନ୍ତି, ସେ ଘଟଣା ସମ୍ପର୍କରେ ଅବଗତ ନାହାନ୍ତି। ତଥାପି ଯଦି ଏଭଳି ଅନିୟମିତତା ହୋଇଥାଏ, ତେବେ କନିଷ୍ଠ ଯନ୍ତ୍ରୀଙ୍କ ସହ ଆଲୋଚନା କରି କାର୍ଯ୍ୟାନୁଷ୍ଠାନ ଗ୍ରହଣ କରାଯିବା।