ବାଳକାଟୀ,୧ା୭(ଡି.ଏନ୍.ଏ.) : ରାଜଧାନୀ ଉପକଣ୍ଠ ବାଳକାଟୀ ଅଞ୍ଚଳରେ ରବିବାର ତୃତୀୟ ବିବାହ ପାଇଁ ଉଦ୍ୟମ କରୁଥିବା ଜଣେ ଯୁବକଙ୍କୁ ହିନସ୍ତା ହେବାକୁ ପଡ଼ିଛି। ମନ୍ଦିରରେ ବିବାହ ଆରମ୍ଭ ହେଉ ହେଉ ଦ୍ୱିତୀୟ ସ୍ତ୍ରୀଙ୍କ ଅଭିଯୋଗକ୍ରମେ ପୋଲିସ ତାଙ୍କୁ ଉଠାଇ ନେଇ ଥାନାରେ ଅଟକ ରଖିଛି। ପୋଲିସ ସୂଚନା ମୁତାବକ, ବାଙ୍କୀ ଅଞ୍ଚଳର ଜନୈକ ଯୁବକଙ୍କ ପ୍ରଥମ ସ୍ତ୍ରୀଙ୍କ ମୃତ୍ୟୁ ଘଟିଥିବାବେଳେ କିଛିଦିନ ପୂର୍ବେ ବାଲିଅନ୍ତା ଥାନା ଭଇଁଚୁଆ ଅଞ୍ଚଳର ଜଣେ ଯୁବତୀଙ୍କୁ ଦ୍ୱିତୀୟ ବିବାହ କରିଥିଲେ। କିନ୍ତୁ ଅଳ୍ପ ଦିନ ମଧ୍ୟରେ ସେମାନଙ୍କ ଦାମ୍ପତ୍ୟ ଜୀବନରେ ଝଡ଼ ସୃଷ୍ଟି ହୋଇଥିଲା। ଫଳରେ ଯୁବକ ଜଣକ ଦ୍ୱିତୀୟ ସ୍ତ୍ରୀଙ୍କୁ ଛାଡ଼ି ଅନ୍ୟତ୍ର ରହୁଥିବାବେଳେ ମହିଳା ଜଣକ ବାପ ଘରେ ରହୁଥିଲେ। ତେବେ ଦ୍ୱିତୀୟ ସ୍ତ୍ରୀଙ୍କୁ ଛାଡପତ୍ର ନ ଦେଇ ଉକ୍ତ ଯୁବକ ତୃତୀୟ ବିବାହ ପାଇଁ ମନ ବଳାଇଥିଲେ। ଏଥିପାଇଁ ବାଳକାଟୀ ପ୍ରତାପଶାସନ ଗ୍ରାମର ଜଣେ ଯୁବତୀଙ୍କୁ ବିବାହ କରିବାକୁ ସ୍ଥିର କରିଥିଲେ। କିନ୍ତୁ କନ୍ୟାଘର ଯୁବକଙ୍କ ପୂର୍ବସ୍ଥିତି ସମ୍ପର୍କରେ କୌଣସି ଖବର ପାଇପାରି ନଥିଲେ। ଇତିମଧ୍ୟରେ ଯୁବକ ଜଣକ ବିବାହ ପ୍ରସ୍ତାବ ଦେଇ ରବିବାର ତିଥି ଅନୁଯାୟୀ ବାଳକାଟୀସ୍ଥିତ ଗହୀର ଦୁଲାଦେଈ ମନ୍ଦିରରେ ବିବାହ ଆୟୋଜନ ହୋଇଥିଲା। କନ୍ୟାପକ୍ଷ ବର ରୋଶଣିକୁ ସ୍ବାଗତ ଜଣାଇ ମନ୍ଦିରକୁ ପାଛୋଟି ନେଇଥିଲେ। ବାହାଘର ପାଇଁ ବର ଓ କନ୍ୟା ବେଦୀରେ ବସିଥିବାବେଳେ ପୁରୋହିତ ମନ୍ତ୍ର ଉଚ୍ଚାରଣ କରିଥିଲେ। ଏହି ସମୟରେ ହଠାତ ଘଟଣାସ୍ଥଳରେ ବାଳକାଟୀ ଫାଣ୍ଡି ଅଧିକାରୀ ଦେବେନ୍ଦ୍ର ସାହୁ ପହଞ୍ଚତ୍ ଯୁବକଙ୍କୁ ଉଠାଇ ଥାନାକୁ ନେଇଆସିଥିଲେ। ଥାନାରେ ମଧ୍ୟସ୍ଥଙ୍କ ଜରିଆରେ ଦ୍ୱିତୀୟ ସ୍ତ୍ରୀଙ୍କ ସହ ଯୁବକଙ୍କ ମଧ୍ୟରେ ଆପୋସ ବୁଝାମଣା ଚାଲିଥିବା ଫାଣ୍ଡି ଅଧିକାରୀ ସାହୁ କହିଛନ୍ତି। ଅପରପକ୍ଷେ ବାହାବେଦିରୁ ମଙ୍ଗୁଳା କନ୍ୟାକୁ ନେଇ କନ୍ୟାପିତା ଘରକୁ ଫେରିଥିବା ଜଣାପଡିଛି।