ସିଂହପୁର,୫।୧୦(ଡି.ଏନ୍.ଏ.): ଯାଜପୁର ଜିଲା ବିଞ୍ଝାରପୁର ବ୍ଲକର ସିଂହପୁର ବଜାରଠାରେ ଗୁରୁବାର ସନ୍ଧ୍ୟାରେ ବସ୍ ଚକାତଳେ ଟିଣା ଗ୍ରାମର ଯୁବକ ଚନ୍ଦ୍ରମଣିଙ୍କ ମୃତ୍ୟୁ ଘଟିଥିଲା। ଏହି ଘଟଣାକୁ ନେଇ ଶୁକ୍ରବାର ଉତ୍ତ୍ୟେକ୍ତ ଲୋକେ ବାଛୋଳ ଛକଠାରେ ଟାୟାର ଜାଳି ମୃତକଙ୍କ ପରିବାରକୁ କ୍ଷତିପୂରଣ ଦାବିରେ ଦୀର୍ଘ ୫ ଘଣ୍ଟା ରାସ୍ତା ଅବରୋଧ କରିଥିଲେ। ଯାହା ଆଜି ସେମାନଙ୍କ ପାଇଁ ମହଙ୍ଗା ପଡ଼ିଛି। ରାସ୍ତା ଅବରୋଧ କରି ଯାନବାହନ ଅଟକାଇ ଆଇନଶୃଙ୍ଖଳା ପରିସ୍ଥିତି ବିଗାଡ଼ିବା ଅଭିଯୋଗରେ ପୋଲିସ ପକ୍ଷରୁ କେସ ନଂ. ୨୬୭/୧୯ରେ ଏକ ମାମଲା ରୁଜୁ କରାଯାଇଛି। ପୋଲିସ ଧାରଣାକାରୀମାନଙ୍କ ଭିଡିଓ ଉତ୍ତୋଳନ କରିଥିଲା। ଏହି ଭିଡିଓରୁ ଉତ୍ତ୍ୟେକ୍ତ ଲୋକଙ୍କୁ ଚିହ୍ନଟ କରି ଶନିବାର ସେମାନଙ୍କ ମଧ୍ୟରୁ ତିନି ଜଣଙ୍କୁ ଗିରଫ କରି କୋର୍ଟ ଚାଲାଣ କରିବା ସହିତ ଅନ୍ୟମାନଙ୍କୁ ଧରିବା ପାଇଁ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି। ଏହି ଘଟଣାରେ ଜଣଙ୍କ ପରେ ଜଣଙ୍କୁ ଟିଣା ଗ୍ରାମରୁ ପୋଲିସ ଉଠାଇ ଆଣୁଥିବା ଦେଖି ଗ୍ରାମର କିଛି ବ୍ୟକ୍ତି ଗାଁ ଛାଡ଼ି କେଉଁଆଡ଼େ ଆତ୍ମଗୋପନ କରିଛନ୍ତି। ଅନ୍ୟପକ୍ଷରେ ମୃତ ଚନ୍ଦ୍ରମଣିଙ୍କ ମୃତ୍ୟୁ ୩ ଦିନ ବିତିଯାଇଥିଲେ ମଧ୍ୟ ପୋଲିସ ସମ୍ପୃକ୍ତ ବସ୍ ଡ୍ରାଇଭରଙ୍କୁ ଏଯାବତ୍ ଗିରଫ କରି ନ ଥିବାରୁ ଗ୍ରାମରେ ଚାପା ଉତ୍ତେଜନା ଲାଗିରହିଛି।