ଓ୍ବାଶିଂଟନ, ୨୨।୬: ପର୍ଯ୍ୟଟନ ଶିଳ୍ପ ବିକାଶ ପାଇଁ ଆମେରିକାର ଷ୍ଟାର୍ଟଅପ୍ ‘ସ୍ପେସ୍ ପ୍ରସ୍ପେକ୍ଟିଭ୍’ ପକ୍ଷରୁ ଏକ ନୂଆ ଧରଣର ଯୋଜନା ପ୍ରସ୍ତୁତ କରାଯାଇଛି। ୨୦୨୪ଠାରୁ ଏହି କମ୍ପାନୀ ପର୍ଯ୍ୟଟକଙ୍କୁ ମହାକାଶ ଭ୍ରମଣର ସୁଯୋଗ ଯୋଗାଇଦେବ। କମ୍ପାନୀ ପକ୍ଷରୁ ‘ସ୍ପେସ୍ଶିପ୍ ନେପଚୁନ୍’ର ଶୁଭାରମ୍ଭ କରାଯିବା ଲାଗି ଜୋରସୋରରେ କାମ ଜାରି ରହିଛି। ଏକ କ୍ୟାପସୁଲ୍ ବେଲୁନରେ ପର୍ଯ୍ୟଟକଙ୍କୁ ମହାକାଶ ଭ୍ରମଣ କରାଯିବ। ଏହି ବେଲୁନରେ ୯ ଜଣ ପର୍ଯ୍ୟଟକଙ୍କର ବସିବା ଭଳି ସୁବିଧା ରହିବ। ଏଥିରେ ପର୍ଯ୍ୟଟକଙ୍କୁ କୌଣସି ସ୍ପେସ୍ ସୁଟ୍ ପିନ୍ଧିବାକୁ ପଡ଼ିବ ନାହିଁ ବୋଲି କମ୍ପାନୀ ପକ୍ଷରୁ ସୂଚନା ଦିଆଯାଇଛି। ଏଥିରେ ବସି ବୁଲିବା ପାଇଁ ୬ଘଣ୍ଟାକୁ ୯୬ ଲକ୍ଷ ଟଙ୍କା ଭଡ଼ା ଦେବାକୁ ପଡ଼ିବ ବୋଲି କମ୍ପାନୀ ପକ୍ଷରୁ କୁହାଯାଇଛି। ବାୟୁମଣ୍ଡଳର ଉପରସ୍ତରରେ ପହଞ୍ଚିବା ପାଇଁ ୨ ଘଣ୍ଟା ଏବଂ ଓହ୍ଲାଇବା ଲାଗି ୨ ଘଣ୍ଟା ସମୟ ଲାଗିବ। ଭୂପୃଷ୍ଠରୁ ୧୦ ହଜାର ଫୁଟ ଉପରେ ପର୍ଯ୍ୟଟକମାନେ ୨ ଘଣ୍ଟା ବେଲୁନ କ୍ୟାପସୁଲରେ ବସି ଉଡ଼ି ବୁଲିବେ। ପର୍ଯ୍ୟଟକଙ୍କୁ ଏକ ସ୍ବତନ୍ତ୍ର ଅନୁଭୁତି ଦେବା ପାଇଁ ଏଭଳି ଯୋଜନା କରାଯାଇଥିବା କମ୍ପାନୀ ପକ୍ଷରୁ କୁହାଯାଇଛି।