କେସିଙ୍ଗା,୩୦।୮(ଡି.ଏନ.ଏ.)-କଳାହାଣ୍ଡି ଜିଲା କେସିଙ୍ଗା ବ୍ଲକ ଅନ୍ତର୍ଗତ କଶୃପଡା ଯୁକ୍ତ ଦୁଇ ମହାବିଦ୍ୟାଳୟ ପରିସରରେ ମହାତ୍ମା ଗାନ୍ଧୀଙ୍କ ଅହିଂସାକୁ ଭାରତର ସମ୍ବିଧାନ ମୁଖବନ୍ଧରେ ସ୍ଥାନ ପାଇବା ପାଇଁ ଏକ ସଭା ଗୁରୁବାର ଅନୁଷ୍ଠିତ ହୋଇଥିଲା। ଏଥିରେ ନର୍ଲା ନିର୍ବାଚନମଣ୍ଡଳୀର ବିଧାୟକ ଭୁପିନ୍ଦର ସିଂହ ମୁଖ୍ୟଅତିଥି ଭାବେ ଯୋଗଦେଇଥିଲେ। ଗତବର୍ଷ ପ୍ରଧାନମନ୍ତ୍ରୀଙ୍କ ନେତୃତ୍ୱରେ ଦିଲ୍ଲୀରେ ଅନୁଷ୍ଠିତ ହୋଇଥିବା ମହାତ୍ମା ଗାନ୍ଧୀଙ୍କ ୧୫୦ତମ ଜୟନ୍ତୀ ପାଳନ ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯୋଗଦେଇ ଗାନ୍ଧୀଙ୍କ ଅହିଂସାକୁ ଭାରତର ସମ୍ବିଧାନ ମୁଖ୍ୟବନ୍ଧରେ ସ୍ଥାନ ପାଇବା ପାଇଁ ପ୍ରସ୍ତାବ ଆଗତ କରିଥିଲେ। ଗାନ୍ଧୀଙ୍କ ଅହିଂସା ସତ୍ୟାଗ୍ରହ ଆନ୍ଦୋଳନ ଯୋଗୁ ୧୫ ଅଗଷ୍ଟ ୧୯୪୭ରେ ବ୍ରିଟିସ ଶାସନରୁ ମୁକ୍ତ ହୋଇ ଭାରତ ସ୍ବାଧୀନତା ପ୍ରାପ୍ତ ହୋଇଥିଲା । ଗାନ୍ଧୀଙ୍କ ଏହି ଅହିଂସାକୁ ଭାରତ ବର୍ଷରେ ଯୁଗ ଯୁଗଧରି ବଞ୍ଚାଇ ରଖିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ପ୍ରସ୍ତାବ ଆଗତ କରିଥିବାରୁ ଓଡିଶାର ସ୍ବାଧୀନତା ସଂଗ୍ରାମୀ ସମିତି, ଗାନ୍ଧୀ ଶାନ୍ତି ପ୍ରତିଷ୍ଠାନ ଓ ଉତ୍କଳ ଗାନ୍ଧୀ ସ୍ମାରକ ନିଧି ଏବଂ ରାଜ୍ୟ ସରକାରଙ୍କ ତତ୍ତ୍ବାବଧାନରେ ଏହି କାର୍ଯ୍ୟ ଚାଲିଥିବାରୁ ନର୍ଲା ନିର୍ବାଚନ ମଣ୍ଡଳୀର ବିଧାୟକଙ୍କୁ ଭୁପିନ୍ଦର ସିଂହଙ୍କୁ ୩୪ ଶହ ଦସ୍ତଖତ ସଂଗ୍ରହ କରିବାକୁ ଦାୟୀତ୍ୱ ଦିଆଯାଇଥିବାରୁ ଗୁରୁବାର କଶୃପଡା ଯୁକ୍ତ ୨ ମହାବିଦ୍ୟାଳୟରେ ଏକ ସଭାର ଆୟୋଜନ କରାଯାଇଥିଲା। ଗାନ୍ଧୀଙ୍କ ଶାନ୍ତି, ପ୍ରୀତି ଓ ଅହିଂସା, ଆଦର୍ଶ, ସର୍ବ ଧର୍ମ ସମନ୍ବୟ ଆଦି ବିଷୟରେ ଛାତ୍ରୀଛାତ୍ରମାନଙ୍କୁ ଆଲୋକପାତ କରି ଛାତ୍ରୀଛାତ୍ରମାନଙ୍କଠାରୁ ଦସ୍ତଖତ ସଂଗ୍ରହ କରିଥିଲେ। ନର୍ଲା, କେସିଙ୍ଗା, ଭବାନୀପାଟଣା ଆଦି ଅଞ୍ଚଳରୁ ୭ ଦିନ ଏହି ଦସ୍ତଖତ ଅଭିଯାନ ଚାଲିବ। ଏହି ଅହିଂସା ପ୍ରସ୍ତାବକୁ ଅଞ୍ଚଳ ତଥା ଦେଶବାସୀ ସମ୍ମତି ପ୍ରଦାନ କରିବାକୁ ନର୍ଲା ବିଧାୟକ ଅନୁରୋଧ କରିଛନ୍ତି । ଏହି ଦସ୍ତଖତ ଅଭିଯାନରେ ବିଧାୟକଙ୍କ ପ୍ରତିନିଧି ସନ୍ତୋଷ ଶର୍ମା, ରାମଜୀମାତ ଖଣ୍ଡିଆ, ରିସବ ଜୈନ ପ୍ରମୁଖ ଯୋଗଦେଇଥିଲେ। କଶୃପଡା ଯୁକ୍ତ ୨ ପ୍ରିନ୍ସିପାଲ ରମେଶ ନାଏକ, ଜଣେ ହାଇସ୍କୁଲ ପ୍ରଧାନ ଶିକ୍ଷକ ବି. ସୁରଲିଧର ଆଚାରୀ ଓ ଚନ୍ଦନ ସେନାପତି ନିଜସ୍ବ ମତ ପ୍ରଦାନ କରିଥିଲେ।