ନୟାଗଡ଼ ଅଫିସ,୧୧ା୬: ନୟାଗଡ଼ ଜିଲା ଭାପୁର ବ୍ଲକ ପଦ୍ମାବତୀ ଗ୍ରାମ ଗୋପୀନାଥ ମନ୍ଦିର ଦଧିନଉତି ମହାନଦୀ ଗର୍ଭରେ ଠାବ ହୋଇଛି। ଭାରତୀୟ କଳା ଓ ସାଂସ୍କୃତିକ ଐତିହ୍ୟ ନ୍ୟାସ (ଇନ୍ଟାକ୍) ପକ୍ଷରୁ ମହାନଦୀ ଅବବାହିକା ଐତିହ୍ୟ ସ୍ଥଳ ପ୍ରଲେଖନ କାର୍ଯ୍ୟ ବେଳେ ଏହା ଦୃଷ୍ଟିକୁ ଆସିଛି। ପ୍ରକଳ୍ପ ମୁଖ୍ୟ ଐତିହାସିକ ଅନୀଲ ଧରଙ୍କ ନେତୃତ୍ୱରେ କାର୍ଯ୍ୟ ଚାଲିଛି। ସହଯୋଗୀ ଦୀପକ କୁମାର ରଣା କୁହନ୍ତି, ଏହା ପୁରୁଣା ଗୋପୀନାଥ ମନ୍ଦିର, ଯାହା ୧୧ବର୍ଷ ତଳେ ମହାନଦୀରୁ ବାହାରିଥିଲା। ପୂର୍ବରୁ ପଦ୍ମାବତୀ ଗ୍ରାମ ଯେଉଁ ସ୍ଥାନରେ ଥିଲା ତାହା ଏବେ ମହାନଦୀ ଗର୍ଭରେ। ମହାନଦୀ ଗତିପଥ ପରିବର୍ତ୍ତନରୁ ପଦ୍ମାବତୀ ସମେତ ୭ ଗ୍ରାମ ଓ ୨୨ ମନ୍ଦିର ଲୀନ ହୋଇଗଲା। ତେବେ ନଦୀ ଭିତରେ ଠାବ ଚଳନ୍ତି ପ୍ରତିମା ନୂଆ ଗୋପୀନାଥ ମନ୍ଦିରରେ ରହିଛି। ଐତିହାସିକ ଧର କୁହନ୍ତି, ଗ୍ରାମବାସୀଙ୍କ ସୂଚନା ଅନୁସାରେ ମନ୍ଦିରଟି ୧୪୦୧ରୁ ୧୬୦୦ ଶତାବ୍ଦୀ ମଧ୍ୟରେ ବୋଲି ଜଣାପଡିଛି। ମନ୍ଦିରର ଉଚ୍ଚତା ୬୦ ଫୁଟ ହେବ। ମୁଖଶାଳା ପିଢ଼ା ଓ ଦେଉଳ ବିମାନ ରେଖା ଶୈଳୀର। ଖନନ କାର୍ଯ୍ୟ ଜାରି ରହିଥିବାରୁ ଅଧିକ ତଥ୍ୟ ମିଳିବ ବୋଲି ସେ କହିଛନ୍ତି।