ଗଣିଆ,୯ା୯ (ଡି.ଏନ.ଏ.): ଗତ ୪ଦିନ ଧରି ଲଘୁଚାପଜନିତ ଲଗାଣ ବର୍ଷା ଯୋଗୁ ମହାନଦୀର ଜଳସ୍ତର ବୃଦ୍ଧି ପାଇବାରେ ଲାଗିଛି।ତେବେ ଗତ ଶନିବାର ଅପରାହ୍ନରେ ମହାନଦୀରେ ବନ୍ୟାପାଣି ଆସି ନୟାଗଡ଼ ଜିଲା ଗଣିଆ ବ୍ଲକର ଗଣିଆ-ବଡମୂଳ ପୂର୍ତ୍ତ ରାସ୍ତାର ରାସଙ୍ଗ, କାଦୁଆ, କଳାପାଟ ପୀଠ, ଛାମୁଣ୍ଡିଆ ନିକଟସ୍ଥ କଶୀନାଳ, ବାରନାଳିଆ, ମୁଦୁଲିଗାଡିଆ, ମଙ୍ଗାନାସୀଠାରେ ରାସ୍ତା ଉପରେ ୨ ଫୁଟର ବନ୍ୟାଜଳ ପ୍ରବାହିତ ହେଉଥିଲା। ରବିବାର ସକାଳେ ଜଳସ୍ତର ଧୀରେ ଧୀରେ କମିବାରେ ଲାଗିଥିଲା। ତେବେ ମଧ୍ୟାହ୍ନ ସମୟରୁ ପୁଣିଥରେ ବୃଦ୍ଧି ପାଇବାରୁ ଉପରୋକ୍ତ ସ୍ଥାନରେ ବନ୍ୟାଜଳ ପ୍ରବାହିତ ହେଉଥିବା ଦେଖାଯାଇଛି। ଲଗାଣ ବର୍ଷା ସାଙ୍ଗକୁ ହୀରାକୁଦ ନଦୀବନ୍ଧରୁ ୨୦ଟି ଗେଟ୍ ଦେଇ ବନ୍ୟାଜଳ ପ୍ରବାହିତ ହେଉଥିବାରୁ ଜଳସ୍ତର ବଢିବାରେ ଲାଗିଛି। ହୀରାକୁଦ ନଦୀବନ୍ଧ ବୁର୍ଲା ଡିଭିଜନର ଗଣିଆ ବ୍ଲକ ବଡମୂଳଠାରେ ଥିବା ଗେଜ୍ ସାଇଟରୁ ମିଳିଥିବା ସୂଚନା ଅନୁଯାୟୀ, ରବିବାର ସକାଳ ୬ଟା ସମୟରେ ମହାନୀର ଜଳସ୍ତର ୩୧ଫୁଟ ରହିଥିଲା। ଏହାର ୬ଘଣ୍ଟା ପରେ ମଧ୍ୟାହ୍ନ ୧୨ଟା ସମୟରେ ଏହା ୩୧ଫୁଟ ୬ଇଞ୍ଚକୁ ବୃଦ୍ଧି ପାଇଥିଲା। ସେହିପରି ଅପରାହ୍ନ ୬ଟା ସୁଦ୍ଧା ୩୨ଫୁଟ ୧୦ ଇଞ୍ଚକୁ ବୃଦ୍ଧି ପାଇଥିଲା। ଏଠାରେ ବିପଦସଙ୍କେତ ୩୫ଫୁଟ ରହିଥିବା ଜଣାପଡିଛି। ଲଗାଣ ବର୍ଷା ଜାରି ରହିଲେ ଗଣିଆ ବ୍ଲକରେ ବଡ ଧରଣର ବନ୍ୟା ପରିସ୍ଥିତି ଉପୁଜିବାର ସମ୍ଭାବନା ରହିଛି। ଗତ ୨ଦିନ ଧରି ବନ୍ୟାଜଳ ରାସଙ୍ଗ, ଛାମୁଣ୍ଡିଆ, ପତୁରିଆ ଆଦି ଗ୍ରାମର ଗହୀର ବିଲରେ ଚାଷ ହୋଇଥିବା ଧାନଗଛ ବୁଡାଇ ରଖିଛି। ସେହିପରି ମହାନଦୀ କୂଳରେ ଚାଷ ହୋଇଥିବା ବିଭିନ୍ନ ପରିବା ଫସଲ ମଧ୍ୟ ବନ୍ୟାପାଣିରେ ବୁଡି ନଷ୍ଟ ହେବାକୁ ବସିଲାଣି। ୨ଦିନ ଧରି ମହାନଦୀର ଜଳସ୍ତର କମିବା ଓ ବଢିବାକୁ ନେଇ ନଦୀକୂଳିଆ ବାସିନ୍ଦାଙ୍କ ମନରେ ଏକପ୍ରକାର ବନ୍ୟା ଆଶଙ୍କା ଦେଖାଦେଇଛି।