ରାହାମା,୬।୧ (ଡି.ଏନ୍.ଏ.): ରାହାମା-ଖୋସାଲପୁର ରାସ୍ତାର ଦେଢ଼ କିଲୋମିଟର ଲମ୍ବ ମହାନଦୀ ପୋଲ ଉପରେ ଷ୍ଟ୍ରିଟ୍ ଲାଇଟ୍ ଲଗାଇବାକୁ ସ୍ଥାନୀୟ ଅଞ୍ଚଳବାସୀ ଦାବି କରିଛନ୍ତି। ଏହି ପୋଲ ଦେଇ ପ୍ରତିଦିନ ହଜାର ହାଜର ଲୋକ ଯା’ଆସ କରୁଛନ୍ତି। ସନ୍ଧ୍ୟା ହେଲେ ପୋଲ ଉପରେ ଅସାମାଜିକଙ୍କ ଆଡ୍ଡା ଜମୁ ଥିବାରୁ ଯାତାୟାତ କରିବା ବେଳେ ଯାତ୍ରୀମାନେ ନାନା ଅସୁବିଧା ଭୋଗୁଛନ୍ତି। ରାହାମା, ପାରାଦୀପ ସମେତ କେନ୍ଦ୍ରାପଡ଼ା ଜିଲାର ପାଟକୁରା, ଗରଦପୁର, ମହାକାଳପଡ଼ା ଓ ମାର୍ଶାଘାଇ ଆଦି ଅଞ୍ଚଳକୁ ଯା’ଆସ ପାଇଁ ଲୋକ ଏହି ପୋଲ ଉପରେ ନିର୍ଭର କରନ୍ତି। ହେଲେ ସନ୍ଧ୍ୟା ପରେ ଏହି ରାସ୍ତା ଦେଇ ଯା’ଆସ କରିବାକୁ ଲୋକେ ଭୟ କରୁଛନ୍ତି। ଅନ୍ୟପଟେ ମଦ୍ୟପମାନେ ଅଧିକାଂଶ ସମୟରେ ପୋଲ ଉପରେ ଯାତ୍ରୀମାନଙ୍କୁ ଗାଳିଗୁଲଜ କରିବା ଓ ମାରିବା ପାଇଁ ଗୋଡ଼ାଉଥିବା ଭଳି ଘଟଣା ମଧ୍ୟ ନଜରକୁ ଆସିଛି। ଏମାନଙ୍କ କବଳରୁ ବଞ୍ଚତ୍ବା ପାଇଁ କେହି କେହି ଦ୍ରୁତ ଗତିରେ ଗାଡ଼ି ନେଇ ଯାଉଥିବା ବେଳେ ଦୁର୍ଘଟଣାର ଶିକାର ହୋଇ ମୃତାହତ ହୋଇଥିବା ନଜିର ନଜିର ରହିଛି। ତେଣୁ ଆଖପାଖ ଅଞ୍ଚଳାବସୀ ଓ ଏହି ରାସ୍ତା ଦେଇ ଯିବାଆସିବା କରୁଥିବା ଲୋକମାନଙ୍କ ସୁରକ୍ଷା ଦୃଷ୍ଟିରୁ ଦେଢ଼ କି.ମି. ଲମ୍ବ ଏହି ମହାନଦୀ ପୋଲ ଉପରେ ଷ୍ଟ୍ରିଟ୍ ଲାଇଟ୍ ଲଗାଯିବା ଆବଶ୍ୟକ ହୋଇପଡ଼ିଛି। ଏଥିସହ ରାତିରେ ପୋଲିସ୍ ପାଟ୍ରୋଲିଂ ପାଇଁ ଅଞ୍ଚଳର ବହୁ ବୁଦ୍ଧିଜୀବୀ ଦାବି କରିଛନ୍ତି।