ଖଣ୍ଡପଡା,୪ା୭ (ସ୍ବ.ପ୍ର.): କଣ୍ଟିଲୋ ନୀଳମାଧବ ଜୀଉ ମନ୍ଦିର ପାଦଦେଶରେ ପ୍ରବାହିତ ମହାନଦୀ ଦକ୍ଷିଣପାର୍ଶ୍ୱ ମାଳବନ୍ଧ ବିଭିନ୍ନ ସମୟରେ କ୍ଷତିଗ୍ରସ୍ତ ହେଉଥିବାରୁ ଏହାର ସୁରକ୍ଷା ପାଇଁ ପଦକ୍ଷେପ ନିଆଯାଉଛି। ଏଥିଲାଗି ଗତ ଜାନୁୟାରୀରୁ ପଥର ପ୍ୟାକିଂ କାମ ଆରମ୍ଭ ହୋଇଛି । ନାବାର୍ଡ ପକ୍ଷରୁ ୨.୮ କୋଟି ଟଙ୍କା ବ୍ୟୟରେ ନିର୍ମିତ ଏହି କାର୍ଯ୍ୟ ଦୂରରୁ ସୁନ୍ଦର ଦିଶୁଛି। ହେଲେ ପଥର ପ୍ୟାକିଂରେ ବ୍ୟବହାର ହୋଇଥିବା ଛୋଟ ଛୋଟ ପଥର ମହାନଦୀର ପ୍ରଥମ ବନ୍ୟାରେ ଭାସିଯିବା ନେଇ ସ୍ଥାନୀୟ ଲୋକେ ଆଶଙ୍କା ପ୍ରକାଶ କରିଛନ୍ତି।
ଏହି ଅନୁଦାନ ଅର୍ଥରେ ନୀଳମାଧବ ମନ୍ଦିରର ଉତ୍ତରପାର୍ଶ୍ୱ ମହାନଦୀ କୂଳରେ ପ୍ରାୟ ୨ଶହ ମିଟର ପଥର ଲଞ୍ଚତ୍ଂ କାର୍ଯ୍ୟ ହେବା ପରେ ସିମେଣ୍ଟ ଗ୍ରାଉଟିଂ କରାଯାଇଛି। ଅପରପକ୍ଷରେ ମନ୍ଦିର ପଶ୍ଚିମପାର୍ଶ୍ୱ ମହାନଦୀ କୂଳ ଓ ଘାଟର ପ୍ରାୟ ୨୧୦ ମିଟର ଡମ୍ପିଂ, ଲଞ୍ଚତ୍ଂ ହେବା ପରେ ପଥର ମଧ୍ୟରେ ରହିଥିବା ବଡ ବଡ ଗର୍ତ୍ତକୁ ଛୋଟ ଛୋଟ ପଥର ଦ୍ୱାରା ଭରି କରାଯାଇଛି ା କିନ୍ତୁ ଏହି କାର୍ଯ୍ୟର ଉପରିଭାଗକୁ ସିମେଣ୍ଟ ଗ୍ରାଉଟିଂ କରାଯାଇ ନାହିଁ। ଫଳରେ ମହାନଦୀର ବନ୍ୟା ସ୍ରୋତରେ ଭାସିଯିବା ସମ୍ଭାବନାକୁ ଏଡାଇ ଦିଆଯାଇ ନ ପାରେ । ସୂଚନାଯୋଗ୍ୟ ଯେ, ମହାନଦୀ ତଟବର୍ତ୍ତୀ ବ୍ରହ୍ମାଦ୍ରୀ ପାହାଡ ଉପରେ ଶ୍ରୀନୀଳମାଧବ ଜୀଉଙ୍କ ମନ୍ଦିର ଅବସ୍ଥିତ। ମହାନଦୀର ପ୍ରଖର ସ୍ରୋତ ସିଧାସଳଖ ଏହି ପାହାଡରେ ମାଡ଼ ହୋଇ ବିଭିନ୍ନ ସମୟରେ ସ୍ରୋତ ଜନିତ ମୃତ୍ତିକା କ୍ଷୟ ହୋଇ ପଥର ଖସିଥାଏ। ନଦୀ ସ୍ରୋତରେ ବଡ ବଡ ପଥର ଖସି ଯାଇଥାଏ। ଏହି ଦୃଷ୍ଟିରୁ ସିମେଣ୍ଟ ଗ୍ରାଉଟିଂ ହୋଇ ନ ଥିବାରୁ ଛୋଟ ଛୋଟ ପଥର ନିଶ୍ଚିତ ଭାସିଯିବ ବୋଲି ସ୍ଥାନୀୟ ଅଧିବାସୀ ଅଭିଯୋଗ କରୁଛନ୍ତି । କାର୍ଯ୍ୟ ଆରମ୍ଭରୁ ଏପରି ନିମ୍ନମାନର କାର୍ଯ୍ୟ ସମ୍ପର୍କରେ ଅଭିଯୋଗ କଲେ ମଧ୍ୟ କେହି କର୍ଣ୍ଣପାତ କରୁ ନ ଥିବା ଜଣାଯାଇଛି । ଅପରପକ୍ଷରେ ଏହି କାର୍ଯ୍ୟ ଚାଲିଥିବା ବେଳେ ଜଳସମ୍ପଦ ବିଭାଗୀୟ ସର୍ବୋଚ୍ଚ ଯନ୍ତ୍ରୀ, ଅଧୀକ୍ଷଣ ଯନ୍ତ୍ରୀ, ନିର୍ବାହୀ ଯନ୍ତ୍ରୀ ବିଭିନ୍ନ ସମୟରେ ପରିଦର୍ଶନ କରି ସିମେଣ୍ଟ ଗ୍ରାଉଟିଂ କରିବା ସମ୍ପର୍କରେ ଅନୁକୂଳ ମତ ପ୍ରଦାନ କରିଥିଲେ। ଏହାସହ ନଦୀ ଘାଟକୁ ଯିବା ରାସ୍ତାରେ ଆବଶ୍ୟକ ପଥର କାର୍ଯ୍ୟ କରି କିପରି ସୁବିଧାରେ ପର୍ଯ୍ୟଟକ, ସ୍ଥାନୀୟ ଅଞ୍ଚଳର ଜନସାଧାରଣ ଯାଇପାରିବେ ସେପରି କାର୍ଯ୍ୟ କରିବାକୁ କାର୍ଯ୍ୟନିର୍ବାହୀଙ୍କୁ ପରାମର୍ଶ ଦେଇଥିଲେ। ହେଲେ ସମ୍ପୃକ୍ତ କାର୍ଯ୍ୟନିର୍ବାହୀ ଏ ଦିଗରେ ଅବହେଳା ପ୍ରଦର୍ଶନ କରୁଥିବା ଅଭିଯୋଗ ହେଉଛି ା ଏ ସମ୍ପର୍କରେ ସହକାରୀ ଯନ୍ତ୍ରୀ ଶଙ୍କର ଦଳେଇଙ୍କୁ ପଚାରିବାରୁ ସେ କହିଥିଲେ, ମହାନଦୀର ବନ୍ୟା ଆସିବା ପରେ ଉକ୍ତ ପଥର କାର୍ଯ୍ୟର ଅବସ୍ଥା କିପରି ରହୁଛି, କ୍ଷୟକ୍ଷତି ହେଉଛି କି ନାହିଁ ତାହା ଲକ୍ଷ୍ୟ କରିବା ପରେ ବିହିତ ପଦକ୍ଷେପ ଗ୍ରହଣ କରାଯିବ। ସେହିପରି ନଦୀଘାଟକୁ ଯିବା ରାସ୍ତାର ଆବଶ୍ୟକ କାର୍ଯ୍ୟ ସମ୍ପାଦନ କରିବାକୁ ସମ୍ପୃକ୍ତ କାର୍ଯ୍ୟନିର୍ବାହୀଙ୍କୁ କୁହାଯାଇଛି ବୋଲି ଦଳେଇ ପ୍ରକାଶ କରିଛନ୍ତି। ଦୀର୍ଘବର୍ଷରୁ ଉକ୍ତ ମାଳବନ୍ଧ ତଥା ନଦୀକୂଳର ସୁରକ୍ଷା ସହିତ ପର୍ଯ୍ୟଟକମାନଙ୍କ ମହାନଦୀରେ ସୁରକ୍ଷିତ ସ୍ନାନ ପାଇଁ ପଦକ୍ଷେପ ଗ୍ରହଣ କରାଯିବାକୁ ଦାବି ହୋଇଆସୁଥିଲା।