ମହାନଦୀ ଶଯ୍ୟାରେ ବିଦେଶାଗତ ପକ୍ଷୀଙ୍କ ଭିଡ଼: ଠାବହେଲା ବିରଳ ପକ୍ଷୀ କମନ୍‌ ମରଗାନସର

ସୋନପୁର,୨୬ା୧୨(ନି.ପ୍ର.): ବର୍ତ୍ତମାନ ଶୀତଦିନରେ ଦେଶ ତଥା ଦେଶ ବାହାରର ପକ୍ଷୀଙ୍କ ପାଇଁ ଚିରସ୍ରୋତା ମହାନଦୀ ପାଲଟିଛି ଜଳନିବାସ। ପ୍ରଚଣ୍ଡ ଶୀତରେ ସେଠାକାର ପରିବେଶରେ ବରଫ ପଡୁଥିବାରୁ ବିଦେଶରୁ ପକ୍ଷୀମାନେ ଏଠାକୁ ଚାଲି ଆସୁଛନ୍ତି ସ୍ବଚ୍ଛନ୍ଦରେ ରହିବାକୁ। ଦେଶ ତଥା ବିଦେଶର ପକ୍ଷୀଙ୍କ ଆଗମନ ବଢିବା ଯୋଗୁ ପ୍ରାକୃତିକ ସୌନ୍ଦର୍ଯ୍ୟ ଏବେ ବୃଦ୍ଧି ପାଇଛି। ଗତ ରବିବାର ସୋନପୁର ସହର ଉପକଣ୍ଠ ମହାନଦୀର ଶରଧାପାଲି ନିକଟସ୍ଥ ଜଳରାଶିରେ ୪ ବିରଳ ପକ୍ଷୀ କମନ ମରଗାନସର(ବୈଜ୍ଞାନିକ ନାମ ମରଗସ ମରଗନସର) ଠାବ ହୋଇଛନ୍ତି। ଏହି ପକ୍ଷୀ ଉତ୍ତର ଆମେରିକା ଓ ପୂର୍ବ ୟୁରୋପରେ ପ୍ରାୟତଃ ଦେଖା ଯାଆନ୍ତି। ଓଡିଶାରେ କମନ ମରଗାନସର ଠାବ ହେବା ପ୍ରଥମ ବୋଲି କହିଛନ୍ତି ପକ୍ଷୀ ସମ୍ପର୍କରେ ଗବେଷଣା କରୁଥିବା ସୋନପୁରର ଦୀନେଶ ରଞ୍ଜନ ମିଶ୍ର ଏବଂ ଓମ୍‌ପ୍ରକାଶ ରାଉତ। ସେହିପରି ମହାନଦୀ ଓ ତେଲନଦୀର ସଙ୍ଗମସ୍ଥଳ ରାମେଶ୍ୱର ତଳି ଅଞ୍ଚଳ ନଦୀ ବାଲିରେ ମଙ୍ଗଳବାର ବହୁସଂଖ୍ୟକ ବ୍ଲାକ ବେଲିଡ୍‌ ଟର୍ନ ନାମକ ବିଦେଶୀ ପକ୍ଷୀ ଦେଖାଯାଇଥିଲେ। ବିଦେଶୀ ପକ୍ଷୀମାନେ ଏବେ ସୁବର୍ଣ୍ଣପୁର ଜିଲା ଦେଇ ପ୍ରବାହିତ ହେଉଥିବା ନଦୀର ଜଳରାଶିରେ ବିଚରଣ କରିବା ସହିତ ଉଡି ବୁଲୁଛନ୍ତି।
ପୂର୍ବରୁ ମାଛ ମାରିବା ପାଇଁ ମହାନଦୀରେ ବ୍ଲାଷ୍ଟିଂ ଓ କୀଟନାଶକ ପ୍ରୟୋଗ ଯୋଗୁ ଜଳ ପ୍ରଦୂଷିତ ହେଉଥିଲା। ପକ୍ଷୀ ଶିକାରୀଙ୍କ ପ୍ରାଦୁର୍ଭାବ ଯୋଗୁ ଏଭଳି ବିରଳ ପକ୍ଷୀ ଅଦୃଶ୍ୟ ହୋଇ ଯାଇଥିଲେ। ପ୍ରକୃତିର ବିବର୍ତ୍ତନ ସହ ନିଜକୁ ଖାପ ଖୁଆଇ ନ ପାରି କେତେକ ପକ୍ଷୀ ବର୍ତ୍ତମାନ ଇତିହାସ ପୃଷ୍ଠାରେ ସ୍ଥାନ ପାଇ ସାରିଥିବା ବେଳେ ବର୍ତ୍ତମାନ କିଛି ବିରଳ ପକ୍ଷୀ ବଞ୍ଚତ୍ବାକୁ ସଂଗ୍ରାମ କରୁଛନ୍ତି। ତେବେ ମହାନଦୀ ଜଳରାଶିକୁ ପ୍ରଦୂଷଣମୁକ୍ତ କରିବା ପାଇଁ ବିଭିନ୍ନ ସମୟରେ ସଚେତନତା କାର୍ଯ୍ୟକ୍ରମ ଗ୍ରହଣ ଫଳରେ ପ୍ରଦୂଷଣ କମିଛି। ଶିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଯୋଗୁ ପକ୍ଷୀ ଶିକାର ମଧ୍ୟ ଅନେକ ମାତ୍ରାରେ ହ୍ରାସ ପାଇଛି। ଫଳରେ ଚଳିତବର୍ଷ ଜଳରାଶିରେ ବିଚରଣ କରିବା ପାଇଁ ରାଜ୍ୟ ଓ ଦେଶ ବାହାରର ବିଭିନ୍ନ ପ୍ରଜାତିର ଶତାଧିକ ପକ୍ଷୀଙ୍କ ଭିଡ ଜମିଲାଣି। ବର୍ତ୍ତମାନ ୟୁରୋପ ମହାଦେଶରୁ ଆସିଥିବା ରୁଡିସଲଡକ, ପୂର୍ବମହାଦେଶର ରୋଜିଷ୍ଟୋଲିଙ୍ଗ, ଭଡିଟର ଫ୍ଲାଏକେଚର, ରେଡକ୍ରେଷ୍ଟେଟ୍‌, ପୋଚାର୍ଡ, ଲିଟିଲଗ୍ରେବ, ବ୍ଲାକ ବେଲିଡ୍‌ ଟର୍ନ, ପେଲିକାନପେରି ଭଳି ପ୍ରମୁଖ ବିରଳ ପକ୍ଷୀମାନଙ୍କର ବିଚରଣ ମହାନଦୀର ଶୋଭା ବଢାଇଛି। ବିଦେଶାଗତ ପକ୍ଷୀଙ୍କ ଆଗମନ ପର୍ଯ୍ୟଟକ ଓ ସ୍ଥାନୀୟ ଜନସାଧାରଣଙ୍କୁ ଆକର୍ଷିତ କରିଛି। ଯୁବ ପକ୍ଷୀ ଗବେଷକ ଦୀନେଶ ଏବଂ ଓମ୍‌ପ୍ରକାଶ କୁହନ୍ତି ବ୍ଲାକ ବେଲିଡ୍‌ ଟର୍ନ ନାମକ ପକ୍ଷୀ ବର୍ତ୍ତମାନ ଇଣ୍ଟରନ୍ୟାଶନାଲ ୟୁନିୟନ ଅଫ୍‌ କଞ୍ଜରଭେସନ ଅଫ୍‌ ନେଚର ଦ୍ୱାରା ଏକ ବିରଳ ପକ୍ଷୀ ଭାବରେ ସ୍ଥାନ ପାଇଛି। ଯାହାକି ବର୍ତ୍ତମାନ ସୋନପୁରସ୍ଥିତ ମହାନଦୀରେ ଏହା ଦେଖିବାକୁ ମିଳୁଛନ୍ତି। ତେଣୁ ଏମାନଙ୍କ ସୁରକ୍ଷା ପାଇଁ ନଦୀଗର୍ଭରୁ ଟ୍ରକ୍‌, ଟ୍ରାକ୍ଟରମାନଙ୍କରେ ବାଲି ଓ ଅବାଧ ପଥର ଚାଲାଣ ବନ୍ଦ କରିବାର ଆବଶ୍ୟକତା ରହିଛି। ସେହିଭଳି ଶୀତଦିନରେ ପକ୍ଷୀମାନେ ବାଲି ଓ ପଥର କୋରଡରେ ଅଣ୍ଡା ଦେଉଥିବାରୁ ସେଭଳି ଅଞ୍ଚଳକୁ ମଣିଷର ପ୍ରବେଶ କିମ୍ବା ହସ୍ତକ୍ଷେପ ବନ୍ଦ ହେବା ଜରୁରୀ। ମହାନଦୀର ଜଳକୁ ପ୍ରଦୂଷଣମୁକ୍ତ କରିବା ପାଇଁ ବ୍ୟାପକ ଜନସଚେତନତା ଆବଶ୍ୟକ ବୋଲି ମତପ୍ରକାଶ ପାଉଛି।