ପୁରୀ ଅଫିସ,୧୪।୩: ମହାପ୍ରଭୁଙ୍କ ସମ୍ପତ୍ତିକୁ ନେଇ ଏବେ ଚାଲିଛି ଟଣାଓଟରା। କିଏ ଠାକୁରଙ୍କ ଅମୃତମଣୋହି ସମ୍ପତ୍ତି ମାଡ଼ି ବସିଛନ୍ତି ତ ଆଉ କେହି ବ୍ୟକ୍ତିଗତ ଫାଇଦା ହାସଲ କରି ମହାପ୍ରଭୁଙ୍କ ଟଙ୍କାଙ୍କୁ ଅନିଶ୍ଚିତତା ଭିତରକୁ ଠେଲି ଦେଇଛନ୍ତି। ସେହିପରି ଅନେକ ବଡ଼ବଡ଼ିଆ ଅଛନ୍ତି ଯେଉଁମାନେ ଶ୍ରୀଜଗନ୍ନାଥଙ୍କ ସମ୍ପତ୍ତି ଜାଣିସୁଦ୍ଧା ଜବରଦଖଲ କରିବାକୁ କୁଣ୍ଠାବୋଧ କରି ନାହାନ୍ତି। ହେଲେ ଏମିତି କିଛି ମଣିଷ ଅଛନ୍ତି ଯେଉଁମାନେ ମହାପ୍ରଭୁଙ୍କୁ ସବୁକିଛି ଦେଇଦେବାକୁ ଆଗେଇ ଆସୁଛନ୍ତି। ଏହିପରି ଜଣେ ଭକ୍ତ ହେଉଛନ୍ତି ଆସାମର ରାମେଶ୍ୱରୀ ଦେବୀ (୬୫)। ଶ୍ରୀଜଗନ୍ନାଥଙ୍କୁ ତାଙ୍କ ସମ୍ପତ୍ତି ଏବଂ ଘର ଦାନ ଦେବା ଲାଗି ଶୁକ୍ରବାର ଶ୍ରୀମନ୍ଦିର ପ୍ରଶାସନକୁ ଜଣାଇଛନ୍ତି।
ଆସାମ ସୁନୀତପୁର ସହର ତେଜପୁର ନିବାସୀ ରାମେଶ୍ୱରୀ ଦେବୀ। ଶ୍ରୀଜଗନ୍ନାଥଙ୍କ ପ୍ରତି ତାଙ୍କର ରହିଛି ଅଖଣ୍ଡ ବିଶ୍ୱାସ ଓ ଭକ୍ତି। ୨୦୧୧ ଫେବୃୟାରୀରେ ସେ ପୁରୀ ଆସିଥିଲେ। ମହାପ୍ରଭୁଙ୍କୁ ଦର୍ଶନ କରିବାବେଳେ ବେଶ୍ ଭାବବିହ୍ବଳ ହୋଇପଡିଥିଲେ। ଦୁନିଆ ତାଙ୍କୁ ତୁଚ୍ଛ ଲାଗିଥିଲା। ସବୁକିଛି ମୋର ବୋଲି ଲୋକେ ଯାହା କହୁଛନ୍ତି ତା’ର ମାନେ କିଛି ନାହିଁ ବୋଲି ସେଦିନ ରାମେଶ୍ୱରୀଙ୍କ ହୃଦ୍ବୋଧ ହୋଇଥିଲା। ଆଉ ଠାକୁରଙ୍କୁ ପ୍ରଣାମ କରିବା ସମୟରେ ତାଙ୍କର ସମ୍ପତ୍ତି ଶ୍ରୀଜଗନ୍ନାଥଙ୍କୁ ଦାନ କରିବା ଲାଗି ନିଷ୍ପତ୍ତି ନେଇଥିଲେ। ପ୍ରାୟ ଦେଢବର୍ଷ ହେବ ସେ ଆସି ପୁରୀରେ ରହୁଛନ୍ତି। ପ୍ରଥମେ ଆସାମ ଭବନରେ ରହୁଥିଲେ। ସୁରକ୍ଷା ଜୋନରେ ଥିବା ଏହି ଭବନ ଭଙ୍ଗାଯିବା ପରେ ଏବେ ବାଗେଡ଼ିଆ ଧର୍ମଶାଳାରେ ରହୁଛନ୍ତି ରାମେଶ୍ୱରୀ। ମହାପ୍ରଭୁଙ୍କୁ ତାଙ୍କର ସମ୍ପତ୍ତି ଦାନ ଦେବା ନେଇ ଶୁକ୍ରବାର ଶ୍ରୀମନ୍ଦିର ନୀତି ପ୍ରଶାସକ ଜିତେନ୍ଦ୍ର କୁମାର ସାହୁଙ୍କୁ ସାକ୍ଷାତ୍ କରିଥିଲେ। ମନ୍ଦିର ପ୍ରଶାସନ ପକ୍ଷରୁ ତାଙ୍କ ସମ୍ପତ୍ତିର କାଗଜପତ୍ର ଯାଞ୍ଚ କରାଯିବା ପରେ ପଦକ୍ଷେପ ନିଆଯିବ ବୋଲି ନୀତି ପ୍ରଶାସକ ତାଙ୍କୁ କହିଥିଲେ। ଜଣେ ଆଇନଜୀବୀଙ୍କୁ ସାଥୀରେ ଆଣି ଏସବୁ କରିବେ ବୋଲି କହିଛନ୍ତି ରାମେଶ୍ୱରୀ। ତେବେ ଯେଉଁଠି ମହାପ୍ରଭୁଙ୍କ ସମ୍ପତ୍ତି ମାଡ଼ିବସିବା ପାଇଁ ଲୋକଙ୍କ ମଧ୍ୟରେ ବ୍ୟଗ୍ରତା ପ୍ରକାଶ ପାଉଛି ସେଭଳିସ୍ଥଳରେ ରାମେଶ୍ୱରୀ ସମ୍ପତ୍ତି ଦାନ ପାଇଁ ଆଗେଇ ଆସିବା ନିଶ୍ଚିତ ବଡ଼ କଥା ବୋଲି କୁହାଯାଉଛି।