ମହାପ୍ରଭୁ ଶ୍ରୀଜଗନ୍ନାଥଙ୍କ ସୈରାତ ନିଲାମ: ଚୋରି ପାଇଁ ପ୍ରଶ୍ରୟ ଦେଲା ପ୍ରଶାସନ

ଖୋର୍ଦ୍ଧା ଅଫିସ,୨୮।୭: ମହାପ୍ରଭୁ ଶ୍ରୀଜଗନ୍ନାଥଙ୍କର ସୈରାତକୁ ନିଲାମରେ ନେଇ ଲୁଟ୍‌ ପାଇଁ ପ୍ରତିଯୋଗିତା ଚାଲିଛି। ସୈରାତ ନିଲାମ କରି କୋଟି କୋଟି ଟଙ୍କାର ରାଜସ୍ବ ହଡପ ହେଉଛି। ଚୋରି କରି ବଡ ହେବାକୁ ମନ୍ଦିର ପ୍ରଶାସନ ଦେଉଛି ସୁଯୋଗ। ହାତଛଡା କରିନାହାନ୍ତି ଖଣି ଓ କ୍ରଶର ମାଲିକ। ହେଲେ କ୍ରାଇମବ୍ରାଞ୍ଚର ଏସ୍‌ଟିଏଫ୍‌ ଚଢ଼ାଉ ପରେ ଲୁଟ୍‌ରେ ଲଗାମ ଲାଗିଛି। ଖଣି ଖନନ ଓ କ୍ରଶର ବନ୍ଦ ହୋଇଯାଇଛି। ଏସ୍‌ଟିଏଫ୍‌ ହାତରେ ଲାଗିଛି ଅନିୟମିତତାର ଫାଇଲ୍‌। ଅନିୟମିତତାର ଫାଇଲକୁ ଶୀତଳଭଣ୍ଡାରରେ ଫୋପାଡିବାକୁ ପ୍ରୟାସ ଆରମ୍ଭ ହୋଇଯାଇଛି। ମୁକୁଳିବା ପାଇଁ ଖଣି ଓ କ୍ରଶର ମାଲିକ ଛାନିଅଁା ହୋଇ ରାଜନେତାଙ୍କ ଶରଣରେ ପଶିଛନ୍ତି।
ମହାପ୍ରଭୁ ଶ୍ରୀଜଗନ୍ନାଥଙ୍କର ଖୋର୍ଦ୍ଧା ସବ୍‌ଡିଭିଜନ ଅନ୍ତର୍ଗତ ଖୋର୍ଦ୍ଧା, ବେଗୁନିଆ, ଟାଙ୍ଗୀ ତହସିଲରେ ୭୩ଟି ସୈରାତ୍‌ ରହିଛି। ଏଥିରୁ ୨୦୧୫ରେ ୫ ବର୍ଷ ପାଇଁ ୧୮ଟି ସୈରାତ୍‌ ନିଲାମ ହୋଇଥିଲା। ତେବେ କେହି ୱାର୍କ ଅର୍ଡର କି ୱାଇ ଫର୍ମ ପାଇ ନ ଥିଲେ। ତେବେ ୱାଇ ଫର୍ମ ନ ଥାଇ ସରକାରୀ ନୀତି ନିୟମକୁ ଶୀତଳଭଣ୍ଡାରକୁ ଫୋପାଡି ଖଣି ଖନନ କରାଗଲା। କ୍ରଶରରେ ବେଆଇନ ଭାବେ ବଜୁରି, ଚିପ୍‌ସ ଓ ଡଷ୍ଟ ଗୁଣ୍ଡକୁ କରାଯାଇ ବାହାରକୁ ଚୋରାଚାଲାଣ କରାଗଲା। ପ୍ରାୟ ୩ ବର୍ଷ ଧରି ଏ ପ୍ରକ୍ରିୟା ଚାଲୁ ରହିଲା। ଅଭିଯୋଗ, ପ୍ରତିବାଦ ଓ ଗଣମାଧ୍ୟମରେ ଖବର ପ୍ରସାରଣ ପରେ ମଧ୍ୟ ସୁଫଳ ମିଳି ନ ଥିଲା। ଗୁଣ୍ଡାଗିରି, ମାରପିଟ୍‌, ଧମକଚମକ ଦେଇ ଦିନ ଦ୍ୱିପ୍ରହରରେ ପାହାଡକୁ ବ୍ଲାଷ୍ଟିଂ କରାଗଲା। ଜିଲାପାଳଙ୍କ କାର୍ଯ୍ୟାଳୟ ଦେଇ ବଜୁରି, ଚିପିସ୍‌, ଡଷ୍ଟ ଗୁଣ୍ଡ ଅବାଧରେ ଚୋରା ଚାଲାଣ ହେଲା। ପ୍ରଶାସନର ସହଯୋଗ ଓ ରାଜନେତାଙ୍କର ଆଶୀର୍ବାଦ କାରଣରୁ ସବୁ କିଛି ଠିକ୍‌ ଠାକ୍‌ ଚାଲିଲା। ୩ ବର୍ଷର ଲୁଟ୍‌ର ଅନିୟମିତତାକୁ ଯାଞ୍ଚ କରାଗଲେ ଅନେକ ଗୁମର ଖୋଲିବ। ପରେ ୨୦୧୮ରେ ପୁଣି ୪୨ ସୈରାତ୍‌କୁ ୧୦ ବର୍ଷ ପାଇଁ ନିଲାମ ଦିଆଗଲା। ହେଲେ ପୂର୍ବଧାରାରେ ୱାର୍କ ଅର୍ଡର ନ ଦେଇ ପୁଣି ଲୁଟ୍‌ ଚାଲିଲା। ବିଭିନ୍ନ ଗ୍ରାମବାସୀ ଜିଲାପାଳ, ଉପଜିଲାପାଳ, ତହସିଲଦାରଙ୍କୁ ଭେଟି ଅଭିଯୋଗ କରିଥିଲେ ମଧ୍ୟ କିଛି ସୁଫଳ ମିଳି ନ ଥିଲା। ପ୍ରଶାସନ ବା ରାଜନୈତିକ କ୍ଷେତ୍ରରେ ହେଉ ତଳସ୍ତରରୁ ଉପରସ୍ତର ପର୍ଯ୍ୟନ୍ତ ଏହି ବେଆଇନ କାର୍ଯ୍ୟରେ ହାତଗୁଞ୍ଜା ପାଉଥିବାରୁ ସବୁ କିଛି ଶୀତଳଭଣ୍ଡାରକୁ ପୁଣି ଚାଲିଗଲା। ପୁଣି ପୂର୍ବବତ ଲୁଟ୍‌ ଚାଲିଲା। ହେଲେ ଏସ୍‌ଟିଏଫର ଚଢ଼ାଉ ସବୁ କିଛି ବିଗାଡି ଦେଲା। ଏସ୍‌ଟିଏଫର ଧରପଗଡ ପରେ ପ୍ରଶାସନ ପକ୍ଷରୁ ତରବରିଆ ଭାବେ ୬ଟି ପାହାଡ ୱାର୍କ ଅର୍ଡର ପାଇଥିଲେ। ପରେ ୱାଇ ଫର୍ମ ବି ଯୋଗାଇ ଦିଆଗଲା ।