କଟକ ଅଫିସ,୩୦ା୫-ଲକ୍ଡାଉନ୍ ଯୋଗୁ ପୁରୀ ଶ୍ରୀମନ୍ଦିରରେ ଭକ୍ତଙ୍କ ପ୍ରବେଶ ଉପରେ କଟକଣା ଲାଗିଛି। ମହାପ୍ରସାଦ ବିକ୍ରି ମଧ୍ୟ ବନ୍ଦ ରହିଛି। ତେବେ ମହାପ୍ରସାଦର ହୋମ୍ ଡେଲିଭରି ବ୍ୟବସ୍ଥା କରିବା ପାଇଁ ଶ୍ରୀଜଗନ୍ନାଥ ମନ୍ଦିର ପ୍ରଶାସନର ମୁଖ୍ୟ ପ୍ରଶାସକଙ୍କୁ ନିର୍ଦ୍ଦେଶ ଦେବାକୁ ହାଇକୋର୍ଟରେ ଏକ ଜନସ୍ବାର୍ଥ ମାମଲା ରୁଜୁ ହୋଇଛି। ପୁରୀ ନିବାସୀ ବିଭୁଦତ୍ତ ପଟ୍ଟନାୟକ, ଭବାନୀ ଶଙ୍କର ଆଚାର୍ଯ୍ୟ ଓ ବିଶ୍ୱଜିତ ପଣ୍ଡା ଏହି ମାମଲା କରିଛନ୍ତି।
ସେମାନେ ଦର୍ଶାଇଛନ୍ତି ଯେ, ଲକ୍ଡାଉନ୍ ପର୍ଯ୍ୟାୟରେ ବର୍ତ୍ତମାନ ପାର୍ସଲ ଦେବା ପାଇଁ ରେଷ୍ଟୁରାଣ୍ଟ ଓ ହୋଟେଲ୍ଗୁଡ଼ିକୁ ଅନୁମତି ମିଳିଛି। ବିଭିନ୍ନ ସଂସ୍ଥା ଜରିଆରେ ମଦ ହୋମ୍ ଡେଲିଭରି ପାଇଁ ଅବକାରୀ କମିଶନର ଅନୁମତି ଦେଇଛନ୍ତି। ଅନ୍ୟପକ୍ଷରେ ବ୍ରତ, ନିର୍ବନ୍ଧ, ଦଶାହ, ଶ୍ରାଦ୍ଧ ଓ ଅନ୍ୟ କାର୍ଯ୍ୟ ପାଇଁ ଶ୍ରୀମନ୍ଦିରର ମହାପ୍ରସାଦ ଆବଶ୍ୟକ ପଡୁଛି। ସୀମିତ ସଂଖ୍ୟକ ଲୋକଙ୍କୁ ନେଇ ବିବାହ ଓ ଶୁଦ୍ଧକାର୍ଯ୍ୟ ପାଇଁ ସରକାର ଅନୁମତି ଦେଇଥିବା ବେଳେ ସେମାନେ ମହାପ୍ରସାଦ ନ ପାଇ ହଇରାଣ ହେଉଛନ୍ତି। ସରକାରଙ୍କ ଗାଇଡ୍ଲାଇନ୍ ଅନୁଯାୟୀ, ଶ୍ରୀମନ୍ଦିରରେ ମହାପ୍ରସାଦ ରୋଷେଇ ହୋଇପାରିବ। ଭକ୍ତଙ୍କୁ ମହାପ୍ରସାଦ ଯୋଗାଇଦେଇ ସେମାନଙ୍କ ଧାର୍ମିକ ବିଶ୍ୱାସକୁ ସୁରକ୍ଷା ଦେବା ସରକାରଙ୍କ କର୍ତ୍ତବ୍ୟ। ତେଣୁ ଏହାର ହୋମ୍ ଡେଲିଭରି ପାଇଁ ଅନୁମତି ଦିଆଯାଇପାରିବ। ଭକ୍ତମାନେ ଆଗୁଆ ଅର୍ଡର ଦେଲେ ତଦନୁଯାୟୀ ମହାପ୍ରସାଦ ପ୍ରସ୍ତୁତ ହେବ। ଉଭୟ ଅବଢ଼ା ଓ ଶୁଖିଲା ଭୋଗ ଯୋଗାଇବା ପାଇଁ ଏହି ଅନୁମତି ଦେବାକୁ ନିବେଦନ କରାଯାଇଛି। ଏହି ମାମଲାରେ ରାଜ୍ୟ ସରକାର, ଶ୍ରୀମନ୍ଦିର ମୁଖ୍ୟ ପ୍ରଶାସକ ଓ ପୁରୀ ଜିଳାପାଳଙ୍କୁ ପକ୍ଷଭୁକ୍ତ କରାଯାଇଛି।