ବାରିପଦା ଅଫିସ, ୧୭ା୪-ମହାମାରୀ କରୋନା ଏବେ ବିଶ୍ୱରେ ଆତଙ୍କ ସୃଷ୍ଟି କରିଛି। ଏହି ସଂକ୍ରମଣକୁ କିପରି ରୋକାଯାଇପାରିବ ସେନେଇ ସମସ୍ତେ ଚେଷ୍ଟିତ। ହିନ୍ଦୁ ପରମ୍ପରା ଅନୁଯାୟୀ ଯେତେବେଳେ ମାନବସମାଜ ବିପଦରେ ପଡ଼େ ସେହି ସମୟରେ ପ୍ରଭୁଙ୍କ ଶରଣାପନ୍ନ ହୋଇଥାଏ। ମହାମାରୀ କବଳରୁ ଜୀବଜଗତକୁ ରକ୍ଷା କରିବା ପାଇଁ ମହାପ୍ରଭୁ ମନ୍ଦିରରୁ ବାହାରକୁ ବାହାରି ଆସିଥାନ୍ତି। ଦୀର୍ଘ ବର୍ଷ ହେବ ରହି ଆସିଥିବା ଏହି ବିଶ୍ୱାସ ଓ ପରମ୍ପରାର ପ୍ରତିଫଳନ ମୟୂରଭଞ୍ଜ ଜିଲା ବାରିପଦାଠାରେ ଦେଖିବାକୁ ମିଳିଛି। ଏଠାକାର ହରି ବଳଦେବଜୀଉ ମନ୍ଦିରରେ ପୂଜା ପାଉଥିବା ଶ୍ରୀସୁଦର୍ଶନ ମହାପ୍ରଭୁ ସମାଜର ମଙ୍ଗଳ ନିମନ୍ତେ ଶୁକ୍ରବାର ମନ୍ଦିରରୁ ବାହାରି ନଗର ପରିକ୍ରମା କରିଛନ୍ତି। ଦୀର୍ଘ ୨୦୦ବର୍ଷରୁ ଊର୍ଦ୍ଧ୍ୱ ହେବ ରାଜତନ୍ତ୍ର ସମୟରେ ବିଶ୍ୱରେ ଦେଖାଦେଇଥିବା ମହାମାରୀର ମୂଳପୋଛ ନିମନ୍ତେ ଜଗନ୍ନାଥଙ୍କ ପ୍ରତିନିଧି ଭାବେ ଶ୍ରୀ ସୁଦର୍ଶନ ମହାପ୍ରଭୁ ମନ୍ଦିରରୁ ବାହାରି ରାଜଉଆସକୁ ଯାଇଥିବା କଥିତ ରହିଛି। ବର୍ତ୍ତମାନ ପରିସ୍ଥିତିରେ ବିଶ୍ୱ ମହାମାରୀ କରୋନା ଦାଉରୁ ସମାଜକୁ ବଞ୍ଚାଇବା ପାଇଁ ଜଗତର ନାଥ ଜଗନ୍ନାଥଙ୍କଠାରୁ ଆଜ୍ଞାମାଳ ନେଇ ପାଟ ପଟୁଆର ସହ ମନ୍ଦିରରୁ ବାହାରି ଶ୍ରୀ ସୁଦର୍ଶନ ମହାପ୍ରଭୁ ପୁରୁଣା ରାଜଉଆସକୁ ବିଜେ କରିଥିଲେ। ସେଠାରେ ମହାପ୍ରଭୁଙ୍କ ବିଧିବଦ୍ଧ ପୂର୍ଜାଚ୍ଚନା କରାଯାଇଥିଲା। ପରେ ଶ୍ରୀ ସୁଦର୍ଶନ ମହାପ୍ରଭୁଙ୍କ ବିଗ୍ରହ ମନ୍ଦିରକୁ ପ୍ରତ୍ୟାବର୍ତ୍ତନ କରିଥିଲେ। ପୂର୍ବରୁ ବିଶ୍ୱାସ ରହିଥିବା ଏହି ପୂର୍ଜାଚ୍ଚନା ଦ୍ୱାରା ମାନବ ସମାଜକୁ ପୁଣି ଥରେ ସୁସ୍ଥ କରି ମହାମାରୀ କରୋନା ପ୍ରଭାବରୁ ଲୋକମାନଙ୍କୁ ମୁକ୍ତି ମିଳିବ ବୋଲି ଜଗନ୍ନାଥ ମନ୍ଦିରର ବଡ଼ପଣ୍ଡା ଅରୁଣ କୁମାର ମିଶ୍ର ପ୍ରକାଶ କରିଛନ୍ତି। ଉପଜିଲାପାଳ ତଥା ଦେବୋତ୍ତର ନିର୍ବାହୀ ଅଧିକାରୀ ବସନ୍ତ କୁମାର ସେଠୀଙ୍କ ସମେତ ଅନ୍ୟାନ୍ୟ ଅଧିକାରୀମାନଙ୍କ ଉପସ୍ଥତିରେ ସମାଜିକ ଦୂରତା ପାଳନ କରାଯାଇ ପୂଜା ବିଧି ସମ୍ପନ୍ନ କରାଯାଇଥିଲା।