ମୁମ୍ବାଇ,୧୨।୧୧: ମହାରାଷ୍ଟ୍ରରେ ରାଜନୈତିକ ସଙ୍କଟ ଘନେଇବାରେ ଲାଗିଛି। ଫଳରେ ରାଷ୍ଟ୍ରପତି ଶାସନ ଏକ ମାତ୍ର ବିକଳ୍ପ ରହିଥିବା କୁହାଯାଉଛି। ଭାଜପା ସରକାର ଗଠନରୁ ଓହରିବା ପରେ ରାଜ୍ୟପାଳ ଭଗତ ସିଂ କୋଶୟାରୀ ଶିବସେନାକୁ ସରକାର ଗଠନ ପାଇଁ ଆମନ୍ତ୍ରଣ କରିଥିଲେ। ତେବେ ଶିବସେନା ବିଧାୟକଙ୍କ ସମର୍ଥନ ପାଇଁ ସମୟ ମାଗିଥିଲେ। ମାତ୍ର ଏହାକୁ ରାଜ୍ୟପାଳ ମନା କରିଥିଲେ। ଏହାପରେ ଏନ୍ସିପିକୁ ସରକାର ଗଠନ ଲାଗି ରାଜ୍ୟପାଳ ଆମନ୍ତ୍ରଣ କରିଥିଲେ। ରାଜ୍ୟର ୪ ପ୍ରମୁଖ ରାଜନୈତିକ ଦଳଙ୍କ ପାଖରେ ସରକାର ଗଠନ ପାଇଁ ଆବଶ୍ୟକ କୁହୁକ ସଂଖ୍ୟା ୧୪୫ ନାହିଁ। ତେଣୁ ମେଣ୍ଟ ସରକାର ଗଠନ ହିଁ ଏକ ମାତ୍ର ବାଟ। ତେବେ ଭାଜପା-ଶିବସେନା ମଧ୍ୟରେ ଫାଟ ସୃଷ୍ଟି ହୋଇଥିବାରୁ ରାଜ୍ୟରେ ସଙ୍କଟ ବଢ଼ି ଚାଲିଛି। ଶିବସେନା ଏନ୍ସିପି ଏବଂ କଂଗ୍ରେସ ସହଯୋଗରେ ସରକାର ଗଠନ କରିବାକୁ ଉଦ୍ୟମ କରୁଥିବାବେଳେ କେତେକ ସମସ୍ୟା ଯୋଗୁ ଏହା ମଧ୍ୟ ସମ୍ଭବ ହୋଇପାରୁନାହିଁ।