ମୁମ୍ବାଇ,୫।୧୧: ମହାରାଷ୍ଟ୍ର ବିଧାନସଭାକୁ ନେଇ ରାଜନୀତି ସରଗରମ ହେବାରେ ଲାଗିଛି। ଗୋଟିଏ ପଟେ ଭାରତୀୟ ଜନତା ପାର୍ଟି(ଭାଜପା) ତା ଜିଦ୍ରେ ଅଟଳ ରହିଥିବା ବେଳେ ଅନ୍ୟପଟେ ଶିବସେନା ମଧ୍ୟ ଜିଦ୍ରୁ ଓହରିବାକୁ ପ୍ରସ୍ତୁତ ନୁହେଁ। ଏପରି ପରିସ୍ଥିତିରେ ନୂଆ ସରକାର ଗଠନକୁ ନେଇ ଚାଲିଛି ମନ୍ଥନ। ଶିବସେନା ଏନ୍ସିପି ଓ କଂଗ୍ରେସକୁ ନେଇ ସରକାର ଗଠନ କରିବାକୁ ଚାହୁଁଥିବା ବେଳେ ଏମାନେ କିନ୍ତୁ ଶେଷ ପର୍ଯ୍ୟନ୍ତ ଅପେକ୍ଷା କରିଥିବା ଦେଖାଯାଇଛି। ସୋମବାର ଏନ୍ସିପି ମୁଖ୍ୟ ଶରଦ ପାଓ୍ବାର କଂଗ୍ରେସର ଅସ୍ଥାୟୀ ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ଭେଟିଥିଲେ। ଏହାପରେ ସେ କିନ୍ତୁ ସରକାର ଗଠନକୁ ନେଇ କିଛି ପ୍ରକାଶ କରି ନ ଥିଲେ। ସବୁ ତଥ୍ୟ ଯେମିତି କୋଲ୍ଡ ଷ୍ଟୋରରେ ରହିଯାଉଛି ଆଉ କୌଣସି ତଥ୍ୟ ସମାଧାନ ହୋଇ ପାରୁ ନାହିଁ। ମଙ୍ଗଳବାର ଏନ୍ସିପି ଓ ଏହାର ସହଯୋଗୀ କଂଗ୍ରେସ ଦଳ ରାଜ୍ୟପାଳଙ୍କୁ ଭେଟିବେ ବୋଲି କୁହାଯାଉଛି। ଏହାପରେ ସେମାନେ ଶିବସେନାକୁ ସମର୍ଥନ ଦେବେ କି ନା ତା’ ଉପରେ ସମସ୍ତଙ୍କ ନଜର। କାରଣ ସୋମବାର ଏହାକୁ ନେଇ ଦୁଇ ଦଳ ମଧ୍ୟରେ ଆଲୋଚନା ହୋଇଥିଲେ ବି କୌଣସି ତଥ୍ୟ ବାହାରକୁ ଆସିନାହିଁ। କୁହାଯାଉଛି କି ଏନ୍ସିପି ସିଧାସିଧା ଶିବସେନାକୁ ସହଯୋଗ କରିବ ଓ କଂଗ୍ରେସ ବାହାରେ ରହି ଏହାକୁ ସମର୍ଥନ କରିବ। ହେଲେ ଏହା କେତେଦୂର ଠିକ୍ ତାହା ଦିନେ ୨ ଦିନ ମଧ୍ୟରେ ଜଣାପଡିବ ବୋଲି ଅନୁମାନ କରାଯାଉଛି।