କାମାକ୍ଷାନଗର, ୪ ।୯-କାମାକ୍ଷାନଗର ମହିମା ଟୁଙ୍ଗିରେ ମଙ୍ଗଳବାର ନବାନ୍ନ ଉତ୍ସବ ମହାସମାରୋହରେ ପାଳିତ ହୋଇଯାଇଛି। ବ୍ରାହ୍ମମୁହୂର୍ତ୍ତରେ ମହିମା ଧର୍ମାବଲମ୍ବୀମାନେ ଶୁଦ୍ଧପୂତ ହୋଇ ମଠରେ ଏକାଠି ହୋଇଥିଲେ। ନୂଅଁା ଧାନରୁ ଚୁଡ଼ା ପ୍ରସ୍ତୁତ କରି ମାଟି ହାଣ୍ଡିରେ କ୍ଷୀର, ଗୁଡ଼, ଘିଅ, ମହୁ, ଦହି, ଛେନା ନଡ଼ିଆ, କଦଳୀ, ସେଓ, ଅଙ୍ଗୁର ସମେତ ଶର୍କରା ମିଶ୍ରଣ କରି ନବାନ୍ନ ପ୍ରସ୍ତୁତ କରାଯାଇ ମହିମା ଗୋସାଇଁଙ୍କୁ ଅର୍ପଣ କରାଯାଇଥିଲା। ସାଧୁସନ୍ଥମାନେ ସାମୂହିକ ପ୍ରସାଦ ସେବନ କାର୍ଯ୍ୟକ୍ରମରେ ସାମିଲ ହେବା ସହ ଜଗତ କଲ୍ୟାଣ କାମନା କରିଥିଲେ। ମହିମା ଅଲେଖ ଧ୍ବନିରେ ପରିବେଶ ପ୍ରକମ୍ପିତ ହୋଇଉଠିଥିଲା।
ମଠ ପରିଚାଳକ ଖଗ ବାବାଙ୍କ ନେତୃତ୍ୱରେ କୌପିନଧାରୀ ମହିମା ସମାଜ ପରିଚାଳକ ଅବିନାଶୀ ବାବା, ପରିବ୍ରାଜକ ନିମାଇଁ ବାବା, ସମ୍ବଲପୁର-ବରଗଡ଼ ସଭାପତି ଲାଲମୋହନ ବାବା, ପରମାନନ୍ଦ ବାବା, ଦୁଃଖବନ୍ଧୁ ବାବା, ଅପର୍ତ୍ତି ଦାସ, ଗୋଲେଖ ଦାସ, ତରୁଣ ଦାସ, ବିଭୂତି ଭୂଷଣ ମହାନ୍ତି, ବିଦେଶୀ ଦେହୁରୀ, ଭଜମନ ଓଝା, ମନମୋହନ ସାହୁ, ସନ୍ତୋଷ ସାହୁଙ୍କ ସମେତ ଶତାଧିକ ଅନୁଗାମୀ ଉପସ୍ଥିତ ରହି ନବାନ୍ନ ଭକ୍ଷଣ କରିଥିଲେ।