ବ୍ରହ୍ମପୁର ଅଫିସ,୨୮ା୧୨: ଜଣେ ମହିଳାଙ୍କୁ ଅସଦାଚରଣ କରିଥିବା ଅଭିଯୋଗରେ ଅଭିଯୁକ୍ତ ଯୁବକଙ୍କୁ ଟାଉନ ଥାନା ପୋଲିସ ଗିରଫ କରିଛି। ସେ ହେଲେ ଗେଟବଜାର ପଞ୍ଚାନନ ନଗରର ଶ୍ରୀକାନ୍ତ ବେହେରା। ମାମଲା ନଂ.୨୬୩/୧୯ରେ ତାଙ୍କୁ ଶୁକ୍ରବାର କୋର୍ଟ ଚାଲାଣ କରାଯାଇଥିବା ଥାନାଧିକାରୀ ସୁରେଶ କୁମାର ତ୍ରିପାଠୀ ସୂଚନା ଦେଇଛନ୍ତି। ଅନ୍ୟପଟେ ଧାରା ୧୬୪ ଅନୁସାରେ ଏସଡ଼ିଜେଏମ କୋର୍ଟରେ ମହିଳାଙ୍କ ବୟାନ ରେକର୍ଡ କରାଯାଇଛି। ବ୍ରହ୍ମପୁରରେ ଏକ ଘରୋଇ କେବଲ ସଂସ୍ଥାରେ ସେଲ୍ସମ୍ୟାନ କାମ କରୁଥିବା ଶ୍ରୀକାନ୍ତ ସମ୍ପୃକ୍ତ ମହିଳାଙ୍କୁ କିଛିଦିନ ହେଲା ଏକ ତରଫା ଭଲ ପାଇ ଆସୁଥିଲେ। ଏଥିରେ ବିଫଳ ହେବା ପରେ ତାଙ୍କୁ ସେ ବିଭିନ୍ନ ସମୟରେ ଅଶ୍ଳୀଳ ଇଙ୍ଗିତ କରି ଆସୁଥିଲେ। ଗୁରୁବାର ସକାଳେ ସ୍ବାମୀଙ୍କ ଅନୁପସ୍ଥିତିର ସୁଯୋଗ ନେଇ ଶ୍ରୀକାନ୍ତ ଘରେ ପଶି ମହିଳା ଜଣଙ୍କୁ ଟଣାଓଟରା କରିବା ସହ ତାଙ୍କୁ ଅସଦାଚରଣ କରିଥିଲେ। ମହିଳା ଚିତ୍କାର କରିବାରୁ ଶ୍ରୀକାନ୍ତ ତାଙ୍କୁ ଧମକ ଦେଇ ଘରୁ ଦୌଡ଼ି ପଳାଇଥିଲେ। ପରେ ମହିଳା ଜଣକ ତାଙ୍କ ସ୍ବାମୀଙ୍କୁ ଏକଥା ଜଣାଇ ଟାଉନ ଥାନାରେ ଅଭିଯୋଗ କରିଥିଲେ।