ମହିଳାଙ୍କୁ ଝାନ୍‌ସୀ ଚାଲାଣ ଅଭିଯୋଗ : ଏସ୍‌ପିଙ୍କ ଦ୍ୱାରସ୍ଥ ହେଲେ ପରିବାର
8:16 amJune 9, 2019June 11, 2020 / 21

ଅନୁଗୋଳ ଅଫିସ,୯।୬- ଅନୁଗୋଳ ସହରରୁ ଜଣେ ମହିଳାଙ୍କୁ ଝାନ୍‌ସୀରେ ବିକ୍ରି କରାଯାଇଥିବା ନେଇ ଥାନାରେ ଅଭିଯୋଗ ହୋଇଥିଲା। ଘଟଣାକୁ ୬ ମାସ ପୂରିଥିଲେ ବି ପୋଲିସ ତାଙ୍କୁ ଉଦ୍ଧାର କରିବାରେ ଅସମର୍ଥ ହୋଇଥିବା ଅଭିଯୋଗ କରି ଶନିବାର ସମ୍ପୃକ୍ତା ମହିଳାଙ୍କ ପରିବାର ଏସ୍‌ପିଙ୍କ ଦ୍ୱାରସ୍ଥ ହୋଇଛନ୍ତି। ମହିଳାଙ୍କୁ ସୁରକ୍ଷିତ ଉଦ୍ଧାର କରିବାକୁ ସମସ୍ତ ଉଦ୍ୟମ କରାଯିବ ବୋଲି ଏସ୍‌ପି ପ୍ରତିଶ୍ରୁତି ଦେଇଥିବା ଜଣାଯାଇଛି।
ଘଟଣାରୁ ପ୍ରକାଶ, ଜରପଡା ଥାନା ଅଞ୍ଚଳର ସମ୍ପୃକ୍ତା ମହିଳା ଅନୁଗୋଳ ସହରରେ ପୁଅଙ୍କ ସହ ରହୁଥିଲେ। ସ୍ବାମୀଙ୍କ ମୃତ୍ୟୁ ପରେ ସେ ଇକୋ ପାର୍କ ନିକଟସ୍ଥ ଶିକ୍ଷକପଡ଼ାରେ ରହୁଥିବା ଜଣେ ବ୍ୟକ୍ତିଙ୍କ ସଂସ୍ପର୍ଶରେ ଆସିଥିଲେ। ମଧ୍ୟପ୍ରଦେଶର ଏକ ଧନୀ ପରିବାରରେ ତାଙ୍କର ବିବାହ କରାଇଦେବାକୁ ସମ୍ପୃକ୍ତ ବ୍ୟକ୍ତି ମହିଳାଙ୍କୁ କହିଥିଲେ। ଏଥିରେ ରାଜି ହେବାରୁ ଅଭିଯୁକ୍ତ ଜଣକ ମହିଳାଙ୍କୁ ଆଲିଗଡରୁ ଆସିଥିବା କେତେଜଣ ଦଲାଲଙ୍କ ସହ ପଠାଇଦେଇଥିଲେ। ଆଲିଗଡରୁ ତାଙ୍କୁ ଝାନ୍‌ସୀ ଚାଲାଣ କରାଯାଇଥିଲା। କିଛି ଦିନ ପରେ ମହିଳା ଜଣକ କୌଶଳ କ୍ରମେ ପରିବାର ଲୋକଙ୍କୁ ଫୋନ୍‌ ଯୋଗେ ଏ ବାବଦରେ ଜଣାଇଥିଲେ ବୋଲି ଥାନାରେ ଅଭିଯୋଗ ହୋଇଛି।