ରୂପ୍ସା, ୩।୧୦(ଡି.ଏନ.ଏ.)-ବାଲେଶ୍ୱର ସଦର ବ୍ଲକ କୁରାଡ଼ିହା ପଞ୍ଚାୟତ କୋଇଲିସାହି ଗ୍ରାମର ରାମଚନ୍ଦ୍ର ଦାସଙ୍କ ସ୍ତ୍ରୀ କୁନିଲତା (୨୩) ବୁଧବାର ଫାଶୀ ଦେଇ ମୃତ୍ୟୁ ହେବା ଘଟଣା ଭିନ୍ନମୋଡ଼ ନେଇଛି। ଝିଅକୁ ହତ୍ୟା କରାଯାଇଥିବା ନେଇ କୁନିଲତାଙ୍କ ବାପା ଯୋଗେନ୍ଦ୍ର ସେଠୀ ବସ୍ତା ଥାନାରେ ଲିଖିତ ଅଭିଯୋଗ କରିଛନ୍ତି। ଏନେଇ ଥାନାରେ ଗୁରୁବାର ଏକ ମାମଲା (ନଂ. ୨୮୭/୧୯) ରୁଜୁ ହୋଇଛି। ଆଇଆଇସି ଧନେଶ୍ୱର ସାହୁ କୁନିଲତାଙ୍କ ସ୍ବାମୀ ରାମଚନ୍ଦ୍ରଙ୍କୁ ଗିରଫ କରିଛନ୍ତି।
ଗତ ଜୁନ୍ ମାସରେ କୁନିଲତାଙ୍କ ସହ ରାମଚନ୍ଦ୍ରଙ୍କ ବିବାହ ହୋଇଥିଲା। ବିବାହର ୪ମାସ ମଧ୍ୟରେ କୁନିଲତାଙ୍କ ସ୍ବାମୀ ରାମଚନ୍ଦ୍ର, ଦେଢ଼ଶୁର, ଯାଆ ଓ ଶ୍ୱଶୁର ବିଭିନ୍ନ ସମୟରେ ଯୌତୁକ ନିର୍ଯାତନା ଦେଇଥିବା ଅଭିଯୋଗ ହୋଇଥିଲା। କୁନିଲତା ଶାଶୁ ଘରେ ଫାଶୀ ହୋଇ ମୃତ୍ୟୁବରଣ କରିଥିବା ଖବର ପ୍ରଚାରିତ ହେବା ପରେ ପୋଲିସ ପହଞ୍ଚତ୍ ଝୁଲନ୍ତା ମୃତଦେହ ଉଦ୍ଧାର କରିଥିଲା। ଝିଅର ସନ୍ଦେହଜନକ ମୃତ୍ୟୁକୁ ନେଇ ତାଙ୍କ ବାପା ଥାନାର ଦ୍ୱାରସ୍ଥ ହୋଇଛନ୍ତି। ଘଟଣାର ସତ୍ୟାସତ୍ୟ ଜାଣିବା ଲାଗି ପୋଲିସ ତଦନ୍ତ ଜାରି ରଖିଛି।