ନୂଆଦିଲ୍ଲୀ,୧୦।୬: ରାଜଧାନୀ ଦିଲ୍ଲୀରେ ମଧ୍ୟ ମହିଳାଙ୍କୁ ସୁରକ୍ଷା ମିଳିପାରୁ ନାହିଁ। ଏନେଇ ପ୍ରକାଶିତ ଏକ ରିପୋର୍ଟରେ ଦର୍ଶାଯାଇଛି। ଦିଲ୍ଲୀରେ ଅତିସମ୍ବେଦନଶୀଳ ୨ ହଜାର ଅନ୍ଧାରୀ ଇଲାକା(ଡାର୍କ ସ୍ପଟ୍) ଚିହ୍ନଟ ହୋଇଛି। ଏଠାରେ ଆଖିପିଛୁଳାକେ ଅପରାଧ ଘଟିଥାଏ। ଅନ୍ଧାର ଥିବାରୁ ଅପରାଧୀ ସହଜରେ ଖସି ଯାଉଥିବା ପୋଲିସ ପକ୍ଷରୁ ସୂଚନା ଦିଆଯାଇଛି। ଏସବୁ ଅଞ୍ଚଳରେ ଅଧିକାଂଶ ସମୟରେ ମହିଳା ଛିନ୍ତାଇ, ଅପହରଣ, ଅଶାଳୀନ ବ୍ୟବହାର, ବଳାତ୍କାର ଆଦି ଘଟଣାର ଶିକାର ହୋଇଥାନ୍ତି। ଏସବୁ ଅଞ୍ଚଳରେ ସିସିଟିଭି କ୍ୟାମେରା ଥିଲେ ମଧ୍ୟ ଅନ୍ଧାରରେ ଏହା ଉପଯୁକ୍ତ ଭାବେ କାର୍ଯ୍ୟ କରିପାରୁ ନ ଥିବା କୁହାଯାଉଛି। ୨୦୧୮ରେ ଏସବୁ ଅଞ୍ଚଳରେ ୬୯୩୨ ଛିନ୍ତାଇ ଘଟଣା ଘଟିଥିଲା। ସେହିପରି ୨୧୩୫ ବଳାତ୍କାର ଘଟଣା ଏସବୁଠାରେ ଘଟିଥିବାବେଳେ ୩୩୧୪ ଅଶାଳୀନ ବ୍ୟବହାର ମାମଲା ଦାଏରା କରାଯାଇଥିବା ପୋଲିସ ବିଭାଗ ପକ୍ଷରୁ କୁହାଯାଇଛି। ୨୦୧୨ଠାରୁ ୨୦୧୮ ମଧ୍ୟରେ ଗତ ୬ବର୍ଷରେ ମହିଳାଙ୍କ ଉପରେ ହେଉଥିବା ଏଭଳି ଅପରାଧ ବହୁଗୁଣା ବଢ଼ିଥିବା ରିପୋର୍ଟରେ ପ୍ରକାଶ ପାଇଛି।