ନୂଆଦିଲ୍ଲୀ,୨୦ା୨(ଆଇଏଏନ୍ଏସ୍): କେନ୍ଦ୍ର କ୍ୟାବିନେଟ ବୁଧବାର ‘ଆସିଷ୍ଟେଡ୍ ରିପ୍ରଡକ୍ଟିଭ୍ ଟେକ୍ନୋଲୋଜି ରେଗୁଲେଶନ୍ ବିଲ୍ ୨୦୨୦’କୁ ମଞ୍ଜୁରୀ ଦେଇଛି। ମହିଳାଙ୍କ ପ୍ରଜନନ ଅଧିକାରକୁ ସୁରକ୍ଷା ଦେବା ପାଇଁ ଉଦ୍ଦିଷ୍ଟ ଏହି ବିଧେୟକକୁ ଏକ ଐତିହାସିକ ବିଲ୍ ଭାବେ ଅଭିହିତ କରିଛନ୍ତି ମହିଳା ଓ ଶିଶୁ ବିକାଶ ମନ୍ତ୍ରୀ ସ୍ମୃତି ଇରାନୀ। ସେ କହିଛନ୍ତି, ଏହି ବିଲ୍ ଦେଶର ମହିଳାମାନଙ୍କ ମଙ୍ଗଳ ପାଇଁ ଉଦ୍ଦିଷ୍ଟ। ଏକ ଜାତୀୟ ରେଜିଷ୍ଟ୍ରି (ପଞ୍ଜୀକରଣ କାର୍ଯ୍ୟାଳୟ) ପ୍ରତିଷ୍ଠା ପାଇଁ ଆଇନ ଆଣିବା ଲାଗି ଏଥିରେ ପ୍ରସ୍ତାବ ରହିଛି। ଆଇନଗତ ଚିଠା ପ୍ରସ୍ତୁତିରେ ସାହାଯ୍ୟ କରିବା ଲାଗି ଏକ ଜାତୀୟ ବୋର୍ଡ ଓ ରାଜ୍ୟ ବୋର୍ଡ ଗଠନ ହେବ। ସେହିପରି କ୍ଲିନିକ୍ ଓ ବ୍ୟାଙ୍କଗୁଡ଼ିକୁ ନେଇ ଏକ କେନ୍ଦ୍ରୀୟ ଡାଟାବେସ୍ ମଧ୍ୟ ପ୍ରସ୍ତୁତ କରାଯିବ। ଭ୍ରୂଣ ବିକ୍ରି ଓ ଚାଲାଣରେ ସମ୍ପୃକ୍ତ ଥିବା ବ୍ୟକ୍ତିଙ୍କୁ ଜରିମାନା କରାଯିବ। ଆବଶ୍ୟକ ସ୍ଥଳେ ଅଭିଯୁକ୍ତଙ୍କୁ ଜେଲ୍ଦଣ୍ଡ ଦିଆଯିବାର ବ୍ୟବସ୍ଥା ମଧ୍ୟ ପ୍ରସ୍ତାବିତ ଆଇନରେ ରହିଛି। ମାର୍ଚ୍ଚ ୨ରୁ ଏପ୍ରିଲ ୩ ମଧ୍ୟରେ ଚାଲିବାକୁ ଥିବା ଦ୍ୱିତୀୟ ପର୍ଯ୍ୟାୟ ବଜେଟ ଅଧିବେଶନରେ ଏହି ବିଲ୍ ପାର୍ଲାମେଣ୍ଟରେ ଆଗତ ହେବ ବୋଲି ଇରାନୀ ସୂଚନା ଦେଇଛନ୍ତି।