ଭୁବନେଶ୍ୱର, ୨୦।୧୨(ବ୍ୟୁରୋ):ଓ୍ବେଟ୍ ଲିଫ୍ଟିଂ ବା ଶକ୍ତି ଉତ୍ତୋଳନରେ ଦକ୍ଷିଣ ଆଫ୍ରିକାରେ ୨୦୧୦-୧୧ରେ ସ୍ବର୍ଣ୍ଣ ବିଜୟିନୀ ଶୁଭସ୍ମିତା ମହାନ୍ତି ରାଜ୍ୟ ପୋଲିସ ବିଭାଗରେ କନ୍ଷ୍ଟେବଳ ଭାବେ କାର୍ଯ୍ୟରତ ଅଛନ୍ତି। ଭଲ ଖେଳ ପ୍ରଦର୍ଶନ ପାଇଁ ୨୦୧୫ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶକ୍ରମେ ତାଙ୍କୁ ଚାକିରି ମିଳିଥିଲା। ବତ୍ତର୍ର୍ମାନ ତାଙ୍କ ପ୍ରତି ଅବହେଳା ପ୍ରଦର୍ଶନ କରାଯାଉଥିବା ଶୁଭସ୍ମିତା ଗୁରୁବାର ଗଣମାଧ୍ୟମ ନିକଟରେ ଅଭିଯୋଗ କରିଛନ୍ତି। ସେ କହିଛନ୍ତି, ଖେଳ କୋଟା ଅନୁଯାୟୀ ଆବଶ୍ୟକ ସୁବିଧା ସୁଯୋଗ ମିଳୁନାହିଁ। ଖେଳ ଅଭ୍ୟାସ କରିବାରେ ସମସ୍ୟା ହେଉଛି। ଏ ନେଇ ପୋଲିସ ବିଭାଗର କ୍ରୀଡା ଅଧିକାରୀଙ୍କୁ ଜଣାଇବାରୁ ସେ ସହଯୋଗ କରିବା ପରିବର୍ତ୍ତେ ତାଙ୍କୁ ଅପମାନିତ କରି ବିଦା କରିଦେଇଥିବା ଶୁଭସ୍ମିତା ଅଭିଯୋଗ ଆଣିଛନ୍ତି।
ମୁତାବକ, ଶୁଭସ୍ମିତାଙ୍କ ଘର କୋରାପୁଟ ଜିଲା ବୈପାରିଗୁଡା ଅଞ୍ଚଳରେ ହୋଇଥିବାରୁ ତାଙ୍କୁ କୋରାପୁଟ ଜିଲାରେ ଚାକିରି ମିଳିଥିଲା। ମାତ୍ର ସେଠାରେ ଶକ୍ତି ଉତ୍ତୋଳନ ପ୍ରଶିକ୍ଷଣ ନେବାର କୌଣସି ସୁବିଧା ନ ଥିବାରୁ ଭୁବନେଶ୍ୱରରେ ରହି ଅଭ୍ୟାସ ଜାରି ରଖିବା ସହ ବିଭିନ୍ନ ରାଜ୍ୟ ଓ ଜାତୀୟ ସ୍ତରୀୟ କ୍ରୀଡା ପାଇଁ ପ୍ରସ୍ତୁତ ରହୁଛନ୍ତି। ଆସନ୍ତା ୨୯ ତାରିଖରେ ବ୍ରହ୍ମପୁରରେ ରାଜ୍ୟସ୍ତରୀୟ ପ୍ରତିଯୋଗିତା ଅନୁଷ୍ଠିତ ହେବ। ଏଥିପାଇଁ ଅଭ୍ୟାସ ଦରକାର ହେଉଥିବାବେଳେ ଡ୍ୟୁଟିରେ ଯୋଗଦେବାକୁ କୁହାଯାଉଛି। ଏ ନେଇ ପୋଲିସ ମୁଖ୍ୟାଳୟ କ୍ରୀଡା ଅଧିକାରୀ ବିଭୂତି ଭୂଷଣ ମହାରଣାଙ୍କୁ ଜଣାଇଲେ ମଧ୍ୟ ସେ କୌଣସି ଗୁରୁତ୍ୱ ଦେଉନାହାନ୍ତି। ତାଙ୍କୁ ଅପମାନିତ କରାଯିବା ସହ ବରିଷ୍ଠ ଅଧିକାରୀଙ୍କୁ ଦେଖା କରିବାର ସୁଯୋଗ ଦିଆଯାଉ ନାହିଁ। ଉଚିତ ନ୍ୟାୟ ନ ମିଳିଲେ ଖେଳ ପାଇଁ ଚାକିରି ଛାଡିବାକୁ ବାଧ୍ୟ ହେବେ ବୋଲି ଶୁଭସ୍ମିତା କହିଛନ୍ତି।
ସଂକ୍ରାନ୍ତରେ କ୍ରୀଡା ଅଧିକାରୀ ବିଭୂତି ଭୂଷଣଙ୍କୁ ପଚାରିବାରୁ ସେ କହିଲେ, ଏ ନେଇ ମୁଁ କୌଣସି ମତ ଦେବା ଠିକ୍ ହେବ ନାହିଁ। ବିଭାଗରେ ସମସ୍ତେ ମୋର ବ୍ୟବହାର ସମ୍ପର୍କରେ ଅବଗତ। ମୁଁ କାହାକୁ ଖରାପ ବ୍ୟବହାର ପ୍ରଦର୍ଶନ କରେ ନାହିଁ। ଅଭିଯୋଗ ସମ୍ପର୍କରେ ବରିଷ୍ଠ ଅଧିକାରୀଙ୍କ ମତାମତ ନେବା ଉଚିତ ହେବ ବୋଲି ସେ କହିଥିଲେ। ଏ ସମ୍ପର୍କରେ ପୋଲିସ ମୁଖ୍ୟାଳୟର ଅତିରିକ୍ତ ଡିଜି ବିନୟତୋଷ ମିଶ୍ରଙ୍କୁ ପଚାରିବାରୁ ସେ କହିଛନ୍ତି, କ୍ରୀଡାବିତ୍ମାନଙ୍କୁ ପୋଲିସ ବିଭାଗରେ ସର୍ବଦା ଅଗ୍ରାଧିକାର ଦିଆଯାଏ। ସ୍ପୋଟର୍ସ ପୋଲିସ ଅନୁଯାୟୀ ସମସ୍ତ କାର୍ଯ୍ୟ କରାଯାଉଛି। ତେଣୁ ଗ୍ରିଭାନ୍ସରେ ନିଜର ସମସ୍ୟା ଜଣାଇବାରେ କୌଣସି ସମସ୍ୟା ନାହିଁ। ଶୁଭସ୍ମିତାଙ୍କ ଅଭିଯୋଗକୁ ବିଚାର କରାଯାଇ ଉଚିତ ପଦକ୍ଷେପ ନିଆଯିବ ବୋଲି ମିଶ୍ର କହିଛନ୍ତି।