ଓ୍ବାଶିଂଟନ୍: କରୋନା ଭୂତାଣୁ ସମଗ୍ର ବିଶ୍ୱରେ ଆତଙ୍କ ସୃଷ୍ଟି କରିଛି। ଏନେଇ ଅଧିକାଂଶ ଦେଶରେ ଲକ୍ଡାଉନ୍ ଘୋଷଣା କରାଯାଇଛି। ଫଳରେ ଲୋକେ ଘରେ ରହୁଛନ୍ତି। ଗୁରୁତ୍ୱପୂର୍ଣ୍ଣ କାର୍ଯ୍ୟ ପଡ଼ିଲେ ଘରୁ ବାହାରକୁ ଯିବା ପାଇଁ ସରକାରଙ୍କ ପକ୍ଷରୁ ପରାମର୍ଶ ଦିଆଯାଇଛି। କରୋନାକୁ ନେଇ ଲୋକେ ଏତେମାତ୍ରାରେ ଭୟଭୀତ ହୋଇଯାଇଛନ୍ତି କି କେହି ଛିଙ୍କିଲେ କିମ୍ବା କାଶିଲେ ମନରେ ଭୟ ସୃଷ୍ଟି ହେଉଛି।
ଆମେରିକାର ପେନ୍ସିଲ୍ଭାନିଆରେ ଏଭଳି ଏକ ଘଟଣା ଘଟିଛି। ଏଠାରେ ଜଣେ ମହିଳା ଦୋକାନ ଭିତରେ ଛିଙ୍କି ଦେବାରୁ ଦୋକାନୀ ସମସ୍ତ ସାମଗ୍ରୀ ବାହାରକୁ ଫିଙ୍ଗି ଦେଇଥିଲେ। ଏହି ସାମଗ୍ରୀର ମୂଲ୍ୟ ୩୫ ହଜାର ଡଲାର ଅର୍ଥାତ୍ ଭାରତୀୟ ମୁଦ୍ରାରେ ପ୍ରାୟ ୨୬ ଲକ୍ଷ ଟଙ୍କା ବୋଲି କୁହାଯାଉଛି। ଦୋକାନରେ କାମ କରୁଥିବା ଜଣେ କର୍ମଚାରୀ କହିଛନ୍ତି, ମହିଳା ଦୋକାନରେ ପ୍ରବେଶ କରିବା ପରେ ବେକେରୀ ଦ୍ରବ୍ୟ ନିକଟକୁ ଆସିବା ମାତ୍ରେ ଛିଙ୍କିଥିଲେ। ସେଠାରେ ମାଂସ ଏବଂ ଖାଦ୍ୟ ସାମଗ୍ରୀ ମଧ୍ୟ ରଖାଯାଇଥିଲା। ଫଳରେ କରୋନା ଭୂତାଣୁର ଆଶଙ୍କା କରି ସଙ୍ଗେ ସଙ୍ଗେ ସମସ୍ତ ଜିନିଷକୁ ଦୋକାନରୁ ବାହାରକୁ ଫିଙ୍ଗି ଦିଆଯାଇଥିଲା। ଏଥି ସହିତ ଦୋକାନକୁ ଭଲ ଭାବରେ ସଫା କରାଯାଇଥିଲା। ମହିଳା ଛିଙ୍କିବା ପରେ ଦୋକାନ ମାଲିକ ତୁରନ୍ତ ପୋଲିସକୁ ଡାକିଥିଲେ। ପୋଲିସ ପହଞ୍ଚି ସଂପୃକ୍ତା ମହିଳାଙ୍କୁ ଗିରଫ କରିଛି।
ଏକ ରିପୋର୍ଟ ଅନୁଯାୟୀ, ମହିଳା ଜଣକ ଉଦ୍ଦେଶ୍ୟମୂଳକ ଭାବେ କୁଆଡ଼େ ଏପରି କରିଥିଲେ। ମହିଳାଙ୍କ ନାମରେ ଅପରାଧିକ ମାମଲା ରୁଜୁ କରାଯିବ ବୋଲି ପୋଲିସ କହିଛି। କୁହାଯାଉଛି, ସେ କରୋନା ପଜିଟିଭ୍ ନୁହନ୍ତି। ତଥାପି ତାଙ୍କର ସ୍ବାସ୍ଥ୍ୟ ପରୀକ୍ଷା କରାଯିବ।