ମେଲବୋର୍ନ,୨୯ା୨- ହରମନପ୍ରୀତ କୌରଙ୍କ ନେତୃତ୍ୱାଧୀନ ଭାରତୀୟ ଦଳ ଚଳିତ ଟି୨୦ ମହିଳା ବିଶ୍ୱକପ୍ର ଲିଗ୍ ପର୍ଯ୍ୟାୟରେ ଅପରାଜେୟ ରହିଛି। ଶନିବାର ଖେଳାଯାଇଥିବା ଅନ୍ତିମ ଲିଗ୍ ମ୍ୟାଚ୍ରେ ଭାରତୀୟ ଦଳ ୭ ଉଇକେଟରେ ଶ୍ରୀଲଙ୍କାକୁ ହରାଇ ଦେଇଛି। ଶ୍ରୀଲଙ୍କା ପକ୍ଷରୁ ଧାର୍ଯ୍ୟ ୧୧୪ ରନ୍ର ଟାର୍ଗେଟକୁ ଭାରତୀୟ ଦଳ ୩୨ ବଲ ଓ ୭ ଉଇକେଟ ହାତରେ ରଖି ହାସଲ କରିନେଇଛି। ପୂର୍ବରୁ ସେମିଫାଇନାଲରେ ପ୍ରବେଶ କରିସାରିଥିବା ଭାରତୀୟ ଦଳର ଏହା କ୍ରମାଗତ ଚତୁର୍ଥ ବିଜୟ। ବିଜୟୀ ଦଳ ଲାଗି ସଫଳ ବୋଲର ରାଧା ଯାଦବଙ୍କୁ ପ୍ଲେୟାର ଅଫ୍ ଦି ମ୍ୟାଚ୍ ବିବେଚିତ କରାଯାଇଛି।
ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଶ୍ରୀଲଙ୍କା ଦଳ ଧାର୍ଯ୍ୟ ୨୦ ଓଭରରେ ୯ ଉଇକେଟ ହରାଇ ୧୧୩ ରନ୍ କରିଥିଲା। ଦଳ ପାଇଁ ଅଧିନାୟିକା ଚାମାରି ଆଟାପାଟୁ ୩୩ ଓ କାବିଶ ଦିଲାରି ୨୫ ରନ୍ କରିଥିଲେ। ଦଳର ୭ ଜଣ ବ୍ୟାଟ୍ସଓମ୍ୟାନ ଦୁଇ ଅଙ୍କ ସ୍କୋର ଛୁଇଁ ପାରି ନ ଥିଲେ। ଭାରତୀୟ ବୋଲରଙ୍କ ମଧ୍ୟରେ ରାଧା ସର୍ବାଧିକ ୪ ଉଇକେଟ ହାତେଇଥିଲେ। ରାଜେଶ୍ୱର ଗାଏକ୍ୱାଡ ୨ ଉଇକେଟ ନେଇଥିବାବେଳେ ଦୀପ୍ତି ଶର୍ମା, ଶିକ୍ଷା ପାଣ୍ଡେ ଓ ପୁନମ ଯାଦବ ଗୋଟିଏ ଲେଖାଏ ଉଇକେଟ ଅକ୍ତିଆର କରିଥିଲେ। ଜବାବରେ ଶେଫାଳି ବର୍ମା ଓ ସ୍ମୃତି ମନ୍ଧାନାଙ୍କ ଓପନିଂ ଯୋଡ଼ି ୪.୪ ଓଭରରେ ୩୪ ରନ୍ କରିଥିଲେ। ମନ୍ଧାନା (୧୭) ଆଉଟ୍ ହେବା ପରେ ଶେଫାଳିଙ୍କ ସହ ଅଧିନାୟିକା ହରମନପ୍ରୀତ ମିଶି ଦ୍ୱିତୀୟ ଉଇକେଟ ଲାଗି ୪୭ ରନ୍ର ଭାଗୀଦାରି କରିଥିଲେ। ହରମନପ୍ରୀତ (୧୫) ଆଉଟ୍ ହେବାବେଳକୁ ଦଳର ବିଜୟଲକ୍ଷ୍ୟ ଦୂର ନ ଥିଲା। ପରବର୍ତ୍ତୀ ଓଭରରେ ଶେଫାଳି ରନଆଉଟ୍ ହୋଇଥିଲେ। ସେ ଆଉଟ୍ ହେବା ପୂର୍ବରୁ ୩୪ ବଲର ସମ୍ମୁଖୀନ ହୋଇ ୪୭ ରନ୍ କରିଥିଲେ। ତାଙ୍କ ଇନିଂସରେ ରହିଥିଲା ୭ ଚୌକା ଓ ଗୋଟିଏ ଛକା। ଏହାପରେ ଦଳକୁ ବିଜୟ ଲାଗି ଆବଶ୍ୟକ ରନ୍ ଜେମିମା ରୋଡ୍ରିଗୁଏଜ ଓ ଦୀପ୍ତି ଶର୍ମାଙ୍କ ଯୋଡ଼ି ହାସଲ କରି ନେଇଥିଲା। ଦୁହେଁ ୧୫ ରନ୍ ଲେଖାଏ କରି ଅପରାଜିତ ଥିଲେ। ଭାରତୀୟ ଦଳ ୧୪.୪ ଓଭରରେ ୩ ଉଇକେଟ ହରାଇ ୧୧୬ ରନ୍ କରି ମ୍ୟାଚ୍ ଜିତି ନେଇଥିଲା। ଶ୍ରୀଲଙ୍କା ପକ୍ଷରୁ ଉଦେଶିକା ପ୍ରାବୋଧାନି ଓ ଶାଶିକଲା ସିରିଓ୍ବର୍ଦନେ ଗୋଟିଏ ଲେଖାଏ ଉଇକେଟ ହାସଲ କରିଥିଲେ। ବିଜୟ ସହ ଭାରତୀୟ ଦଳ ଗ୍ରୁପ୍ ଏ’ରେ ୪ ମ୍ୟାଚ୍ରୁ ୪ ଜିତି ୮ ପଏଣ୍ଟ ହାସଲ କରି ଶୀର୍ଷ ସ୍ଥାନ ଅଧିକାର କରିଛି।
ସଂକ୍ଷିପ୍ତ ସ୍କୋର:
ଶ୍ରୀଲଙ୍କା ଦଳ- ୨୦ ଓଭରରେ ୧୧୩/୯(ଚାମାରି ଆଟାପାଟୁ ୩୩, କାଭିଶ ଦିଲାରି ୨୫, ରାଧା ଯାଦବ ୪/୨୩, ରାଜେଶ୍ୱର ଗାଏକ୍ୱାଡ ୨/୧୮)।
ଭାରତୀୟ ଦଳ- ୧୪.୪ ଓଭରରେ ୧୧୬/୩ (ଶେଫାଳି ବର୍ମା ୪୭, ସ୍ମୃତି ମନ୍ଧାନା ୧୭, ଉଦେଶିକା ପ୍ରବୋଧନି ୧/୧୩)।