ସିଡନୀ,୫।୩(ପି.ଟି.)- ଚଳିତ ମହିଳା ଟି୨୦ ବିଶ୍ୱକପ୍ରେ ଗୁରୁବାର ଆୟୋଜନ ହେବାକୁ ଥିବା ଦୁଇଟି ଯାକ ସେମିଫାଇନାଲ ପାଇଁ ରିଜର୍ଭ ଡେ ରଖିବାକୁ କ୍ରିକେଟ ଅଷ୍ଟ୍ରେଲିଆ (ସିଏ) ଅନୁରୋଧ କରିଛି। ତେବେ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ଏହାକୁ ପ୍ରତ୍ୟାଖ୍ୟାନ କରିଛି। ଗୁରୁବାର ଅପରାହ୍ନରେ ବର୍ଷା ହେବାର ସମ୍ଭାବନା ରହିଥିବାରୁ ବିଶ୍ୱକପ୍ ଆୟୋଜକ କ୍ରିକେଟ ଅଷ୍ଟ୍ରେଲିଆ ଦୁଇଟି ସେମିଫାଇନାଲ ମ୍ୟାଚ ପାଇଁ ରିଜର୍ଭ ଡେ ରଖିବାକୁ ଅନୁରୋଧ କରିଥିଲା। ଆଇସିସି ଏହାକୁ ପ୍ରତ୍ୟାଖ୍ୟାନ କରିଛି ବୋଲି ସିଏ ମୁଖ୍ୟ କେଭିନ ରବଟର୍ସ କହିଛନ୍ତି। ବର୍ଷା ପାଇଁ ଡ୍ରେନେଜ ବ୍ୟବସ୍ଥା ରହିଛି। ବିଶେଷ ପରିସ୍ଥିତିରେ ଆଇସିସି ନିୟମ ଅନୁସାରେ ଅତିକମ୍ରେ ୨୦ ଓଭର ଖେଳାଯିବ। ଏ କ୍ଷେତ୍ରରେ ଦୁଇ ଦଳ ୧୦ ଓଭର ଲେଖାଏ ଖେଳିବେ।
ଯଦି ବର୍ଷା ଯୋଗୁ ଦୁଇଟି ଫାଇନାଲ ବାତିଲ ହୁଏ, ତେବେ ଗ୍ରୁପ୍ ବିଜେତା ଭାବେ ଭାରତ ଓ ଦକ୍ଷିଣ ଆଫ୍ରିକା ଫାଇନାଲରେ ପ୍ରବେଶ କରିବେ। ମେଲବୋର୍ନ କ୍ରିକେଟ ଗ୍ରାଉଣ୍ଡରେ ରବିବାର ଫାଇନାଲ ମ୍ୟାଚ୍ ଖେଳାଯିବ। ଗତ ମଙ୍ଗଳବାର ଗ୍ରୁପ୍ ବି’ର ଅନ୍ତିମ ମ୍ୟାଚ୍ ବର୍ଷା ଯୋଗୁ ଗୋଟିଏ ହେଲେ ବି ବଲ୍ ବୋଲିଂ କରାଯାଇ ନ ଥିଲା ଓ ମ୍ୟାଚ୍ ବାତିଲ ହୋଇଥିଲା।
