ହାଇଦ୍ରାବାଦ,୮।୧୧: ଆନ୍ଧ୍ରପ୍ରଦେଶର କୁରନୁଲ ସ୍ଥିତ ଏକ ଗାଁରେ ତହସିଲଦାରଙ୍କ ମଧ୍ୟରେ ପଶିଛି ଛନକା। ଏମାନେ କାର୍ଯ୍ୟାଳୟରେ ଲକ୍ଷ୍ମଣ ରେଖା ଟାଣି କାର୍ଯ୍ୟ କରୁଥିବା ଦେଖିବାକୁ ମିଳିଛି। ଆଉ ଏହି ରେଖାକୁ ପାର୍ କରିବାକୁ କାହାକୁ ଅନୁମତି ଦିଆଯାଇ ନାହିଁ। ଯଦି କାହାକୁ କିଛି କହିବାର ଅଛି ବା କୌଣସି କାଗଜପତ୍ର ଦେବାର ଅଛି ତେବେ ଉକ୍ତ ବ୍ୟକ୍ତି ରେଖା ବାହାରେ ରହୁଛନ୍ତି। କାରଣ କାଳେ କିଏ କାର୍ଯ୍ୟାଳୟରେ ପଶି ତାଙ୍କୁ ଜୀବନ୍ତ ପୋଡିଦେବ, ସେହି ଡରରେ ସେମାନେ ଏହି ରେଖା ଟାଣିଥିବା କୁହାଯାଉଛି। ସୂଚନାଯୋଗ୍ୟ, ତେଲେଙ୍ଗାନାରେ ମହିଳା ତହସିଲଦାର ବିଜୟା ରେଡ୍ଡୀଙ୍କୁ ଜଣେ ସନ୍ଦିଗ୍ଧ ଜୀବନ୍ତ ପୋଡ଼ିଦେବା ପରେ ସବୁ ତହସିଲଦାରଙ୍କ ଭିତରେ ଭୟର ବାତାବରଣ ଖେଳିଯାଇଛି। ଏହି ଘଟଣା ପରେ କୁରନୁଲର ମହିଳା ତହସିଲଦାର ଉମା ମାହେଶ୍ୱରୀ ଏତେ ଭୟଭୀତ ହୋଇପଡ଼ିଛନ୍ତି ଯେ, ନିଜ ଚ୍ୟାମ୍ବର ସିଟ୍ର କିଛି ଦୂରେ ଏକ ରଶି ବାନ୍ଧି ଦେଇଛନ୍ତି। ଯାହାଫଳରେ ଲୋକମାନେ ତାଙ୍କ ନିକଟକୁ ନ ଆସି ଦୂରରେ ରହି କଥାବାର୍ତ୍ତା କରିପାରିବେ। ଏଥିସହ ତାଙ୍କ ସିଟ୍ ସମ୍ମୁଖରେ ଏକ ବଡ଼ ଟେବୁଲକୁ ରଖିଛନ୍ତି। ଯେଉଁ ବ୍ୟକ୍ତିଙ୍କୁ କିଛି କାଗଜପତ୍ର କାର୍ଯ୍ୟ ଥାଏ ସେମାନେ ସେହି ଟେବୁଲ ଉପରେ ରଖିଦେଇଥାନ୍ତି ବୋଲି ଉମା କହିଛନ୍ତି।