ଥିରୁଭାନନ୍ତପୁରମ,୭।୩: ଅନ୍ତରାଷ୍ଟ୍ରୀୟ ମହିଳା ଦିବସ ଅବସରରେ କେରଳର ମହିଳାମାନେ ନାରୀ ସଶକ୍ତିକରଣ କ୍ଷେତ୍ରରେ ଏକ ନୂଆ ଅଧ୍ୟାୟ ଯୋଡିବାକୁ ପ୍ରସ୍ତୁତ ହୋଇଛନ୍ତି। ମାର୍ଚ୍ଚ ୮ ରବିବାର ଅନ୍ତରାଷ୍ଟ୍ରୀୟ ମହିଳା ଦିବସ ପଡୁଥିବା ବେଳେ ଏହି ଅବସରରେ କେରଳର ସମସ୍ତ ପୋଲିସ ଷ୍ଟେଶନ, ରେଲଓ୍ବେ ଷ୍ଟେଶନରେ କେବଳ ମହିଳାମାନେ କାର୍ଯ୍ୟ କରିବେ ବୋଲି ଜଣାପଡିଛି। କେରଳର ଡିଜିପି ଲୋକନାଥ ବେହେରା ସମସ୍ତ ଜିଲାର ପୋଲିସ ଅଧିକାରୀଙ୍କୁ ମାର୍ଚ୍ଚ ୮ରେ ମହିଳା ପୋଲିସଙ୍କୁ ଷ୍ଟେଶନ ହାଉସ ଅଫିସର(ଏସ୍ଏଚ୍ଓ) ଡ୍ୟୁଟି ଦେବାକୁ ନିର୍ଦ୍ଦେଶ ଦେଇଛନ୍ତି। ଏହି ସମୟରେ ଥାନାର ବରିଷ୍ଠ ଅଧିକାରୀ ଲୋକଙ୍କ ସହ କଥା ହେବେ ଓ ସେମାନଙ୍କ ଅଭିଯୋଗ ଯାଞ୍ଚ କରିବେ। ଏହିଦିନ କେରଳର ମୁଖ୍ୟମନ୍ତ୍ରୀ ପିନାରାଇ ବିଜୟନଙ୍କ ଗାଡିର ଏସ୍କର୍ଟରେ ମହିଳା କମାଣ୍ଡୋଙ୍କୁ ନିଯୁକ୍ତ କରାଯିବ ବୋଲି ଡିଜିପି କହିଛନ୍ତି। ସେହିପରି ମୁଖ୍ୟମନ୍ତ୍ରୀଙ୍କ ବାସଗୃହ ସମ୍ମୁଖରେ ମହିଳା ପୋଲିସ ଗାର୍ଡ ଡ୍ୟୁଟି କରିବେ।
