Netherlands' Jackie Groenen, center, celebrates after scoring during the Women's World Cup semifinal soccer match between the Netherlands and Sweden, at the Stade de Lyon outside Lyon, France, Wednesday, July 3, 2019. (AP Photo/Francisco Seco)
ଲିଓନ,୪।୭(ଏଏଫ୍ପି)- ଏଠାରେ ଖେଳାଯାଇଥିବା ସ୍ବିଡେନ ବିପକ୍ଷ ସେମିଫାଇନାଲକୁ ଜ୍ୟାକି ଗ୍ରୋନେନଙ୍କ ଗୋଲ ଯୋଗୁ ନେଦରଲାଣ୍ଡ ୧-୦ ବ୍ୟବଧାନରେ ଜିତିନେଇଛି। ଏହି ବିଜୟ ସହ ଚଳିତ ମହିଳା ଫିଫା ବିଶ୍ୱକପ୍ରେ ଫାଇନାଲ ମୁକାବିଲା ସ୍ପଷ୍ଟ ହୋଇଯାଇଛି। ୩ ଥର ତଥା ଡିଫେଣ୍ଡିଂ ଚାମ୍ପିୟନ ଆମେରିକା ଓ ୟୁରୋପିଆନ ଚାମ୍ପିୟନ ନେଦରଲାଣ୍ଡ ମଧ୍ୟରେ ବିଶ୍ୱକପ୍ ଲଢ଼େଇ ହେବ। ୯୦ ମିନିଟ୍ ପର୍ଯ୍ୟନ୍ତ ମ୍ୟାଚ୍ ଗୋଲ ଶୂନ୍ୟ ରହିଥିଲା। ଅତିରିକ୍ତ ସମୟ ତଥା ୯୯ ତମ ମିନିଟ୍ରେ ଭାନ ଡେ ଡଙ୍କଙ୍କଠାରୁ ମିଳିଥିବା ପାସ୍କୁ ମିଡ୍ଫିଲ୍ଡର ଗ୍ରୋନେନ ଗୋଲରେ ପରିଣତ କରିଥିଲେ। ଏହାପରେ ମ୍ୟାଚ୍କୁ ବରାବର କରିବାକୁ ସକ୍ଷମ ହୋଇ ନ ଥିଲା ୨୦୦୩ ବିଶ୍ୱକପ୍ ଉପବିଜେତା ସ୍ବିଡେନ। ପୂର୍ବତନ ଚାମ୍ପିୟନ ଜାପାନ ଓ ପରେ ଇଟାଲିକୁ ପୂର୍ବ ଦୁଇ ରାଉଣ୍ଡରେ ହରାଇଥିବା ନେଦରଲାଣ୍ଡ ତା’ର ପ୍ରଥମ ବିଶ୍ୱକପ୍ଠାରୁ ଆଉ ଗୋଟିଏ ବିଜୟ ଦୂରରେ ଅଛି। ପ୍ରଥମ ସେମିଫାଇନାଲରେ ଇଂଲଣ୍ଡକୁ ହରାଇ ଆମେରିକା କ୍ରମାଗତ ୩ୟ ଥର ପାଇଁ ବିଶ୍ୱକପ ଫାଇନାଲରେ ପ୍ରବେଶ କରିଛି। ସ୍ବିଡେନ ଓ ଇଂଲଣ୍ଡ ମଧ୍ୟରେ ୩ୟ ସ୍ଥାନ ପାଇଁ ମ୍ୟାଚ୍ ଶନିବାର ଖେଳାଯିବ।