ଓ୍ବାଶିଂଟନ, ୮।୬ (ଏପି): ଆମେରିକୀୟ ପେସାଦାର ମହିଳା ଜୁନିୟର ଲଇଟ୍ଓ୍ବେଟ ବକ୍ସର ମିକାଇଲା ମେୟର କୋଭିଡ୍-୧୯ରେ ସଂକ୍ରମିତ ବୋଲି ଜଣାପଡିଛି। ଟେଷ୍ଟରେ ପଜିଟିଭ୍ ବୋଲି ସେ ରବିବାର ସୋସିଆଲ ମିଡିଆରେ ଘୋଷଣା କରିଥିଲେ। ଫଳରେ କୋଭିଡ୍-୧୯ ମହାମାରୀ ପରେ ସେ ଲାସ୍ ଭେଗାସ୍ରେ ହେବାକୁ ଥିବା ପ୍ରଥମ ମେଜର ବକ୍ସିଂ ପ୍ରତିଯୋଗିତାରୁ ଓହରି ଯାଇଛନ୍ତି।
ଦୁଇଦିନ ପରେ ସେ ଏମ୍ଜିଏମ୍ ଗ୍ରାଣ୍ଡ ଗାର୍ଡେନ ଏରିନାରେ ମଙ୍ଗଳବାର ଆୟୋଜନ ହେବାକୁ ଥିବା ଟପ୍ ର଼୍ୟାଙ୍କ ଶୋ ତଥା ହେଲେନ ଜୋସେଫ୍ଙ୍କ ବିପକ୍ଷ ବାଉଟ୍ରେ ଅବତୀର୍ଣ୍ଣ ହୋଇଥାନ୍ତେ। ଉଲ୍ଲେଖଥାଉ କି, ୨୯ ବର୍ଷୀୟ ମେୟର ହେଉଛନ୍ତ ପୂର୍ବତନ ୟୁଏସ୍ ଅଲିମ୍ପିୟାନ ଓ ୧୩୦- ପାଉଣ୍ଡ ଡିଭିଜନ୍ରେ ଜଣେ ଉଦୀୟମାନ ତାରକା। ତାଙ୍କଠାରେ କୌଣସି ଲକ୍ଷଣ ଦେଖା ଦେଇ ନ ଥିଲେ ମଧ୍ୟ ସେ ପଜିଟିଭ୍ ବୋଲି ଶନିବାର ଟେଷ୍ଟରୁ ଜଣାପଡିଛି। ମୋ ଟିମ୍ର ବାକି ଖେଳାଳି ନେଗେଟିଭ୍ ଅଛନ୍ତି ଓ ସେମାନଙ୍କ ସ୍ବାସ୍ଥ୍ୟ ବେଶ୍ ଭଲ ରହିଛି ବୋଲି ମେୟର କହିଛନ୍ତି। ଏବେ ନିଜ ସହିତ ମୋ ଟମ୍, ସମର୍ଥକ ଓ ବିପକ୍ଷ ଖେଳାଳିଙ୍କୁ ନିରାଶ କରିଛି ବୋଲି ମେୟର କହିଛନ୍ତି। ମେୟର ଜୋସେଫଙ୍କ ବିପକ୍ଷରେ ୧୦ ରାଉଣ୍ଡ ବିଶିଷ୍ଟ ବାଉଟ୍ରେ ଅବତୀର୍ଣ୍ଣ ହୋଇଥାନ୍ତେ। ଚଳିତ ବର୍ଷ ଶେଷ ଆଡକୁ ଓ୍ବାଲର୍ଡ ଟାଇଟଲ ଲଢେଇରେ ଅବତୀର୍ଣ୍ଣ ହେବା ତାଙ୍କର ଲକ୍ଷ୍ୟ ଥିଲା।