ଆଡିଲେଡ୍,୨୦।୧୦- ଚଳିତ ମହିଳା ବିଗ୍ ବାଶ ଲିଗ୍ (ବିବିଏଲ)ରେ ଶନିବାର ମେଲବୋର୍ନ ରେନେଗାଡେସ ବିପକ୍ଷରେ ଖେଳାଯାଇଥିବା ମ୍ୟାଚ୍ ଜିତିବା ପରେ ଆଡିଲେଡ୍ ଷ୍ଟ୍ରାଇକର୍ସ ଲେଗ୍ ସ୍ପିନର ଆମାଣ୍ଡା ଜାଡେ ଓ୍ବେଲିଂଟନ ଦଳୀୟ ଖେଳାଳିଙ୍କ ସହ ଫଟୋ ନେଉଥିବାବେଳେ ତାଙ୍କୁ ଆଶ୍ଚର୍ଯ୍ୟ କଲା ଭଳି ଉପହାର ମିଳିଥିଲା। ୨୩ ବର୍ଷୀୟ ପୁରୁଷ ବନ୍ଧୁ ଟେଲର ମ୍ୟାକକେଚନି ପଡ଼ିଆରେ ଆଣ୍ଠେଇ ଆମାଣ୍ଡାଙ୍କୁ ବିବାହ ପ୍ରସ୍ତାବ ଦେଇଥିଲେ। ପ୍ରାୟ ବଲ ଭଳି ଦେଖାଯାଉଥିବା ରିଙ୍ଗ୍ ପିନ୍ଧାଇଥିଲେ। ଆମେ ପଡ଼ିଆରେ ଟିମ ଫଟୋ ନେଉଥିବାବେଳେ ମୁଁ ତାଙ୍କୁ ପଡ଼ିଆରେ ଦେଖିଲି। ମୁଁ ଜାଣି ନ ଥିଲି କ’ଣ ଘଟୁଛି। କିନ୍ତୁ ମୁଁ ଏବେ ବହୁତ ଖୁସି ବୋଲି ୨୨ ବର୍ଷୀୟା ଆମାଣ୍ଡା କହିଛନ୍ତି। ସେ ୨୦୧୬ରେ ଅଷ୍ଟ୍ରେଲିଆ ପାଇଁ ଅନ୍ତର୍ଜାତୀୟ ସ୍ତରରେ ପଦାର୍ପଣ କରିଥିଲେ। ଏପର୍ଯ୍ୟନ୍ତ ୮ ଟି୨୦, ୧୨ ଦିନିକିଆ ଓ ଗୋଟିଏ ଟେଷ୍ଟ ଖେଳିସାରିଛନ୍ତି। ମେଲବୋର୍ନ ରେନେଗାଡେସ ବିପକ୍ଷ ମ୍ୟାଚ୍ରେ ସେ ୪ ଓଭର ବୋଲିଂ କରି ୨୮ ରନ୍ ଦେଇ ଉଇକେଟ ଶୂନ୍ୟ ରହିଥିଲେ। ଆଡିଲେଡ୍ ଦଳ ୬ ଉଇକେଟରେ ମ୍ୟାଚ୍ ଜିତି ନେଇଥିଲା। ବିଜୟୀ ଦଳ ପାଇଁ ସୋଫି ଡେଭିନ ୭୨ ରନ୍ର ଅପରାଜିତ ଇନିଂସ ଖେଳିଥିଲେ।