ଦାରିଙ୍ଗବାଡି,୨୫।୨(ଡି.ଏନ୍.ଏ.)- କନ୍ଧମାଳ ଜିଲା ଦାରିଙ୍ଗବାଡି ବ୍ଲକ ଛଡାକିଆ ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଳୟରେ ଜଣେ ରୋଷେୟା(ବିଧବା)ଙ୍କୁ ୩ବର୍ଷ ଧରି ଅସଦାଚରଣ କରିଆସୁଥିବା ଘଟଣାରେ ମଙ୍ଗଳବାର ଦାରିଙ୍ଗବାଡି ପୋଲିସ ୨ଜଣଙ୍କୁ ଗିରଫ କରି କୋର୍ଟଚାଲାଣ କରିଛି। ଅଭିଯୁକ୍ତ ହେଲେ ବିଦ୍ୟାଳୟର ପ୍ରଧାନ ଶିକ୍ଷକ ଦାୟିତ୍ୱରେ ଥିବା ଯିଶାୟ ପ୍ରଧାନ, ପୁରୁଷ ରୋଷେୟା କମ୍ ଆଟେଣ୍ଡାଣ୍ଟ ସଂସାରି ଦିଗାଳ ବୋଲି ଆଇଆଇସି କୌଶିକ ମାଝୀ ସୂଚନା ଦେଇଛନ୍ତି।
ପୋଲିସ ସୂଚନାନୁଯାୟୀ, ମହିଳା ରୋଷେୟା ଗତ ୪ବର୍ଷ ଧରି ଉକ୍ତ ବିଦ୍ୟାଳୟରେ ନିଯୁକ୍ତି ପାଇଥିବା ବେଳେ ହଷ୍ଟେଲରେ ରୋଷେଇ କରୁଥିଲେ। ବିଦ୍ୟାଳୟର ପ୍ରଧାନ ଶିକ୍ଷକ ପ୍ରଧାନ ଏବଂ କୁକ କମ ଆଟେଣ୍ଡାଣ୍ଟ ସମ୍ପୃକ୍ତା ମହିଳାଙ୍କୁ ବିଭିନ୍ନ ସମୟରେ ଅସଦାଚରଣ କରିଆସୁଥିଲେ। ଏନେଇ ସେ କାହାକୁ କହିଲେ ଚାକିରି ହରେଇବାର ଧମକ ଦିଆଯାଉଥିଲା। ତେଣୁ ସେ କିଛିଦିନ ଧରି ଏଭଳି ନିର୍ଯାତନା ସହି ଆସୁଥିଲେ ସୁଦ୍ଧା ଭୟରେ କାହାକୁ ଜଣାଇ ନ ଥିଲେ । ପରେ ସେ ଏନେଇ ପରିବାର ଲୋକଙ୍କୁ ଜଣାଇବା ପରେ ଥାନାରେ ଲିଖିତ ଅଭିଯୋଗ କରିଥିଲେ। ପୋଲିସ ଏକ ମାମଲା (ନଂ.୨୬।୨୦) ରୁଜୁ କରି ଘଟଣାର ତଦନ୍ତ ଚଳାଇଥିଲା । ସୋମବାର ଉଭୟ ପ୍ରଧାନ ଶିକ୍ଷକ ଏବଂ କୁକ କମ ଆଟେଣ୍ଡାଣ୍ଟଙ୍କୁ ଥାନାକୁ ଆଣି ପଚରାଉଚରା କରାଯିବା ପରେ ମଙ୍ଗଳବାର ଗିରଫ କରାଯାଇଥିବା ଆଇଆଇସି ମାଝୀ କହିଛନ୍ତି ।