କେନ୍ଦୁଝର,୬ା୬(ସ୍ବ.ପ୍ର.): ସୋସୋ ଥାନା ଅନ୍ତର୍ଗତ ବଉଳା ଫାଣ୍ଡିରେ ବାଙ୍ଗୋର ପଞ୍ଚାୟତର ମହିଳା ସରପଞ୍ଚ ସୁପ୍ରଭା ରାଉତଙ୍କୁ ପୋଲିସର ମାଡ଼ ନେଇ ଓଡ଼ିଶା ତ୍ରିସ୍ତରୀୟ ପଞ୍ଚାୟତ ପରିଷଦ, ସରପଞ୍ଚ ମହାସଂଘ ପକ୍ଷରୁ ଘୋର ନିନ୍ଦା କରାଯାଇଛି। ଏନେଇ ଶନିବାର ଥାନାଧିକାରୀଙ୍କ ବିରୋଧରେ ଜିଲାପାଳଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି।ସମସ୍ତ ସରପଞ୍ଚଙ୍କୁ ସରକାର ଜିଲାପାଳ କ୍ଷମତା ପ୍ରଦାନ କରିଥିବା ବେଳେ କୋଭିଡ୍ ୧୯ ଭଳି ଗୁରୁତ୍ୱପୂର୍ଣ କାର୍ଯ୍ୟରେ ନିୟୋଜିତ ରହିଛନ୍ତି। ଗତ ୩ ତାରିଖରେ ବାଙ୍ଗୋର ପଞ୍ଚାୟତର ଅସ୍ଥାୟୀ ସ୍ବାସ୍ଥ୍ୟକେନ୍ଦ୍ରରୁ ଜଣେ ପ୍ରବାସୀ ଓଡ଼ିଆ ଘରକୁ ପଳାଇଯିବାରୁ ସ୍ଥାନୀୟ ବଉଳା ଫାଣ୍ଡିକୁ ମହିଳା ସରପଞ୍ଚ ତାଙ୍କ ସ୍ବାମୀଙ୍କ ସହିତ ଅଭିଯୋଗ କରିବାକୁ ଯାଇଥିଲେ। ପୋଲିସ ସହଯୋଗ କରିବା ପରିବର୍ତ୍ତେ ତାଙ୍କୁ ଠେଲାପେଲା କରି ମାଡ଼ ମାରିଥିବା ଅଭିଯୋଗ କରିଛନ୍ତି। ଏଣୁ ଉକ୍ତ ଥାନାଧିକାରୀଙ୍କ ବିରୋଧରେ ଆଇନ ଅନୁଯାୟୀ, କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେମାନେ ଦାବି କରିଥିବା ସରପଞ୍ଚ ସଂଘର ଜିଲା ସଭାପତି ଅଖିଳ ନାୟକ କହିଛନ୍ତି। ଏହା ଦ୍ୱାରା ସମସ୍ତ ସରପଞ୍ଚ ବିଶେଷକରି ମହିଳା ସରପଞ୍ଚମାନଙ୍କ ପଦମର୍ଯ୍ୟାଦା ହାନି ଘଟିଛି। ଏଣୁ ଦାବି ପୂରଣ ନ ହେଲେ ସମସ୍ତ ସରପଞ୍ଚ ନିଜ ନିଜ ପଞ୍ଚାୟତରେ ଚାଲିଥିବା କୋଭିଡ୍-୧୯ ଅସ୍ଥାୟୀ ସ୍ବାସ୍ଥ୍ୟକେନ୍ଦ୍ର କାର୍ଯ୍ୟରୁ ନିବୃତ୍ତ ରହିବୁ ବୋଲି ଶିରିଶପାଳ ପଞ୍ଚାୟତର ମହିଳା ସରପଞ୍ଚ ପୁଷ୍ପା ନାୟକ କହିଛନ୍ତି।