ଭବାନୀପାଟଣା,୨୪।୨(ଡି.ଏନ୍.ଏ.): କଳାହଣ୍ଡି ଜିଲା ଭବାନୀପାଟଣା ସଦର ବ୍ଲକ କଲମ ଗ୍ରାମ ମହୁଲକୋଟପଡ଼ାକୁ ବିଜୁଳି ସଂଯୋଗ ନ ହେବା ଘଟଣାରେ ଭବାନୀପାଟଣା ଖାଉଟି ଅଦାଲତ ପକ୍ଷରୁ ଏନ୍ଟିପିସି ମ୍ୟାନେଜର ଓ ୱେସ୍କୋ ବିଭାଗକୁ କାରଣ ଦର୍ଶାଅ ନୋଟିସ ଜାରି କରାଯାଇଛି।
ସୂଚନାଯୋଗ୍ୟ,ମହୁଲକୋଟପଡ଼ାରେ ୧୫୦ରୁ ଅଧିକ ବିପିଏଲ୍ ହିତାଧିକାରୀ ରହୁଛନ୍ତି। ଏହି ବିପିଏଲ୍ ପରିବାରକୁ ସୌଭାଗ୍ୟ ଯୋଜନାରେ ବିଜୁଳି ସଂଯୋଗ ପାଇଁ ଗାଁରେ ଟ୍ରାନ୍ସଫର୍ମର ଲଗାଇ ଖୁଣ୍ଟ ପୋତାଯାଇଛି। ଜନବସତି ମଧ୍ୟ ଦେଇ ୧୧ କେଭି ବିଦ୍ୟୁତ୍ ତାର ଯାଉଥିବାରୁ କେତେଜଣ ଗ୍ରାମବାସୀ ତାହାକୁ ବିରୋଧ କରୁଥିବା ଅଭିଯୋଗ ହୋଇଛି। ତେଣୁ ଗ୍ରାମ ବାହାରେ ବିଦ୍ୟୁତ୍ ତାର ଟଣାଯାଉ ନଚେତ୍ ୧୧ କେଭି ତାର ଯେଉଁଠି ସରିଛି ସେଠାରେ ଟ୍ରାନ୍ସଫର୍ମର ବସାଇ ଗ୍ରାମକୁ କେବୁଲ ମାଧ୍ୟମରେ ସମସ୍ତ ଘରକୁ ବିଜୁଳି ସଂଯୋଗ କରିବା ପାଇଁ ବିଭାଗୀୟ କର୍ତ୍ତୃପକ୍ଷଙ୍କୁ ଗ୍ରାମବାସୀ ଜଣାଇଥିଲେ। ମାତ୍ର ବିଭାଗ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ନିଆ ନ ଯିବାରୁ ୧୦ ବର୍ଷରୁ ଅଧିକ ବିଦ୍ୟୁତ୍ ବ୍ୟବହାର କରୁଥିବା ଗ୍ରାମବାସୀଙ୍କ ଟ୍ରାନ୍ସଫର୍ମରରୁ ବିଦ୍ୟୁତ୍ ତାର କାଟି ନେଇଯାଇଥିବା ପଡ଼ାବାସୀ ଜିଲାପାଳଙ୍କ ଅଭିଯୋଗ ଶୁଣାଣି ଶିବିରରେ ଅଭିଯୋଗ କରିଥିଲେ।