ଆଠମଲ୍ଲିକ,୧୧ା୮(ଡି.ଏନ.ଏ.) – ଅନୁଗୋଳ ଜିଲା ଆଠମଲ୍ଲିକ ସଦର ମହକୁମାସ୍ଥିତ ବହୁ ପୁରାତନ ମହେନ୍ଦ୍ର ହାଇସ୍କୁଲ ଏବେ ଅବ୍ୟବସ୍ଥା ମଧ୍ୟରେ ଗତି କରୁଛି। ଏଠାରେ ପଢୁଥିବା ଛାତ୍ରୀଛାତ୍ରଙ୍କୁ ଉପଯୁକ୍ତ ଶିକ୍ଷା ପ୍ରଦାନରେ ସମସ୍ୟା ହେଉଥିଲେ ହେଁ ବିଭାଗୀୟ ଉଦସୀନତା ଯୋଗୁ ଏହାର ସମାଧାନ ହୋଇପାରୁ ନ ଥିବା ଅଭିଯୋଗ ହୋଇଛି। ଏହାକୁ ନେଇ ଗ୍ରାମବାସୀ ତଥା ଅଭିଭାବକଙ୍କ ମହଲରେ ତୀବ୍ର ଅସନ୍ତୋଷ ଦେଖାଦେଇଛି।
୧୯୪୭ରେ ଭିକ୍ଟୋରିଆ ଏମଇ ସ୍କୁଲରୁ ମହେନ୍ଦ୍ର ହାଇସ୍କୁଲରେ ପରିଣତ ହୋଇଥିବା ଏହି ବିଦ୍ୟାଳୟରେ ଶିକ୍ଷକ ଓ ଶ୍ରେଣୀଗୃହ ଅଭାବ ମୁଖ୍ୟ ସମସ୍ୟା ଭାବେ ଉଭା ହୋଇଛି। ମୋଟ ୬୩୮ ଛାତ୍ରୀଛାତ୍ରଙ୍କ ପାଇଁ ଏଠାରେ ୨୦ ପରିବର୍ତ୍ତେ ମାତ୍ର ୧୦ ଜଣ ଶିକ୍ଷକ ରହିଛନ୍ତି। ସେମାନଙ୍କ ମଧ୍ୟରୁ ଜଣେ ଶିକ୍ଷୟିତ୍ରୀ ଦୀର୍ଘ ଦିନ ହେଲା ଛୁଟିରେ ଅଛନ୍ତି। ଗତ ଏପ୍ରିଲଠାରୁ ହାଇସ୍କୁଲର ପ୍ରଧାନ ଶିକ୍ଷକ ପଦବୀ ଖାଲି ପଡିଛି। ସେହିପରି ଜଣେ ଲେଖାଏ ଟ୍ରେଣ୍ଡ ଗ୍ରାଜୁଏଟ୍ (ଆଟର୍ସ, ସାଇନ୍ସ), ଟ୍ରେଣ୍ଡ ଇଣ୍ଟରମିଡିଏଟ୍ ୨ ଜଣ, ଟ୍ରେଣ୍ଡ ମାଟ୍ରିକ୍ ୨ ଜଣ, ପିଇଟି ଶିକ୍ଷକ ପଦବୀ ବର୍ଷ ବର୍ଷ ଧରି ଖାଲି ପଡିଛି। ଶିକ୍ଷକ ଅଭାବ ଯୋଗୁ ନବମ ଶ୍ରେଣୀର ୧୫୦ ଜଣ ଛାତ୍ରୀଛାତ୍ର ଗୋଟିଏ ହଲରେ ବସି ପାଠ ପଢିବାକୁ ବାଧ୍ୟ ହେଉଛନ୍ତି। ନବମରେ ୪ଟି ସେକ୍ସନ୍ ପରିବର୍ତ୍ତେ ଗୋଟିଏ ସେକ୍ସନ୍ରେ କ୍ଲାସ୍ ଚାଲିଥିବାରୁ ଛାତ୍ରୀଛାତ୍ର ବହୁ ହଇରାଣ ହେଉଛନ୍ତି। ସେହିପରି ୧୦ମ ଶ୍ରେଣୀରେ ୧୬୬ ଛାତ୍ରୀଛାତ୍ର ରହିଥିବା ମାତ୍ର ୨ଟି ସେକ୍ସସନ୍ରେ ପାଠପଢା ଚାଲିଛି। ଏଥିସହ ସ୍କୁଲର କିରାନି, ପିଅନ, ରାତ୍ର ଜଗୁଆଳି ପଦବୀ ମଧ୍ୟ ପୂରଣ କରାଯାଉନାହିଁ। ଭିତ୍ତିଭୂମିର ବିକାଶ କରାଯାଉ ନ ଥିବାରୁ ପିଲାମାନେ ପାଠପଢା ସହ ଖେଳକୁଦରୁ ମଧ୍ୟ ବଞ୍ଚିତ ହେଉଛନ୍ତି। ତୁରନ୍ତ ଏ ଦିଗରେ ସରକାରଙ୍କ ପକ୍ଷରୁ ଦୃଷ୍ଟି ଦିଆଯିବାକୁ ଦାବି ହୋଇଛି। ଏ ସମ୍ପର୍କରେ ଭାରପ୍ରାପ୍ତ ପ୍ରଧାନ ଶିକ୍ଷକ ସୁଧାଂଶୁ ଶେଖର ପ୍ରଧାନ କହିଛନ୍ତି, କହିଲେ ଶିକ୍ଷକ ଅଭାବ ସମ୍ପର୍କରେ ଜିଲା ଶିକ୍ଷାଅଧିକାରୀଙ୍କ ସମେତ ସ୍ଥାନୀୟ ବିଧାୟକ, ଅନୁଗୋଳ ଜିଲାପାଳଙ୍କ ଦୃଷ୍ଟି ଆକର୍ଷଣ କରାଯାଇଛି।