ଆଠମଲ୍ଲିକ,୨୫ା୧୨(ଡି.ଏନ.ଏ.) – ସରକାରୀ ଉଦାସୀନତା ତଥା ଶିକ୍ଷା ବିଭାଗର ଚରମ ଅବହେଳା ଯୋଗୁ ଆଠମଲ୍ଲିକ ସଦର ମହକୁମାରେ ଥିବା ମହେନ୍ଦ୍ର ହାଇସ୍କୁଲର ଶିକ୍ଷା ବ୍ୟବସ୍ଥା ବିପର୍ଯ୍ୟସ୍ତ ହୋଇପଡିଛି। ଏକଦା ଜିଲାର କେତୋଟି ଅଗ୍ରଣୀ ହାଇସ୍କୁଲ ମଧ୍ୟରେ ପରିଗଣିତ ହେଉଥିବା ଏହି ବିଦ୍ୟାଳୟର ଅବସ୍ଥା ବର୍ତ୍ତମାନ ଦୟନୀୟ ହୋଇପଡ଼ିଥିବା ଅଭିଯୋଗ ହେଉଛି। ଆବଶ୍ୟକ ଶିକ୍ଷକ ନ ଥିବାରୁ ୧୫୦ ପିଲାଙ୍କୁ ଗୋଟିଏ ହଲ୍ରେ ବସାଯାଇ ପଢ଼ାଯାଉଥିବାରୁ ଅଭିଭାବକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।
୧୯୪୭ରେ ଆଠମଲ୍ଲିକ ସହରରେ ସ୍ଥାପିତ ମହେନ୍ଦ୍ର ହାଇସ୍କୁଲ ଶିକ୍ଷାଦାନରେ ବେଶ୍ ଅଗ୍ରଣୀ ଥିଲା। ଏଠାକାର ଶିକ୍ଷାର୍ଥୀଙ୍କ ମଧ୍ୟରୁ କିଏ ଆଇଏଏସ୍ ତ କିଏ ଆଇପିଏସ୍ ଅଫିସର ହୋଇ ନିଜ ବିଦ୍ୟାଳୟ ପାଇଁ ସୁନାମ ଅର୍ଜନ କରିପାରିଛନ୍ତି। ଏପରିକି ବର୍ତ୍ତମାନର ବିଧାୟକ ରମେଶ ଚନ୍ଦ୍ର ସାଏ ମଧ୍ୟ ଏହି ସ୍କୁଲର ଛାତ୍ର ଥିଲେ। କିନ୍ତୁ ବିଡମ୍ବନାର ବିଷୟ ଯେ, ଏବେ ଏହି ମହେନ୍ଦ୍ର ହାଇସ୍କୁଲରେ ଛାତ୍ରୀଛାତ୍ର ସଂଖ୍ୟା ୫୩୨ ଥିଲେ ବି ମାତ୍ର ୭ ଜଣ ଶିକ୍ଷକରେ ଶିକ୍ଷାଦାନ ଚାଲୁଛି। ଗତ ଏପ୍ରିଲରୁ ପ୍ରଧାନ ଶିକ୍ଷକ ଅବସର ନେବା ପରେ ଉକ୍ତ ପଦବୀ ଖାଲି ପଡିଛି। ସେହିପରି ପୋଷ୍ଟ ଗ୍ରାଜୁଏଟ୍ (କଳା)ରେ ଗୋଟିଏ, ଟ୍ରେଣ୍ଡ ଇଣ୍ଟରମିଡିଏଟ୍ ୨ଟି, ଟ୍ରେଣ୍ଡ ମାଟ୍ରିକ୍ ୨ଟି, ପିଇଟି ୧ଟି ପଦବୀ ଖାଲି ପଡିଛି। ଆବଶ୍ୟକ ସଂଖ୍ୟକ ଶିକ୍ଷକ ନ ଥିବାରୁ ସେକ୍ସନ କରାଯାଇ ପିଲାଙ୍କୁ ପଢ଼ାଯାଇପାରୁ ନାହିଁ। ନବମ ଶ୍ରେଣୀର ୧୫୦ ଛାତ୍ରୀଛାତ୍ରଙ୍କୁ ୪ଟି ସେକ୍ସନ କରା ନ ଯାଇ ଗୋଟିଏ ହଲ୍ରେ ବସାଯାଉଛି। ସେହିପରି ଦଶମ ଶ୍ରେଣୀରେ ଛାତ୍ରୀଛାତ୍ରଙ୍କ ସଂଖ୍ୟା ୧୫୩। ଏମାନଙ୍କୁ ୪ଟି ବଦଳରେ ୨ଟି ସେକ୍ସନ କରାଯାଇଛି। ଏ ସମ୍ପର୍କରେ ସ୍ଥାନୀୟ ଭାରପ୍ରାପ୍ତ ପ୍ରଧାନ ଶିକ୍ଷକ ସୁଧାଂଶୁ ଶେଖର ପ୍ରଧାନ କହିଛନ୍ତି, ହାଇସ୍କୁଲର ସମସ୍ୟା ସମ୍ପର୍କରେ ଆମେ ଉଚ୍ଚ କର୍ତ୍ତୃପକ୍ଷଙ୍କୁ ବହୁବାର ଜଣାଇଛୁ। ମାତ୍ର ଏଯାବତ୍ କୌଣସି ସୁଫଳ ମିଳିନାହିଁ।