ନ୍ୟୁୟର୍କ,୧୮।୫: କିମ୍ବଦନ୍ତୀ ଆମେରିକୀୟ ବାସ୍କେଟବଲ୍ ଖେଳାଳି ମାଇକେଲ ଜୋର୍ଡାନଙ୍କ ଏକ ଜୋତା ରେକର୍ଡ ୫ ଲକ୍ଷ ୬୦ ହଜାର ଡଲାର ବା ୪ କୋଟି ୨ ଲକ୍ଷ ଟଙ୍କାରେ ବିକ୍ରି ହୋଇଛି। ଆମେରିକାର ନ୍ୟାଶନାଲ ବାସ୍କେଟବଲ୍ ଲିଗ୍ (ଏନ୍ବିଏ) ଏକ ମ୍ୟାଚ୍ରେ ଜୋର୍ଡାନ ଏହି ଜୋତା ‘ଏୟାର ଜୋର୍ଡାନ’ ପିନ୍ଧିଥିଲେ। ବାସ୍କେଟବଲ ଯୋତା ହିସାବରେ ଏହା ରେକର୍ଡ ମୂଲ୍ୟ ବୋଲି କୁହାଯାଇଛି। ଧଳା, କଳା ଓ ଲାଲରଙ୍ଗ ବିଶିଷ୍ଟ ଏହି ଯୋତାକୁ ଜୋର୍ଡାନ ୧୯୮୫ରେ ନିଜ ପାଇଁ ତିଆରି କରିଥିଲେ। ଏଥିରେ ଜୋର୍ଡାନଙ୍କ ଅଟୋଗ୍ରାଫ୍ ରହିଛି। ଏକ ଅନ୍ଲାଇନ୍ ନିଲାମ ମାଧ୍ୟମରେ ଏହି ଜୋତା ବିକ୍ରି ହୋଇଛି। ସ୍ବତନ୍ତ୍ର ଭାବେ ଜୋର୍ଡାନଙ୍କ ପାଇଁ ଏହି ଯୋତା ତିଆରି କରାଯାଇଥିଲା। ଏହି କ୍ରମରେ ‘ମୁନ୍ ଶୁ’ ରେକର୍ଡକୁ ମଧ୍ୟ ଏହି ଯୋତା ଅତିକ୍ରମ କରିଛି। ଜଣାଶୁଣା ‘ସୋଥବୀ ନିଲାମଘରେ’ ଏହି ଯୋତା ବିକ୍ରି ହୋଇଥିଲା।
ଉଲ୍ଲେଖଥାଉ କି, ୨୦୧୯ ଜୁଲାଇରେ ସୋଥବୀ ନିଲାମ ଘରେ ‘ମୁନ୍ ଶୁ’ ଜୋତା ନିଲାମ ହୋଇଥିଲା ଓ ଏହା ୪ ଲକ୍ଷ ୩୭ ହଜାର ଡଲାରରେ ବିକ୍ରି ହୋଇଥିଲା। ୧୯୭୨ରେ ନାଇକ କମ୍ପାନୀର ରନିଂ ଶୁ ‘ମୁନ୍ ଶୁ’ ସେତେବେଳେ ଚର୍ଚ୍ଚା ସୃଷ୍ଟି କରିଥିଲା। ଜୋର୍ଡାନଙ୍କ ସବୁ ଜୋତା ଭଳି ଏହି ଜୋତା ମଧ୍ୟ ପରସ୍ପରକୁ ମ୍ୟାଚ୍ କରୁ ନ ଥିଲା। ବାମ ଓ ଡାହାଣ ଜୋତାର ଆକାର ଯଥାକ୍ରମମେ ୧୩ ଓ ୧୩.୫ ଥିଲା। ଏୟାର ଜୋର୍ଡାନ ବ୍ରାଣ୍ଡର ୩୫ତମ ବାର୍ଷିକୀରେ ଏହି ନିଲାମର ଆୟୋଜନ ହୋଇଥିଲା। ଏହି ଜୋତା ୧ରୁ ଦେଢ ଲକ୍ଷ ଡଲାରରେ ବିକ୍ରି ହେବ ବୋଲି ଆଶା କରାଯାଉଥଲା। ତେବେ ଶେଷରେ ରେକର୍ଡ ଦାମ୍ରେ ବିକ୍ରି ହୋଇଛି ବୋଲି ସୋଥବୀ ତରଫରୁ କୁହାଯାଇଛି। ଉଲ୍ଲେଖଥାଉ କି, ଜୋର୍ଡାନ ବିଶ୍ୱର ଅନ୍ୟତମ ଶ୍ରେଷ୍ଠ ବାସ୍କେଟବଲ ଖେଳାଳି ରୂପେ ପରିଗଣିତ ହୁଅନ୍ତି। ଏନ୍ବିଏରେ ସେ ୧୫ଟି ସିଜନରେ ଅଂଶଗ୍ରହଣ କରିଥିଲେ ଓ ଶିକାଗୋ ବୁଲ୍ସକୁ ୬ଥର ଚାମ୍ପିୟନ କରାଇବାରେ ମୁଖ୍ୟ ଭୂମିକା ଗ୍ରହଣ କରିଥିଲେ।