ଲଣ୍ଡନ, ୨୧ା୫ (ପି.ଟି.)-ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଦାନ ଆକାରରେ ଓ୍ବେଷ୍ଟଇଣ୍ଡିଜ କ୍ରିକେଟ ବୋର୍ଡ (ସିଡବ୍ଲ୍ୟୁଆଇ)କୁ ଦେଇଥିବା ଅଧା ନିୟୁତ ଡଲାରର ଠିକଣା ଉପଯୋଗ କରିନାହିଁ। ଏହି ଅଭିଯୋଗ କରିଛନ୍ତି ଦେଶର ମହାନ୍ ଫାଷ୍ଟ ବୋଲର ମାଇକେଲ ହୋଲ୍ଡିଂ। ଏକ ୟୁଟ୍ୟୁବ୍ କାର୍ଯ୍ୟକ୍ରମରେ ଅଂଶଗ୍ରହଣ କରି ପ୍ୟାନେଲ କେର୍ ଫୋଷ୍ଟର(ପିକେଏଫ୍)ର ଅଡିଟ୍ ରିପୋର୍ଟକୁ ସେ ଉପସ୍ଥାପନ କରିଥିଲେ। କ୍ୟାରିବିୟନରେ କ୍ରିକେଟ ପରିଚାଳନାରେ ଅନେକ ତ୍ରୁଟି ରହିଥିବା ଏହି ରିପୋର୍ଟରେ ଦର୍ଶାଯାଇଛି। ୨୦୧୩-୧୪ରେ ବିସିସିଆଇ ୫ଲକ୍ଷ ଆମେରିକୀୟ ଡଲାର ଦାନ କରିଥିଲା। ଏହି ଅର୍ଥକୁ ବିଶେଷ କରି ପୂର୍ବତନ ଖେଳାଳିମାନଙ୍କ ଉଦ୍ଦେଶ୍ୟରେ ଖର୍ଚ୍ଚ କରିବା ଲାଗି କହିଥିଲା। ମାତ୍ର ତାହା କରାଯାଇ ନାହିଁ। ମୁଁ ଜଣେ ପୂର୍ବତନ ଖେଳାଳି, ଦାନ ଅର୍ଥରୁ ମୋତେ କିଛି ମିଳୁ ବୋଲି ମୁଁ ଦାବି କରୁନାହିଁ। କିନ୍ତୁ ବହୂ ପୂର୍ବତନ ଖେଳାଳି ଅଛନ୍ତି, ଯେଉଁମାନେ ଏ ବିଷୟରେ କିଛି ଜାଣନ୍ତି ନାହିଁ ଅବା ଟଙ୍କାଟିଏ ହେଲେ ପାଇ ନାହାନ୍ତି। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡଠାରୁ ମିଳିଥିବା ଏହି ଅର୍ଥକୁ କେଉଁ ବାଟେ ଖର୍ଚ୍ଚ କରାଯାଇଛି ସେ ସମ୍ପର୍କରେ ମୁଁ ଖୁବ୍ଶୀଘ୍ର ଜଣାଇବି ବୋଲି କହିଛନ୍ତି ୬୬ ବର୍ଷୀୟ ହୋଲ୍ଡିଂ। ସିଡବ୍ଲ୍ୟୁଆଇ ଅଡିଟ୍ ରିପୋର୍ଟକୁ କାହିଁକି ସାଧାରଣରେ ପ୍ରକାଶ କଲା ନାହିଁ ସେ ନେଇ ପ୍ରଶ୍ନ ଉଠାଇଥିଲେ। ରିପୋର୍ଟରେ ଯାହା ଉଲ୍ଲେଖ କରାଯାଇଛି, ଯଦି ଅଧିକ ପ୍ରକାଶ କରିବି ତେବେ ମୁଁ ନିଜେ ଉତ୍ତେଜିତ ହୋଇପଡ଼ିବି।