ମେଡିକାଲ ବିଶେଷଜ୍ଞଙ୍କ ଏକ ଦଳ ନିକଟରେ ଦାବି କରିଛନ୍ତି କି ମାଉଥ ଓ୍ବାଶରେ କରୋନା ଭୂତାଣୁକୁ ମାରିବାର କ୍ଷମତା ରହିଛି। ଏହା ଶରୀର ଭିତରକୁ ସଂକ୍ରମଣ କରିବା ପୂର୍ବରୁ ଗଳାରେ ଥିବା ଅବସ୍ଥାରେ ମାଉଥ୍ ଓ୍ବାଶ ଦ୍ୱାରା ମରିଯାଇଥାଏ। କିନ୍ତୁ ଏହାପୂର୍ବରୁ ବିଶ୍ୱ ସ୍ବାସ୍ଥ୍ୟ ସଙ୍ଗଠନ(ଡବ୍ଲୁଏଚ୍ଓ) ମାଉଥ୍ ଓ୍ବାଶକୁ ନେଇ ଭିନ୍ନ କଥା କହିଥିଲା। ଡବ୍ଲୁଏଚ୍ଓ କହିଥିଲା ମାଉଥ୍ ଓ୍ବାଶ କରୋନା ଭୂତାଣୁକୁ ମାରିବାର କୌଣସି ପ୍ରମାଣ ନାହିଁ। ହେଲେ ଅକ୍ସଫୋର୍ଡ ୟୁନିଭର୍ସିଟି ପ୍ରେସ୍ର ଫଙ୍କଶନ ମାଗାଜିନରେ ଛପା ଯାଇଥିବା ଏକ ଅଧ୍ୟୟନ ଅନୁଯାୟୀ, ମାଉଥ୍ ଓ୍ବାଶରେ କରୋନା ଭୂତାଣୁକୁ ମାରିବାର କ୍ଷମତା ରହିଛି। ତେଣୁ ଏହାର କ୍ଲିନିକାଲ ଟେଷ୍ଟ କରିବା ଜରୁରୀ। ବ୍ରିଟେନର କାର୍ଡିଫ ୟୁନିଭର୍ସିଟିର ଗବେଷକଙ୍କ ଦ୍ୱାରା ଏହି ଅଧ୍ୟୟନ କରାଯାଇଥିବା କୁହାଯାଉଛି। ଏହାକୁ କେବଳ ବ୍ରିଟେନ ନୁହେଁ ବରଂ କଲରାଡୋ, ଅଟାଓ୍ବା, ବାର୍ସିଲୋନା ସମେତ ଆଉ କିଛି ୟୁନିଭର୍ସିଟିର ସମର୍ଥନ ରହିଥିବା ଜଣାପଡିଛି। ତେବେ ଗବେଷକମାନେ ଏହା ସ୍ପଷ୍ଟ କରି ନାହାନ୍ତି କି ବଜାରରେ ମିଳୁଥିବା ମାଉଥ୍ ଓ୍ବାଶ କରୋନା ଭୂତାଣୁକୁ ମାରିବ କି ଏଥିପାଇଁ କିଛି ସ୍ବତନ୍ତ୍ର ମାଉଥ୍ ଓ୍ବାଶ ରହିଛି। ହେଲେ ଏହାକୁ ନେଇ ଗବେଷଣା କରାଗଲେ ଲାଭ ମିଳିପାରେ ବୋଲି ସେମାନେ କହିଛନ୍ତି। ସେମାନଙ୍କ ମତରେ କରୋନା ଭାଇରସ ହେଉଛି ‘Enveloped Viruses’ ଶ୍ରେଣୀର। ଏହାର ଅର୍ଥ ହେଉଛି ଏହା ଏକ ଫ୍ୟାଟି ଲେୟାର ଦ୍ୱାରା ଆବରଣ ହୋଇରହିଛି। ଏହି ଲେୟାର କିଛି ସ୍ବତନ୍ତ୍ର ଧରଣର କେମିକାଲ ଦ୍ୱାରା ନଷ୍ଟ ହୋଇଯାଇଥାଏ। ତେଣୁ କରାଯାଇଥିବା ଅଧ୍ୟୟନରେ କୁହାଯାଇଛି କି ମାଉଥ୍ ଓ୍ବାଶ କରୋନା ଭାଇରସର ବାହାର ଆବରଣକୁ ନଷ୍ଟ କରିଦେଇପାରେ। ଟେଷ୍ଟ ଟ୍ୟୁବରେ ଯେଉଁ ପରୀକ୍ଷା କରାଯାଇଥିଲା ସେଥିରୁ ଜଣାପଡିଛି କି କେତେକ ମାଉଥ୍ ଓ୍ବାଶରେ ଏମିତି କିଛି ପଦାର୍ଥ ରହିଛି ଯାହା ଏନଭଲପଡ ଭାଇରସର ବାହାର ଆବରଣକୁ ନଷ୍ଟ କରିଦେଉଛି। ଗବେଷଣାରେ କୁହାଯାଇଛି କି ଦାନ୍ତକୁ ସଫା କରିବାକୁ ବ୍ୟବହାର କରାଯାଉଥିବା ମାଉଥ୍ ଓ୍ବାଶରେ ଏମିତି କିଛି କେମିକାଲ ରହିଛି ଯାହା ସଂକ୍ରମଣକୁ ରୋକିବାରେ ସାହାଯ୍ୟ କରିପାରେ।