ଦାରିଙ୍ଗବାଡ଼ି,୨୫।୧୦(ଡି.ଏନ୍.ଏ): କନ୍ଧମାଳ ଜିଲା ଦାରିଙ୍ଗବାଡ଼ିରୁ ବାଲିଗୁଡ଼ାକୁ ସଂଯୋଗ କରୁଥିବା ୫୯ ନଂ. ଜାତୀୟ ରାଜପଥରେ ଗୁରୁବାର ସନ୍ଧ୍ୟାରେ ମାଓବାଦୀଙ୍କ ପକ୍ଷରୁ ଗଛ କାଟି ରାସ୍ତା ଅବରୋଧ କରିବା ସହ ଲାଲ୍ ବ୍ୟାନର ଲଗାଇଥିଲେ। ଉକ୍ତ ବ୍ୟାନରରେ ସେମାନେ ବିଭିନ୍ନ ଦାବିନେଇ ଶୁକ୍ରବାର ୨୪ ଘଣ୍ଟିଆ ଓଡ଼ିଶା ବନ୍ଦ ଡାକରା ଦେଇଛନ୍ତି।
ଉକ୍ତ ବ୍ୟାନରରେ ସେମାନେ ଉଲ୍ଲେଖ କରିଛନ୍ତି ଯେ, ପୋଲିସ ଦମନରେ ୨୫ ତାରିଖରେ ୨୪ ଘଣ୍ଟିଆ ଓଡ଼ିଶା ବନ୍ଦକୁ ସଫଳ କରିବାକୁ ସେମାନେ ଜନସାଧାରଣଙ୍କୁ ନିବେଦନ କରିଛନ୍ତି। ଏଥି ସହ ପ୍ରାକୃତିକ ସମ୍ପଦ ବହୁରାଷ୍ଟ୍ରୀୟ କମ୍ପାନୀ ଦଲାଲ୍ଙ୍କୁ ଟେକିଦେବା ପାଇଁ ଅପରେଶନ ଗ୍ରୀନହଣ୍ଟ ସମାଧାନ ଯୋଜନା ବିରୋଧ ଲାଗି ନିବେଦନ କରାଯାଇଛି। ଅସଲ ଗଣତାନ୍ତ୍ରିକ ଓ ଧର୍ମ ନିରପେକ୍ଷତା ପାଇଁ ଦେଶବ୍ୟାପୀ ଜନଆନ୍ଦୋଳନ କରିବାକୁ କୁହାଯାଇଛି।
ସୂଚନାଯୋଗ୍ୟ, ଗୁରୁବାର ସନ୍ଧ୍ୟାରୁ ଉକ୍ତ ଜାତୀୟ ରାଜପଥରେ ଗାଡ଼ିମୋଟର ବନ୍ଦ ଯୋଗୁ ସାଧାରଣ ଲୋକେ ହଇରାଣ ହେବା ସହ ଆମ୍ବୁଲାନ୍ସ ଅଟକି ରହିଛି। ଅଞ୍ଚଳରେ ମାଓବାଦୀଙ୍କ ଉପସ୍ଥିତି ଥିବା ଆଶଙ୍କା କରି କୋକୁଆ ଭୟ ସୃଷ୍ଟି ହୋଇଛି। ସେହିପରି ସେଠାରେ ମାଓବାଦୀ ଲ୍ୟାଣ୍ଡମାଇନ ଖଞ୍ଜିଥାଇ ପାରନ୍ତି ବୋଲି ପୋଲିସ ସନ୍ଦେହ କରିଛି। ଫଳରେ ଘଟଣାସ୍ଥଳରେ କୌଣସି ପୋଲିସ ପହଞ୍ଚି ନ ଥିବା ଜଣାପଡ଼ିଛି।