ରାୟପୁର, ୧୫।୬: ପାକିସ୍ତାନ ମାଓବାଦୀଙ୍କୁ ଅସ୍ତ୍ରଶସ୍ତ୍ର ଯୋଗାଉଥିବା କଥା ଏବେ ସ୍ପଷ୍ଟ ହୋଇଛି। ନିକଟରେ ଛତିଶଗଡ଼ ଉତ୍ତର ବସ୍ତରର କାଙ୍କେରରେ ପୋଲିସ ଏବଂ ମାଓବାଦୀ ମୁହାଁମୁହିଁ ହେବା ପରେ ଜବତ ହୋଇଥିବା ଅସ୍ତ୍ରଶସ୍ତ୍ର ମଧ୍ୟରେ ପାକିସ୍ତାନ ଆର୍ମିର ରାଇଫଲ ଥିବା କୁହାଯାଉଛି। ପାକିସ୍ତାନ ଗୋଇନ୍ଦା ସଂସ୍ଥା ଆଇଏସ୍ଆଇ ଭାରତରେ ଅଶାନ୍ତି ସୃଷ୍ଟି ପାଇଁ ମାଓବାଦୀ ଏବଂ ଖଲିସ୍ତାନ ଆତଙ୍କବାଦୀ ସମେତ ଅନ୍ୟ ବିଚ୍ଛିନ୍ନତାବାଦୀ ସଂଗଠନ ସହିତ ଯୋଗାଯୋଗରେ ରହିଥିବା କୁହାଯାଉଛି। ଏଥିରେ ପାକିସ୍ତାନ ଆର୍ମି ଏବଂ କିଛି ଆତଙ୍କବାଦୀ ସଂଗଠନକୁ ସାମିଲ୍ କରାଯାଇଛି। ଜବତ ହୋଇଥିବା ରାଇଫଲ ଜର୍ମାନୀର ହେକଲର୍ ଆଣ୍ଡ୍ କୋଚ୍ କମ୍ପାନୀ ଦ୍ୱାରା ନିର୍ମାଣ କରିଥିବା ଜଣାପଡ଼ିଛି। ଏହାକୁ ପାକିସ୍ତାନ ଆର୍ମି ବ୍ୟବହାର କରୁଥିବା କୁହାଯାଉଛି। ଏହାକୁ ନେଇ ଭାରତୀୟ ସୁରକ୍ଷା ଏଜେନ୍ସି ଗୁଡ଼ିକୁ ସଜାଗ ରହିବାକୁ ନିର୍ଦ୍ଦେଶ ଦିଆଯାଇଛି।
