ଭଟଲି,୧୨ା୪(ଡି.ଏନ୍.ଏ.) : ଦିନକୁଦିନ କରୋନା ଭୟାବହତା ରାଜ୍ୟରେ ବଢ଼ିଚାଲିଛି। ଏହି ପରିସ୍ଥିତିକୁ ଦୃଷ୍ଟିରେ ରଖି ସରକାର ଗତ ୯ତାରିଖରୁ ସମସ୍ତଙ୍କ ପାଇଁ ମାସ୍କ ପିନ୍ଧିବା ପାଇଁ ବାଧ୍ୟ କରିଛନ୍ତି। ଅନ୍ୟପଟେ ଗ୍ରାମାଞ୍ଚଳରେ ମାସ୍କ ମିଳୁନାହିଁ। ସେଥିପାଇଁ କେତେକ ସଂଗଠନ ପକ୍ଷରୁ ରବିବାର ଭଟଲି ଦୈନିକ ପରିବା ବଜାର ପରିସରରେ ଲୋକଙ୍କୁ ମାଗଣାରେ ମାସ୍କ ବଣ୍ଟନ କରାଯାଇଛି। ଏହାସହିତ ପ୍ରତ୍ୟେକ ବ୍ୟକ୍ତିଙ୍କୁ ପ୍ରତିଦିନ ମାସ୍କ ବ୍ୟବହାର କଲେ କରୋନା ଭଳି ଭୂତାଣୁ ଦୂରେଇ ହେବ ବୋଲି ସଚେତନ କରାଯାଇଥିଲା। ଏହି ଅବସରରେ ଭଟଲି ଚିରଞ୍ଜିଲାଲ ଚାରିଟେବୁଲ ଟ୍ରଷ୍ଟ ପକ୍ଷରୁ ଟ୍ରଷ୍ଟର ମୁଖ୍ୟ କହ୍ନେୟାଲାଲ ଅଗ୍ରୱାଲ, କୌସ୍ତୁବ ସାହୁଙ୍କ ସମେତ ଭଟଲି ବଣିକ ସଂଘ ସଦସ୍ୟ ରାଜେଶ ଅଗ୍ରୱାଲ, ରାଧେଶ୍ୟାମ ପଣ୍ଡା, ନରସିଂହ ସାହୁ, ଅର୍ଜୁନ ସାହୁ ପ୍ରମୁଖ ମାଗଣାରେ ୪୦୦ ମାସ୍କ ବଣ୍ଟନ କରିଥିଲେ। ସେହିପରି ଭଟଲି ଭାଜପା ପକ୍ଷରୁ ରାଜ୍ୟ ଯୁବ ଭାଜପା ସମ୍ପାଦକ ଇରାସିସ୍ ଆଚାର୍ଯ୍ୟ, ଅଚ୍ୟୁତ ବୁଧିଆ, ପ୍ରତାପ ପଧାନ, ଫାରୁକ ଖାଁ, ସରୋଜ ବେହେରା, କ୍ଷୀରୋଦ ପଧାନ ପ୍ରମୁଖ ଲୋକଙ୍କୁ ମାଗଣାରେ ୧୨୦୦ ମାସ୍କ ବଣ୍ଟନ କରିଥିଲେ। ଏହି ଅବସରରେ ଭଟଲି ବିଡିଓ ଧୀରେନ୍ଦ୍ର ସେଠୀ, ଭଟଲି ଥାନା ଅଧିକାରୀ ରଞ୍ଜିତ କୁମାର ନାଏକ ପ୍ରମୁଖ ପୋଲିସ କର୍ମଚାରୀମାନେ ବଜାରରେ ବୁଲି ଉଭୟ ଚାଷୀ ଏବଂ ଖାଉଟିମାନଙ୍କ ପାଖକୁ ଯାଇ ପ୍ରତ୍ୟହ ମାସ୍କ ପିନ୍ଧିବା ସହିତ ସାମାଜିକ ଦୂରତା ବଜାୟ ରଖିବାକୁ ପରାମର୍ଶ ଦେଇଥିଲେ।