ପଶ୍ଚିମବଙ୍ଗର ଜଲପାଈଗୁଡ଼ି ଜିଲା ଅନ୍ତର୍ଗତ ଢାଲାବାରୀ ଗାଁ ନିବାସୀ କରିମ୍ ଉଲ୍-ହକ୍ ଏବେ ଆମ୍ବୁଲାନ୍ସ ଦାଦା ନାଁରେ ବେଶ୍ ପରିଚିତ। କରିମ୍ ଏକ ଚା’ ବଗିଚାରେ କାମ କରନ୍ତି। କିନ୍ତୁ ରୋଗୀ, ଗରିବ ଏବଂ ଦୁର୍ବଳ ଲୋକଙ୍କୁ ନିଜ ବାଇକ୍ରେ ବସାଇ ଜିଲା ହସ୍ପିଟାଲ୍ରେ ପହଞ୍ଚାଇବା ତାଙ୍କର ପ୍ରଥମ କର୍ତ୍ତବ୍ୟ ବୋଲି ଧରିନେଇଛନ୍ତି। ତାଙ୍କର ଏହି ସେବାକୁ ଲୋକେ ପ୍ରଥମେ ଦେଖାଣିଆ ବୋଲି ଭାବୁଥିଲେ। ପରେ ଜାଣିଲେ ଏହା କରିମ୍ଙ୍କର ନିଃସ୍ବାର୍ଥପର ସେବା। ପ୍ରକୃତରେ କରିମ୍ ଯେଉଁ ଅଞ୍ଚଳରେ ରହୁଛନ୍ତି, ଆଜକୁ ପ୍ରାୟ ୨୦ ବର୍ଷ ପୂର୍ବେ ଏଠାରେ କୌଣସି ପ୍ରକାର ଯାତାୟାତ କିମ୍ବା ସ୍ବାସ୍ଥ୍ୟସେବା ଉପଲବ୍ଧ ନ ଥିଲା। ତେଣୁ ଆଖି ସାମ୍ନାରେ ନିଜ ମା’ଙ୍କୁ ରୋଗରେ ପଡ଼ି ମୃତ୍ୟୁବରଣ କରିଥିବା ଅଙ୍ଗେ ନିଭାଇଥିଲେ। ଏଘଟଣା ତାଙ୍କ ମନକୁ ଏଭଳି ଭାବେ ଆଘାତ ଦେଇଥିଲା ଯେ, ସେ ଆଖି ସାମ୍ନାରେ କୌଣସି ରୋଗୀଙ୍କୁ ଦେଖିଲେ ତୁରନ୍ତ ହସ୍ପିଟାଲରେ ପହଞ୍ଚାଇବାର ବାଟ ଖୋଜୁଥିଲେ। ଏହି ସେବା ପାଇଁ ତାଙ୍କ ସାଥୀ ପାଲଟିଛି ବାଇକ୍। କରିମ୍ ନିଜ ବାଇକ୍ରେ ୪୦-୫୦ କିମି ଦୂର ପର୍ଯ୍ୟନ୍ତ ରୋଗୀଙ୍କୁ ବୋହି ହସ୍ପିଟାଲରେ ପହଞ୍ଚାଉଛନ୍ତି। ଏହି ସେବା ଯୋଗୁ ଅନେକ ନିରୀହ ଜୀବନ ଅକାଳ ମୃତ୍ୟୁମୁଖରୁ ବର୍ତ୍ତିପାରୁଛି। କେବଳ ସେତିକି ନୁହେଁ, ଏଭଳି ଆମ୍ବୁଲାନ୍ସ ସେବା ଯୋଗାଉଥିବାରୁ ତାଙ୍କୁ ପଦ୍ମଶ୍ରୀ ସମ୍ମାନରେ ମଧ୍ୟ ସମ୍ମାନିତ କରାଯାଇଛି।
