ଢେଙ୍କାନାଳ ଅଫିସ, ୯ା୨ – ବିଶ୍ୱପ୍ରସିଦ୍ଧ ଯୋରନ୍ଦା ମାଘମେଳାର ସରସ ଲୁଟି ନେଇଛି ଅଦିନିଆ ବର୍ଷା। କୋହଲା ପାଗ ସାଙ୍ଗକୁ ତୁହାକୁ ତୁହା ଲଗାଣ ବର୍ଷା ଦୂରଦୂରାନ୍ତରୁ ଆସିଥିବା ଶ୍ରଦ୍ଧାଳୁଙ୍କ ପାଇଁ ଦାଉ ସାଧିଛି। ଫିକା ପଡ଼ିଛି ବ୍ୟବସାୟ। ହାତବାନ୍ଧି ବସିଛନ୍ତି ବ୍ୟବସାୟୀ। ପ୍ରତିକୂଳ ପରିବେଶ ପାଇଁ ରବିବାରଠାରୁ ଦୁଇଦିନ ଧରି ହେବାକୁ ଥିବା ମହିମା ମହୋତ୍ସବକୁ ସୋମବାରକୁ ଘୁଞ୍ଚାଇ ଦିଆଯାଇଛି। ଅନ୍ୟପଟେ ଚଳିତବର୍ଷ ଦୁଇଦିନ ପୂର୍ଣ୍ଣିମା ପଡୁଛି। ତେଣୁ ୩ଦିନ ଧରି ଝାଡ଼ଦୀପ ପ୍ରଜ୍ୱଳିତ ହେବ ବୋଲି ସୂଚନା ଦିଆଯାଇଛି।
ଶୁକ୍ରବାର ପ୍ରଥମ ଦିବସରେ ପ୍ରବଳ ଥଣ୍ଡା, କୋହଲା ପବନ ମାଡ଼ ସାଙ୍ଗକୁ ବର୍ଷା ସାଧୁସନ୍ନ୍ୟାସୀ ଏବଂ ଶ୍ରଦ୍ଧାଳୁଙ୍କ ସମସ୍ୟା ବଢ଼ାଇଥିଲା। ଶନିବାର ପାଗ ସ୍ବାଭାବିକ ହୋଇଯିବ ବୋଲି ସମସ୍ତେ ଆଶା ବାନ୍ଧି ବସିଥିଲେ। ବିଶେଷକରି ଦୂରଦୂରାନ୍ତରୁ ଆସି ପସରା ମେଲାଇଥିବା ବ୍ୟବସାୟୀମାନେ ଖରାଟିଆ ପାଗକୁ ଅନାଇଥିଲେ। ହେଲେ ସମସ୍ତଙ୍କୁ ନିରାଶ ହେବାକୁ ପଡିଛି। ମହିମା ଗାଦିର ରାସ୍ତାଘାଟ କାଦୁଅରେ ଭର୍ତ୍ତି ହୋଇପଡ଼ିଥିବାରୁ ଯାତ୍ରୀମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଦ୍ୱିତୀୟ ଦିନରେ ଜନସମାଗମ ଗତବର୍ଷ ତୁଳନାରେ ଅପେକ୍ଷାକୃତ କମ୍ ହୋଇଥିଲା। ଅନ୍ୟପଟେ ମାଘମେଳା ଉପଲକ୍ଷେ ଶନିବାର ମହିମା ଗାଦିରେ ଦେଶ ପୂର୍ଣ୍ଣିମା ପାଳିତ ହୋଇଛି। ମହିମା ସାଧୁ ସନ୍ନ୍ୟାସୀମାନେ ଝାଡ଼ଦୀପ ପ୍ରଜ୍ୱଳନ କରିବା ସହିତ ବିଶ୍ୱଶାନ୍ତି କାମନା କରି ଶୂନ୍ୟପ୍ରଭୁଙ୍କ ଉଦ୍ଦେଶ୍ୟରେ ପ୍ରାର୍ଥନା କରିଥିଲେ। ଏ ସଂକ୍ରାନ୍ତରେ ଯୋରନ୍ଦା ସରପଞ୍ଚ ପ୍ରଶାନ୍ତ କୁମାର ରାଉତ କୁହନ୍ତି, ଲଗାଣ ବର୍ଷା ଯୋଗୁ ସମସ୍ୟା ଉପୁଜିଛି। ବ୍ୟବସାୟୀମାନେ ନାହିଁ ନ ଥିବା ଅସୁବିଧା ଭୋଗୁଛନ୍ତି। ମେଳା ଦେଖିବାକୁ ଆସୁଥିବା ଶ୍ରଦ୍ଧାଳୁଙ୍କ ସୁବିଧା ପାଇଁ କାଦୁଅ ରାସ୍ତାରେ ବାଲି, ଚିପ୍ସ ପକାଯାଇଛି। ବର୍ଷା ଯୋଗୁ ମହିମା ମହୋତ୍ସବକୁ ଗୋଟିଏ ଦିନ ଘୁଞ୍ଚାଇ ଦିଆଯାଇଥିବା ସେ କହିଛନ୍ତି।