ବୀମା କମ୍ପାନୀମାନେ ମାଙ୍କଡ଼ଙ୍କ ପାଇଁ ନାକେଦମ ହୋଇ ପଡ଼ିଲେଣି। ଏକଥା ଶୁଣିଲେ ହୁଏତ ଯେ କେହି ବି ଆଶ୍ଚର୍ଯ୍ୟ ଚକିତ ହୋଇପାରେ। ଅବଶ୍ୟ ଏହା ଏଠିକାର କଥା ନୁହେଁ। ବାଲିର ବୀମା କମ୍ପାନୀମାନେ ଏଭଳି ଏକ ଖବର ପ୍ରକାଶ କରିଛନ୍ତି। ସେଠାକାର ପର୍ଯ୍ୟଟନ ସ୍ଥଳଗୁଡିକରେ ମାଙ୍କଡ଼ମାନଙ୍କର ପ୍ରାଦୁର୍ଭାବ ଦିନକୁଦିନ ବୃଦ୍ଧି ପାଇବାରେ ଲାଗିଛି। ପର୍ଯ୍ୟଟକମାନଙ୍କ ଜିନିଷ ପତ୍ର ଛଡ଼େଇ ନେବା ସହିତ ସେଗୁଡ଼ିକୁ ଭାଙ୍ଗି ପକାଉଛନ୍ତି। ବିଶେଷକରି ଅଷ୍ଟ୍ରେଲିଆର ପର୍ଯ୍ୟଟକମାନେ ଏଭଳି ହଇରାଣ ହରକତ ହେଉଛନ୍ତି। ସେତିକିନୁହେଁ ସେମାନେ ସମସ୍ତେ ବୀମାଭୁକ୍ତ ହୋଇଥିବାରୁ ମାଙ୍କଡ଼ମାନେ ଯେଉଁ କ୍ଷତି କରୁଛନ୍ତି ତାହାକୁ ସେମାନେ ବୀମା କମ୍ପାନୀମାନଙ୍କ ଠାରୁ ଆଦାୟ କରୁଛନ୍ତି। ୨୦୧୮ରୁ ଏହା ବଢ଼ିବାରେ ଲାଗିଛି। ଗୋଟିଏ ବୀମା କମ୍ପାନୀଠାରୁ ମିଳିଥିବା ରିପୋର୍ଟ ଅନୁଯାୟୀ ଅଷ୍ଟ୍ରେଲିଆର ଜଣେ ମହିଳା ପର୍ଯ୍ୟଟକ ବାଲିକୁ ପର୍ଯ୍ୟଟନରେ ଯାଇଥିଲେ। ସେ ଏକ ସୁଇମିଂପୁଲରେ ସ୍ନାନ କରୁଥିବା ବେଳେ ଗୋଟିଏ ମାଙ୍କଡ଼ ଆସି ତାଙ୍କ ପାଖରୁ ତାଙ୍କର ସନ୍ଗ୍ଲାସ୍ଟିକୁ ଛଡ଼େଇ ନେଇ ଚାଲିଗଲା। ଆଉ ତାକୁ ନଷ୍ଟ କରିଦେଲା। ସେହି ମହିଳା ଜଣକ ତାଙ୍କ କମ୍ପାନୀଠାରୁ ୫୩୫ଡଲାର ଦାବି କରିଥିଲେ। ସେମିତି ଆଉ ଏକ ରିପୋର୍ଟ ହେଉଛି, ଆଉ ଜଣେ ପର୍ଯ୍ୟଟକ ରାସ୍ତାରେ ଚାଲିଚାଲି ଯାଉଥିଲେ। ହଠାତ୍ ରାସ୍ତାରେ ଧଁା ଦଉଡ଼ ଆରମ୍ଭ ହୋଇଗଲା। ମାଙ୍କଡ଼ମାନେ ଉପଦ୍ରବ କରିବା ଆରମ୍ଭ କରିଦେଲେ। ତାଙ୍କ ଉପରକୁ ଗୋଟିଏ ମାଙ୍କଡ଼ ଝାମ୍ପି ପଡ଼ିଲା। ପର୍ଯ୍ୟଟକ ଜଣକ ତଳେ ପଡ଼ିଗଲେ। ତାଙ୍କର ଲାପ୍ଟପ୍ ଭାଙ୍ଗିଗଲା। ମାଙ୍କଡ଼ଟି ସେତିକିରେ ସନ୍ତୁଷ୍ଟ ନ ହୋଇ ତାଙ୍କଠାରୁ ତାଙ୍କ ସ୍ମାର୍ଟଫୋନ୍ଟି ଛଡ଼େଇ ନେଇ ଚାଲିଗଲା। ବ୍ୟକ୍ତିଜଣକ ମେଡ଼ିକାଲକୁ ବୁହା ହୋଇଗଲେ। ତାଙ୍କର ବୀମା ବାବଦକୁ କମ୍ପାନୀକୁ ୩୩୧୧ ଡଲାର ପଇଠ କରିବାକୁ ପଡ଼ିଲା।