ପୋଚେଫ୍ସଟ୍ରୁମ,୨୯।୧- ଅଷ୍ଟ୍ରେଲିଆନ ଓପନର ଜ୍ୟାକ ଫ୍ରାସର ମ୍ୟାକଗର୍କ ଚଳିତ ୧୯ ବର୍ଷରୁ କମ୍ ବିଶ୍ୱକପ୍ରୁ ବାଦ୍ ପଡ଼ିଛନ୍ତି। ତାଙ୍କ ମୁହଁକୁ ମାଙ୍କଡ଼ ରାମ୍ପୁଡି ଦେଇଛି। ନେଚର ରିଜର୍ଭଠାରେ ଏହି ଘଟଣା ଘଟିଥିବା କ୍ରିକେଟ ଅଷ୍ଟ୍ରେଲିଆ (ସିଏ) ପକ୍ଷରୁ ବୁଧବାର କୁହାଯାଇଛି। ଗତ ସପ୍ତାହରେ କିମ୍ବରଲେଠାରେ ଇଂଲଣ୍ଡ ବିପକ୍ଷ ମ୍ୟାଚ୍ରେ ବିଜୟୀ ହେବା ପରେ ଅଷ୍ଟ୍ରେଲିଆ ଦଳ ଆଉଟିଂରେ ଯାଇଥିଲା। ଅଷ୍ଟ୍ରେଲିଆରେ ତାଙ୍କର ସାବଧାନତାପୂର୍ଣ୍ଣ ଚିକିତ୍ସା କରାଯିବ। ଜ୍ୟାକଙ୍କ ସମ୍ପର୍କରେ କିଛି ଚିନ୍ତା କରିବାର ନାହିଁ। ଏଭଳି କ୍ଷେତ୍ରରେ ଖେଳାଳିଙ୍କୁ ଫିଟ୍ ହେବା ପାଇଁ ମାତ୍ର ୭ ଦିନ ଲାଗେ ବୋଲି ସିଏ ସ୍ପୋଟର୍ସ ମେଡିସିନ ମ୍ୟାନେଜର ଆଲେକ୍ସ କାଉଣ୍ଟରିସ କହିଛନ୍ତି। ପୋଚେଫ୍ସଟ୍ରୁମଠାରେ ଖେଳାଯାଇଥିବା କ୍ୱାର୍ଟର ଫାଇନାଲରେ ଭାରତ ଅଷ୍ଟ୍ରେଲିଆକୁ ହରାଇ ଦେଇଛି। ମ୍ୟାଚ୍ରେ ଖେଳିଥିବା ଜ୍ୟାକ ରନଆଉଟ୍ ହୋଇଥିଲେ।
