ଦେଢ଼ବର୍ଷର ହୋଇଥିବା ବେଳେ ବାପା ଚାଲିଗଲେ ଆରପାରିକୁ। ଗଁ। ଗଁ।ରେ ଚାଉଳ ବିକି ମା’ ହିଁ ମଣିଷ କରିଛି ଆମ ୫ ଭଉଣୀ ଭାଇଙ୍କୁ। ପିଲାବେଳେ କେତେ ଯେ କଷ୍ଟ ସହିବାକୁ ପଡ଼ିଛି, ସେକଥା କେବଳ ମା’ ଓ ଆମେମାନେ ହିଁ ଜାଣିଛୁ। ହେଲେ ଈଶ୍ୱରଙ୍କ କରୁଣା ଓ ମା’ଙ୍କ ଆଶୀର୍ବାଦ ଯୋଗୁ ଆଜି ବନ୍ତଳା ବଜାରରେ ଜଣେ ପରିଚିତ ମଣିଷ ଭାବେ ଠିଆ ହୋଇପାରିଛି ବୋଲି ଦୋକାନୀ ପ୍ରମୋଦ ସାହୁ ଓରଫ ବଗ (୫୩) କହିଛନ୍ତି।
୪ ଭଉଣୀରେ ଗୋଟିଏ ଭାଇ ହେଉଛନ୍ତି ପ୍ରମୋଦ। ବହୁ କଷ୍ଟରେ ବନ୍ତଳା ସରକାରୀ ହାଇସ୍କୁଲରେ ଦଶମ ପର୍ଯ୍ୟନ୍ତ ପଢିପାରିଥିଲେ। ଆର୍ଥିକ ଅନଟନ ଯୋଗୁ ପରୀକ୍ଷା ପାଇଁ ଫର୍ମ ଫିଲ୍ଅପ କରିପାରି ନ ଥିଲେ। ମାତ୍ର ୧୪ ବର୍ଷ ବୟସରେ ଦୈନିକ ୨୦ କିଲୋମିଟର ଦୂର ଜଙ୍ଗଲରୁ ସେ କାଠ ସଂଗ୍ରହ କରି ଘରକୁ ଆଣୁଥିଲେ। ସେହି କାଠରେ ତାଙ୍କ ମା’ ଧାନ ସିଝାଇ ଚାଉଳ କରି ଗାଁରେ ବିକ୍ରି କରି ଘର ଚଳାଉଥିଲେ। ବହୁ କଷ୍ଟରେ ୮ଶହ ଟଙ୍କା ସଞ୍ଚୟ କରି ସନ୍ତୋଷ ସାହୁଙ୍କ ସହଯୋଗରେ ୧୯୯୦ରେ ସେ ବନ୍ତଳା ଛକରେ ଏକ ଛୋଟ ଦୋକାନ ଖୋଲିଥିଲେ। ସେହି ଦୋକାନରୁ ଯାହା ରୋଜଗାର ହେଉଥିଲା, ସେଥିରେ ଘର ଚଳାଇବା ସହ ୪ ଭଉଣୀଙ୍କ ବିବାହ କରାଇଥିଲେ। ପରେ ୧୯୯୭ରେ ତାଳମୂଳ ଗଁାର ସବିତାଙ୍କୁ ସେ ବିବାହ କରିଥିଲେ। ଦୁଇ ପୁଅ ମଧ୍ୟରୁ ବଡ଼ ସତ୍ୟଜିତ ଯୁକ୍ତ ୩ରେ ପଢ଼ୁଥିବା ବେଳେ ସାନ ଶୁଭ୍ରଜିତ ଯୁକ୍ତ ୨ ବନ୍ତଳା ମହାବିଦ୍ୟାଳୟରେ ପଢ଼ୁଛନ୍ତି। ପିଲା ଦୁଇଟିକୁ ମଣିଷ କରିବା ଲାଗି ସବିତା ଓ ସେ ଦିନରାତି ପରିଶ୍ରମ କରୁଛନ୍ତି। ଦୈନିକ ସକାଳ ୬ଟା ରୁ ଉଠି ସମସ୍ତ ନିତ୍ୟକର୍ମ ସାରିବା ପରେ ୮ଟାରେ ଦୋକାନ ଖୋଲିଥାନ୍ତି। ରାତି ୧୧ଟାରେ ଦୋକାନ ବନ୍ଦ କରି ଘରକୁ ଫେରିଥାନ୍ତି। ମଧ୍ୟାହ୍ନରେ ସେହି ଦୋକାନରେ ହିଁ ସେ ଭୋଜନ କରିଥାନ୍ତି। ଦୀର୍ଘ ୨୮ ବର୍ଷ ମଧ୍ୟରେ ସେ ଅନେକ ଲୋକଙ୍କ ସହ ଭଲ ସମ୍ପର୍କ ଗଢ଼ି ପାରିଛନ୍ତି। ଗରାଖଙ୍କୁ ସେ ସର୍ବଦା ଗୁରୁତ୍ୱ ଦେଉଥିବାରୁ ବନ୍ତଳା ବଜାରରେ ଜଣେ ପରିଚିତ ମଣିଷ ପାଲଟି ଯାଇଥିବା ପ୍ରମୋଦ ପ୍ରକାଶ କରିଛନ୍ତି।