ବାରିପଦା ଅଫିସ,୩୦ା୫- ବର୍ତ୍ତମାନ ସମୟରେ ଜୀବିକା ବଞ୍ଚାଇବା କଷ୍ଟକର ହୋଇପଡ଼ିଛି। କରୋନା ମହାମାରୀ ଯୋଗୁ ପ୍ରବାସୀମାନେ ଘରମୁହାଁ ହେଉଛନ୍ତି। ସେହିଭଳି ଅନେକ ସ୍ଥାନରେ ଯୁବତୀଯୁବକମାନେ ଚାକିରି ପଛରେ ଗୋଡ଼ାଇ ନ ପାରି ନିରାଶ ହୋଇ ଘରେ ବସି ରହୁଛନ୍ତି। ହେଲେ ମୟୂରଭଞ୍ଜ ଜିଲା ବାରିପଦା ବ୍ଲକ ରଜାବସା ପଞ୍ଚାୟତ କୁକୁଡ଼ାଯୋଡ଼ି ଗ୍ରାମର ଯୁବକ ପ୍ରଫୁଲ୍ଲ ଟିପିରଆ ଜୈବିକ ପ୍ରଣାଳୀରେ ମାଛ ଚାଷ କରି ଅଞ୍ଚଳରେ ପରିଚିତ ହେବା ସହ ଆତ୍ମନିର୍ଭରଶୀଳ ହୋଇପାରିଛନ୍ତି।
ପ୍ରାଥମିକସ୍ତରରେ ସେ ଗୋଟିଏ ଟାଙ୍କିରେ ଏହି ଚାଷ ଆରମ୍ଭ କରିଛନ୍ତି। ୩ ମାସ ତଳେ ଏହି ଟାଙ୍କିରେ ମାଛ ଚାଷ କରିଥିବା ବେଳେ ବର୍ତ୍ତମାନ ସୁଦ୍ଧା ୩୦ହଜାର ଟଙ୍କାର ମାଛ ବିକ୍ରି କରିସାରିଲେଣି। ଆଗକୁ ଆହୁରି କିଛି ଟଙ୍କାର ମାଛ ବିକ୍ରି ହେବ ବୋଲି କହିଛନ୍ତି। ସେହିଭଳି ଅଧିକ ଟାଙ୍କି କରି ଏହି ଚାଷ ବଢ଼ାଇବେ ବୋଲି ପ୍ରକାଶ କରଛନ୍ତି। ଯୁକ୍ତ ୨ ପଢା ପରେ ପ୍ରଫୁଲ୍ଲ ବ୍ୟବସାୟ କରିବା ପାଇଁ ଚିନ୍ତା କରିଥିଲେ। ପ୍ରଥମେ କୁକୁଡ଼ା ଫାର୍ମ କରିଥିଲେ। ତେବେ ଜୈବିକ ପ୍ରଣାଳୀରେ ମାଛଚାଷ ହେଉଥିବା ଜାଣି ସେ ବାରିପଦାସ୍ଥିତ ୟୁ କ୍ୟାନ ଫାର୍ମର ସହାୟତାରେ ନିଜେ ମାଛ ଚାଷ କରିଥିଲେ। ସେ କୁହନ୍ତି, ପ୍ରଥମେ ଟାଙ୍କି ପାଇଁ ୨୫ହଜାର ଟଙ୍କା ଖର୍ଚ୍ଚ ହୋଇଥିଲା। ଏହା ପରେ ୧୦୦୦ଟି ଦେଶୀ କଉ ଯାଆଁଳଙ୍କୁ ୩ ଟଙ୍କା ଲେଖାଏ ୩ ହଜାର ଟଙ୍କା ଦେଇ କିଣିଥିଲେ। ୩ ମାସରେ ପ୍ରାୟ ୨ ହଜାର ଟଙ୍କାର ଦାନା ଖାଇବାକୁ ଦେଇଥିଲେ। ବର୍ତ୍ତମାନ ସୁଦ୍ଧା ଗୋଟାକ ମାଛ ୨୫୦ରୁ ୩୦୦ ଗ୍ରାମ୍ ହୋଇଥିବା ବେଳେ ସେ ୩୦ହଜାର ଟଙ୍କାର ମାଛ ବିକ୍ରିକରି ସାରିଲେଣି। ଏପରି କି ପ୍ରତିଦିନ ଆଖପାଖ ଅଞ୍ଚଳରୁ ଲୋକେ ଯାଇ ତାଙ୍କ ମାଛ ଚାଷ ପ୍ରଣାଳୀ ଦେଖିବା ସହିତ କିଣି ନେଉଥିବା ମଧ୍ୟ କହିଛନ୍ତି ପ୍ରଫୁଲ୍ଲ। ଏହି ଟାଙ୍କିରେ ୧୦ ହଜାର ଲିଟର ପାଣି ରହୁଥିବା ବେଳେ ପ୍ରଥମ କରି ଚାଷ କରୁଥିବାରୁ ସେ ୧୦୦୦ଟି ମାଛ ଯାଆଁଳ ଛାଡ଼ିଥିଲେ। ଟାଙ୍କିରେ ଜଣେ ଚାହିଁଲେ ୫୦୦୦ରୁ ୧୦ହଜାର ଯାଆଁଳ ଛାଡ଼ିପାରିବେ। ଅତି କମ୍ରେ ୩ଟି ଟାଙ୍କି କରି ବର୍ଷକୁ ଲକ୍ଷାଧିକ ଟଙ୍କା ରୋଜଗାର କରି ଆତ୍ମନିର୍ଭରଶୀଳ ହୋଇପାରିବେ ବୋଲି ସେ କହିଛନ୍ତି। ସେହିଭଳି ଦିନକୁ ୨ ଥର ମାଛଙ୍କୁ ଦାନା ଦେବା ସହିତ ପ୍ରତି ସପ୍ତାହରେ ଚେକିଂ କରି ପାଣି ବଦଳାଇ ଦିଆଯାଉଥିବା ସେ କହିଛନ୍ତି। ଆଗାମୀ ଦିନରେ ସେ ଚିଙ୍ଗୁଡ଼ି ଚାଷ କରିବେ ବୋଲି ମଧ୍ୟ ପ୍ରକାଶ କରିଛନ୍ତି। ବର୍ତ୍ତମାନ ଯୁବକମାନେ ଚାକିରି ପଛରେ ଗୋଡ଼ାଇ ହତାଶ ହେଉଥିବା ବେଳେ ଜୈବିକ ପ୍ରଣାଳୀରେ ଚାଷ କରି ନିଜର ଆର୍ଥିକ ସ୍ଥିତିକୁ ସୁଦୃଢ଼ କରିପାରିବେ ବୋଲି ପ୍ରଫୁଲ୍ଲ କହିଛନ୍ତି।