ମହାକାଳପଡ଼ା,୨୬।୯(ଡି.ଏନ୍.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ରାମନଗର ପଞ୍ଚାୟତ ବାଲିପାଟ ଗ୍ରାମର ବାବୁ ସାମଲ (୪୫) ନାମକ ଜଣେ ମତ୍ସ୍ୟଜୀବୀ ନିଖୋଜ ହୋଇଯାଇଥିବା ପରିବାର ପକ୍ଷରୁ ଗୁରୁବାର ମେରାଇନ୍ ଥାନାରେ ଅଭିଯୋଗ ହୋଇଛି। ମିଳିଥିବା ସୂଚନା ଅନୁଯାୟୀ, ବତୀଘର ପଞ୍ଚାୟତର ବଡ଼ଟୁବି ଗ୍ରାମର ଜନୈକ ବୋଟ୍ମାଲିକଙ୍କ ବାବା ଲୋକନାଥ ବୋଟ୍ରେ ୬ ଜଣ ମତ୍ସ୍ୟଜୀବୀ ମାଛ ଧରିବା ପାଇଁ ମଙ୍ଗଳବାର ସମୁଦ୍ର ମଧ୍ୟକୁ ଯାଇଥିଲେ। ତେବେ ସମୁଦ୍ର ମଧ୍ୟରେ ପ୍ରବଳ ବର୍ଷା ପବନ ହେବା ସହ ପ୍ରଖର ସ୍ରୋତରେ ବୋଟ୍ ଇଞ୍ଜିନ୍ରେ ଜାଲ ଗୁଡ଼ାଇ ହୋଇଯାଇଥିଲା। ଜାଲକୁ କାଟିବା ପାଇଁ ବାବୁ ପାଣି ଭିତରକୁ ଓହ୍ଲାଇଥିଲେ। ତେବେ ଜାଲ କାଟିବା ସମୟରେ ପ୍ରବଳ ସ୍ରୋତରେ ସେ ଭାସିଯାଇଥିଲେ। ଅଚଳ ବୋଟ୍ଟି ଭାସି ଯାଇ ବତୀଘର ନିକଟସ୍ଥ ହେଟାମୁଣ୍ଡିଆ ସଂରକ୍ଷିତ ଜଙ୍ଗଲ ଅଞ୍ଚଳ ମହାନଦୀ ମୁହାଣରେ ଲାଗିଥିଲା। ଅନ୍ୟ ୫ ମତ୍ସ୍ୟଜୀବୀ ସୁରକ୍ଷିତ ଭାବରେ ଫେରିଥିଲେ ମଧ୍ୟ ଏପର୍ଯ୍ୟନ୍ତ ବାବୁଙ୍କର କୌଣସି ପତ୍ତା ମିଳିନାହିଁ।